హమాస్‌తో యుద్ధం.. భారతీయలకు ఇజ్రాయెల్ గుడ్‌న్యూస్.. లక్షమందికి

ఇజ్రాయిల్-హమాస్ మధ్య జరుగుతున్న యుద్ధం ఎన్నో కొత్త సమస్యలను తీసుకువస్తోంది. అయితే ఇలాంటి విపత్కర పరిస్థితుల్లో ఇజ్రాయెల్.. భారతీయులకు ఒక తీపి కబురు తెలిపింది. ఇజ్రాయెల్ - హమాస్ మధ్య జరుగుతున్న యుద్ధం కారణంగా ఇజ్రాయెల్‌లో పనిచేసే పాలస్తీనియన్లను ఆ దేశం నుంచి పంపించేస్తున్నారు. అక్కడ పనిచేసే కార్మికులను సొంత దేశానికి పంపించడంతో అక్కడ భారీగా ఉద్యోగ కొరత ఏర్పడుతోంది. ఈ నేపథ్యంలోనే ఈ ఉద్యోగ ఖాళీలను భారతీయులతో నింపాలని ఇజ్రాయెల్ ప్రభుత్వం నిర్ణయం తీసుకుంది. దీంతో లక్ష మంది భారతీయులకు ఇజ్రాయెల్‌లో ఉద్యోగాలు దక్కనున్నాయి.

వాయిస్ ఆఫ్ అమెరికా ఇచ్చిన నివేదిక ప్రకారం.. ఇప్పటివరకు ఇజ్రాయెల్‌లో పనిచేస్తున్న 90 వేల మంది పాలస్తీనియన్లను సొంత దేశానికి పంపించేస్తోంది. ఇక వారి స్థానంలో లక్ష మంది భారతీయులను కార్మికులుగా నియమించుకోవడానికి అనుమతి ఇవ్వాలని ఇజ్రాయిల్‌లోని పలు నిర్మాణ కంపెనీలు బెంజమిన్ నెతన్యాహు ప్రభుత్వానికి విజ్ఞప్తి చేశాయి. అయితే ఈ విషయంలో తాము భారత ప్రభుత్వంతో చర్యలు జరుపుతున్నామని.. ఇజ్రాయిల్ బిల్డర్స్ అసోసియేషన్ సభ్యులు తెలిపారు. తదుపరి ఆమోదం కోసం ఇజ్రాయిల్ అధికారుల నిర్ణయం కోసం ఎదురుచూస్తున్నామని పేర్కొన్నారు. ప్రస్తుతం ఇజ్రాయెల్‌లో ఉన్న పరిస్థితిని ఇంతకు ముందు ఉన్న పరిస్థితికి తీసుకురావడానికి.. భారత్ నుంచి 50 వేల నుంచి లక్ష మంది కార్మికులు అవసరం అవుతారని అంచనా వేశారు. ప్రస్తుతం ఇజ్రాయెల్ హమాస్ మధ్య జరుగుతున్న యుద్ధం కారణంగా పాలస్తీనా కార్మికులు సొంత దేశానికి వెళ్లడంతో ఇజ్రాయెల్‌లో నిర్మాణ రంగం తీవ్రంగా ప్రభావితమైంది.

మరోవైపు.. ఇజ్రాయిల్-హమాస్ మధ్య యుద్ధం ప్రారంభమై నెల రోజులు పూర్తయింది. హమాస్‌ గ్రూపును పూర్తిగా నేలమట్టం చేసేదాకా తాము విశ్రమించబోమని ఇప్పటికే ఇజ్రాయిల్ ప్రధాని బెంజిమిన్ నెతన్యాహూ పలుమార్లు ప్రకటించారు. ఈ క్రమంలోనే హమాస్‌పై దాడులను ఆపాలని అమెరికాతో పాటు ఏ దేశం చెప్పిన వినే పరిస్థితిలో ప్రస్తుతం ఇజ్రాయిల్ లేదు. గాజా స్ట్రిప్, ముఖ్యంగా ఉత్తర గాజాలోని హమాస్ స్థావరాలను పూర్తిగా ఆక్రమిస్తోంది. దొరికిన హమాస్ ఉగ్రవాదులను ఎక్కడికక్కడ హతం చేస్తోంది. కీలక కమాండర్లను కూడా హతమార్చింది. ఇప్పటికే గాజాలో కీలకంగా ఉన్న హమాస్ ఉగ్రవాదుల్లో చాలా మందిని మట్టుబెట్టింది. మరోవైపు.. ఇజ్రాయిల్ జరిపిన దాడుల్లో ఇప్పటి వరకు 10 వేల మందికి పైగా పాలస్తీనియన్లు చనిపోయారనే అంచనాలు ఉన్నాయి.