ఈ హాల్ టికెట్ ఒక జీవిత కాలం లేటు.. దరఖాస్తు చేసిన 7 ఏళ్లకు వచ్చిన అడ్మిట్ కార్డు

సాధారణంగా మనం చాలా ప్రభుత్వ ఉద్యోగాలకు దరఖాస్తు చేస్తూ ఉంటాం. అయితే కొన్ని ఉద్యోగ నోటిఫికేషన్లు త్వరగా విడుదల చేసి ప్రక్రియ మొత్తం సక్రమంగా పూర్తయితే తొందర్లోనే ఉద్యోగాలు వస్తాయి. కానీ కొన్ని మాత్రం ఏళ్లకు ఏళ్లు సాగుతూనే ఉంటాయి. అయితే ఓ వ్యక్తి ఒక ఉద్యోగానికి దరఖాస్తు చేసుకున్న 7 సంవత్సరాల తర్వాత ఆ పరీక్షకు సంబంధించిన అడ్మిట్ కార్డు వచ్చింది. దీంతో అది చూసి ఆ వ్యక్తి షాక్ అయ్యాడు. ఈ వింత పరిస్థితి పశ్చిమ బెంగాల్‌లో చోటు చేసుకుంది.

2016 లో పశ్చిమ బెంగాల్‌లోని వ్యవసాయ శాఖలో ఖాళీల భర్తీకి ప్రభుత్వం ఉద్యోగ నోటిఫికేషన్ జారీ చేసింది. వ్యవసాయ శాఖలోని అసిస్టెంట్ పోస్టుల భర్తీ కోసం ఆ రిక్రూట్‌మెంట్‌ను విడుదల చేసింది. 2016 మార్చిలో దినపత్రికలో ఈ ఉద్యోగానికి సంబంధించిన నోటిఫికేషన్‌ను జారీ చేసింది. అయితే ఈ ఉద్యోగానికి అర్హత కలిగిన వర్ధమాన్ జిల్లాకు చెందిన ఆశిష్ బెనర్జీ అనే వ్యక్తి దరఖాస్తు చేసుకున్నాడు. ఆ తర్వాత ఆ ఉద్యోగానికి సంబంధించి గానీ.. రిక్రూట్‌మెంట్ టెస్ట్‌కు సంబంధించి గానీ ఆశిష్ బెనర్జీకి ఎలాంటి సమాచారం అందలేదు. దీంతో ఆశిష్ బెనర్జీ కూడా దాన్ని వదిలేశాడు. కొన్ని రోజుల తర్వాత అసలు ఆ ఉద్యోగానికి దరఖాస్తు చేసుకున్నాను అనే విషయాన్ని కూడా మర్చిపోయాడు.

అయితే తాజాగా ఇటీవల ఈ నెల 1వ తేదీన ఆశిష్‌ బెనర్జీకి పశ్చిమ బెంగాల్ వ్యవసాయ శాఖ నుంచి ఒక ఉత్తరం అందింది. అయితే తనకు అగ్రికల్చరల్ డిపార్ట్‌మెంట్ నుంచి లెటర్ రావడంతో ముందు ఆశిష్‌ బెనర్జీ ఆశ్చర్యపోయాడు. ఆ లెటర్‌లో ఉన్న విషయాన్ని చూసి ఆశ్చర్యపోయాడు. ఎందుకంటే తాను 7 ఏళ్ల క్రితం దరఖాస్తు చేసుకున్న ఉద్యోగానికి సంబంధించిన అడ్మిట్ కార్డు.. ఇంత కాలానికి తనకు చేరింది.

అయితే ఆ ఉద్యోగానికి సంబంధించిన పరీక్షను 2016 డిసెంబరు 18 వ తేదీనే నిర్వహించారు. ఆ రిక్రూట్‌మెంట్ పూర్తి అయిపోయి.. దానికి అప్లై చేసుకున్న వారిలో సెలక్ట్ అయిన వారు ఉద్యోగంలో చేరి సీనియర్లు కూడా అయ్యారు. అంటే పరీక్ష నిర్వహించిన 7 ఏళ్ల తర్వాత తనకు అడ్మిట్‌ కార్డు రావడంతో ఆశిష్‌ బెనర్జీ షాక్ అయ్యాడు. అయితే ఈ ఘటనపై బాధితుడు ఆశిష్ బెనర్జీ.. స్థానిక మీడియాతో మాట్లాడాడు. తనకు అడ్మిట్ కార్డు ఆలస్యం కావడానికి కారణం ఏమిటో దర్యాప్తు చేపట్టాలని డిమాండ్‌ చేశాడు. ఈ వ్యవహారంపై తాను న్యాయపోరాటం చేస్తానని స్పష్టం చేశాడు.

అయితే పశ్చిమ బెంగాల్‌లో ఇటీవల పలు ఉద్యోగ నియామక కుంభకోణాలు వెలుగులోకి వచ్చాయి. ఈ నేపథ్యంలోనే తాజాగా ఈ ఘటన జరగడం రాజకీయంగా తీవ్ర దుమారం రేపుతోంది. ఇది కూడా జాబ్ స్కామ్‌లో భాగమేనని బెంగాల్‌లోని ప్రతిపక్షాలు తీవ్ర స్థాయిలో అధికార టీఎంసీ పార్టీపై విమర్శలు గుప్పిస్తున్నాయి. ఈ ఘటనపై సమాధానం చెప్పాలని సీఎం మమతా బెనర్జీని ప్రశ్నించారు. దీంతో ఈ ఘటన కాస్తా పశ్చిమ బెంగాల్ వ్యాప్తంగా తీవ్ర చర్చనీయాంశంగా మారింది.