రిటైర్డ్ ఉద్యోగైన తండ్రికి పింఛన్, తెల్ల రేషన్ కార్డు మంజూరు.....,,గుంటూరులో వాలంటీర్‌ తొలగింపు

గుంటూరులో అక్రమాలకు పాల్పడిన వాలంటీర్‌పై అధికారులు చర్యలు తీసుకున్నారు. హేమాదిత్యకిరణ్‌ ఓ ప్రైవేటు సాఫ్ట్‌వేర్‌ కంపెనీలో ఉద్యోగం చేస్తూ వాలంటీర్‌గా చేరారని ఇంఛార్జ్ అదనపు కమిషనర్‌ సీహెచ్‌ శ్రీనివాస్‌ తెలిపారు. బీఎస్‌ఎన్‌ఎల్‌లో ఉద్యోగ విరమణ పొంది.. కేంద్ర పింఛను అందుకుంటున్న తన తండ్రి వెంకటేశ్వరరావుకు రేషన్‌కార్డుతో పాటు వృద్ధాప్య పింఛను మంజూరు చేయించారని తేలిందన్నారు. వీరి కుటుంబం శ్రీనగర్‌ 146వ వార్డు సచివాలయం పరిధిలో ఉన్నప్పటికీ.. 130వ వార్డు సచివాలయంలో వారి తల్లిదండ్రుల వివరాలు మ్యాపింగ్‌ చేసి అక్రమాలకు పాల్పడినట్లు అధికారులు గుర్తించారన్నారు.

వెంకటేశ్వర్లు కేంద్ర పింఛనుదారు కావడంతో సిక్స్‌ స్టెప్‌ వాలిడేషన్‌ తప్పించుకున్నారన్నారు. 2022 నుంచి ఇప్పటివరకు దాదాపు రూ.35 వేల వరకు ప్రభుత్వ వృద్ధాప్య పింఛను సొమ్ము పొందినట్లు తెలుస్తోంది. ఈ మొత్తాన్ని అధికారులు రెవెన్యూ రికవరీ యాక్ట్‌లో వసూలు చేసేందుకు సమాయత్తమయ్యారు. దీనిపై శుక్రవారం వాలంటీర్‌ను పిలిపించి వివరణ తీసుకోగా.. తాను చేసిన తప్పును ఒప్పకున్నట్లు అధికారులు తెలిపారు. కమిషనర్‌ కీర్తి విదేశీ పర్యటన నుంచి వచ్చిన తర్వాత విషయాన్ని ఆమె దృష్టికి తీసుకెళ్లి తదుపరి చర్యలు తీసుకుంటామన్నారు అధికారులు. వార్డు సంక్షేమ, పరిపాలన, రెవెన్యూ కార్యదర్శులపై కూడా కఠినచర్యలు తప్పవన్నారు.

కిరణ్‌ తాను పనిచేస్తున్న సచివాలయంలో మ్యాపింగ్‌ చేయించి.. కుటుంబం నుంచి తల్లిదండ్రుల పేర్లను వేరు చేసి తెల్లరేషన్‌ కార్డు, దాని ఆధారంగా వృద్ధాప్య పింఛన్‌ మంజూరు చేయించాడు. విచారణలో మాత్రం ఆయన తండ్రి బీఎస్‌ఎన్‌ఎల్‌ ఆఫీసులో లైన్‌మెన్‌గా పనిచేసి రిటైర్డు అయి నెలకు రూ.22,500 కేంద్ర ప్రభుత్వ పింఛన్‌ పొందుతున్నట్లు తేలింది. నిబంధనల ప్రకారం తెల్లరేషన్‌కార్డు, వృద్ధాప్య పింఛన్‌ పొందడానికి ఆయన అనర్హులు. దీంతో వాలంటీరు తండ్రి వృద్ధాప్య పింఛన్‌, తెల్లరేషన్‌కార్డు రద్దుకు చర్యలు చేపట్టారు.