చరిత్రగానే పసుపు- నలుపు రంగు ట్యాక్సీలు,,,ముంబయి రోడ్లపై ముగిసిన 6 దశాబ్దాల ప్రయాణం..

ముంబయి రోడ్లపై ఆరు దశాబ్దాల పాటు సేవలందించిన ‘ప్రీమియర్ పద్మిని’ టాక్సీలు ఇకపై చరిత్రగానే మిగిలిపోనున్నాయి. ముంబయి వాసులు రోజువారీ జీవితాల్లో భాగంగా మారిన ఈ ట్యాక్సీలను నిలిపివేయాలని మహారాష్ట్ర ప్రభుత్వం ఆదేశించింది. ఇటీవలే డీజిల్‌ సాయంతో నడిచే డబుల్ డెక్కర్ బస్సులను నిలుపుదల చేయగా.. నలుపు-పసుపు రంగులో ఉండే ఈ ట్యాక్సీలకు కూడా వీడ్కోలు పలికింది. ప్రీమియర్ పద్మిని టాక్సీలు అక్టోబర్ 30 నుంచి నిలిచిపోతున్నాయి. 20 ఏళ్లు దాటిన పాత క్యాబ్‌లను సిటీలో నడపడానికి అనుమతించబోమని ఏక్‌నాథ్ షిండే సర్కారు చేసిన ప్రకటనతో ప్రీమియర్ పద్మిని శకం ముగిసింది.

అయితే, 60 దశాబ్దాల పాటు తమకు సేవలందించిన పద్మిని ట్యాక్సీ సేవలు నిలివేశారన్న విషయం ముంబయి ప్రజల మనసును బరువెక్కించింది. కొందరు కనీసం ‘ప్రీమియర్ పద్మిని’ని రోడ్డుపై లేదా మ్యూజియంలో భద్రపరచాలని కోరుతున్నారు. ఈ టాక్సీలు ముంబయి గోడలపై మాత్రమే కనిపిస్తాయని.. మెల్లమెల్లగా కనుమరుగైనప్పటికీ తమ హృదయాల్లో వాటి స్ధానం ఎప్పటికీ పదిలంగా ఉంటుందని ముంబయివాసులు అంటున్నారు. ప్రముఖ పారిశ్రామికవేత్త ఆనంద్ మహీంద్ర సైతం ట్విట్టర్‌‌లో స్పందించారు. ‘ఈ రోజు నుంచి ఐకానిక్ ప్రీమియర్ పద్మిని టాక్సీ ముంబై రోడ్ల నుంచి అదృశ్యమవుతుంది. అంతగా సౌకర్యం, లగేజీ సామర్థ్యం కూడా లేని ఈ కార్లు నా పాతకాలపు ప్రజలకు, వారి టన్నుల కొద్దీ జ్ఞాపకాలను మోసుకెళ్లాయి.. మమ్మల్ని పాయింట్ ఏ నుంచి పాయింట్ బీ కి చేర్చే పని చేశాయి.. తమ విలువైన సేవలను అందించినందుకు ధన్యవాదాలు…’ అని ట్వీట్ చేశారు..

ప్రస్తుతం ముంబయి నగరంలో వివిధ మోడళ్ల కార్లు ట్యాక్సీలుగా తిరుగుతున్నాయి. అయితే, టాక్సీల పెయింటింగ్ విషయానికి వస్తే దాదాపు ఆరు దశాబ్దాల పాటు ముంబయి వీధులను పాలించిన నలుపు, పసుపు ప్రీమియర్ పద్మిని మాత్రమే కళ్లముందు మెదలాడుతుంది. ప్రస్తుతం 40 వేల వరకూ ఉన్న ఈ ట్యాక్సీలు.. 90 వ దశకం చివరిలో దాదాపు 90,000 వరకు ఉండేవి. ఆర్టీఏ అధికారుల సమాచారం ప్రకారం.. ముంబయిలో 2003 అక్టోబరు 30న చివరి పసువు-నలుపు రంగు ట్యాక్సీ రిజిస్ట్రేషన్ జరిగింది. వరిగా నమోదు చేసుకున్న ప్రీమియర్ పద్మిని టాక్సీ యజమాని ప్రభాదేవికి చెందిన అబ్దుల్ కరీమ్ కర్సేకర్. రిజిస్ట్రేషన్ నంబర్ ఎంహెచ్-01-జేఏ-2556. ఈ టాక్సీలుముంబయికి గర్వకారణం.. జీవితంలో భాగమని అభివర్ణించారు. వాటితో భావోద్వేగ అనుబంధం ఉందన్నారు.

కాగా, ముంబయి టాక్సీమెన్స్ యూనియన్ కనీసం ఒక 'కాలీ-పీలీ'ని సంరక్షించాలని ప్రభుత్వ కోరింది. కానీ వారి ప్రయత్నం విఫలమైంది. ముంబై టాక్సీమెన్స్ యూనియన్ ప్రధాన కార్యదర్శి క్వాడ్రోస్ మాట్లాడుతూ... ప్రీమియర్ పద్మిని టాక్సీల ప్రయాణం 1964లో ‘ఫియట్-1100 డిలైట్’ మోడల్‌తో ప్రారంభమైందని తెలిపారు. 1200-సీసీ ఇంజన్, స్టీరింగ్-మౌంటెడ్ గేర్ షిఫ్టర్‌కు ప్రసిద్ధి చెందిందని గుర్తు చేసుకున్నారు. 1970లలో ఈ మోడల్ రీబ్రాండింగ్‌ కారణం ‘ప్రీమియర్ ప్రెసిడెంట్’ చివరికి ‘ప్రీమియర్ పద్మిని’గా మారింది. ప్రీమియర్ ఆటోమొబైల్ లిమిటెడ్ చేసిన ఈ ఐకానిక్ కారు పేరు 2001లో ఉత్పత్తిని నిలిపివేసే వరకు అలాగే కొనసాగింది.