సుప్రీంకోర్టును ఆశ్రయించిన పంజాబ్ ప్రభుత్వం,,,,ఆప్ సర్కారు చర్యలను తప్పుబట్టిన సీజేఐ ధర్మాసనం

శాసనసభ తీర్మానించి పంపిన బిల్లులకు ఆమోదం తెలపడంలో గవర్నర్లు ఉద్దేశపూర్వకంగా జాప్యం చేస్తున్నారని, రాజ్యాంగబద్దమైన పదవిని దుర్వినియోగం చేస్తున్నారని పలు రాష్ట్రాలు ముఖ్యంగా ప్రతిపక్ష పాలిత ప్రభుత్వాలు ఆరోపిస్తున్నాయి. ఈ నేపథ్యంలో సర్వోన్నత న్యాయస్థానం సోమవారం గవర్నర్ల వ్యవహారశైలిపై కీలక వ్యాఖ్యలు చేసింది. తమ పనితీరుపై గవర్నర్లు చిన్నపాటి ఆత్మపరిశీలన చేసుకోవాల్సిన అవసరం కనిపిస్తోందని ప్రధాన న్యాయమూర్తి జస్టిస్ డీవై చంద్రచూడ్ నేతృత్వంలోని త్రిసభ్య ధర్మాసనం వ్యాఖ్యానించింది. బిల్లుల ఆమోదం వివాదాలు సుప్రీంకోర్టుకు చేరక ముందే వాటిపై నిర్ణయాలు తీసుకోవాలని సూచించింది.

పంజాబ్‌ అసెంబ్లీ ఆమోదించిన కీలకమైన బిల్లుల విషయంలో గవర్నర్‌ బన్వారీలాల్‌ పురోహిత్‌ చర్యలు, తాజా పరిస్థితిని వివరిస్తూ నివేదిక సమర్పించాలని సొలిసిటర్‌ జనరల్‌ తుషార్‌ మెహతాను ఆదేశించింది. ‘ప్రజలు ఎన్నుకున్న ప్రజాప్రతినిధులం కాదనే వాస్తవాన్ని గవర్నర్లు విస్మరించరాదు’ అని ధర్మాసనం హితవు పలికింది. పంజాబ్‌ ప్రభుత్వం పంపిన బిల్లులు అన్నింటిపై గవర్నర్‌ చర్యలు తీసుకున్నారని, ప్రస్తుత వ్యాజ్యంపై విచారణ అవసరం లేదని తుషార్‌ మెహతా ధర్మాసనానికి తెలిపారు.

ఈ సందర్భంగా ‘వివాదం సుప్రీంకోర్టుకు చేరకముందు మాత్రమే చర్యలు తీసుకోవడానికి ముగింపు పలకాలి’ అని ధర్మాసనం పేర్కొంది. పెండింగ్ బిల్లుల గురించి తాను శుక్రవారం వాస్తవ స్థితిని ఇస్తానని సొలిసిటర్ జనరల్ కోర్టుకు తెలియజేశారు. అయితే, ఆప్ ప్రభుత్వం అసెంబ్లీని కేవలం వాయిదా వేయడం ప్రోరోగ్ చేయకుండా ఏడాది పొడవునా సజీవంగా ఉంచుతుందని ఆరోపించారు. దీనిపై ధర్మాసనం స్పందిస్తూ బడ్జెట్‌ సమావేశాలు నిరవధిక వాయిదా పడిన తర్వాత అసెంబ్లీని ప్రభుత్వం మళ్లీ సమావేశపర్చడాన్ని ధర్మాసనం తప్పుబట్టింది. ‘మార్చి 3న అసెంబ్లీని సమావేశపరిచి ప్రోరోగ్ చేయకుండానే మార్చి 22న వాయిదా వేశారు. మూడు నెలల తర్వాత జూన్ 12న స్పీకర్ అసెంబ్లీని మళ్లీ సమావేశపరిచారు. ఇది నిజంగా రాజ్యాంగ బద్దమేనా? అసెంబ్లీ సమావేశానికి మూడు నెలల విరామం ఉంటే, మీరు సెషన్‌ను ప్రోరోగ్ చేసి, ఆపై సెషన్‌ను తిరిగి ప్రారంభించలేరా? తిరిగి సమావేశమయ్యేలా గవర్నర్‌కు సలహా ఇవ్వడం అధికారంలో ఉన్న ప్రభుత్వ బాధ్యత.. సభ చివరి సమావేశం జరిగిన ఆరు నెలల్లోపు సెషన్‌ను నిర్వహించాలి అదే రాజ్యాంగం చెబుతోంది’ అని ధర్మాసనం వ్యాఖ్యానించింది.

కాగా, పంజాబ్ అడ్వకేట్ జనరల్ గుర్మీందర్ సింగ్ వివరణ ఇస్తూ.. ఏడు బిల్లుల్లో నాలుగు బిల్లులు అసెంబ్లీ ఆమోదించాయని, మిగిలినవి ద్రవ్య బిల్లులని అన్నారు. వీటిని గవర్నర్ ఆమోదం పొందిన తర్వాత మాత్రమే ప్రవేశపెట్టవచ్చని ఆయన స్పష్టం చేశారు. రాష్ట్ర ప్రభుత్వం అత్యున్నత న్యాయస్థానాన్ని ఆశ్రయించడంతో ఆగిపోయిన రెండు మనీ బిల్లులకు గవర్నర్ ఆమోదం లభించిందని ఆయన చెప్పారు.ఆర్ధిక బిల్లు సహా మొత్తం ఏడు బిల్లుల విషయమై ఆప్ సర్కారు, పంజాబ్ గవర్నర్‌ మధ్య వివాదం కొనసాగుతోంది. ఈ అంశంపై భగవంత్ మాన్ ప్రభుత్వం సుప్రీం కోర్టును ఆశ్రయించడంతో జస్టిస్ డీవై చంద్రచూడ్, జస్టిస్ పీబీ పర్దివాలా, జస్టిస్ మనోజ్ మిశ్రాలతో కూడిన ధర్మాసనం విచారణ చేపట్టింది. సీజేఐ మాట్లాడుతూ.. ‘ఇది ఆందోళన కలిగిస్తోంది.. బడ్జెట్ సమావేశాన్ని ఏర్పాటు చేయడానికి పార్టీలు సుప్రీంకోర్టును ఎందుకు రావాలి? మనది ప్రజాస్వామ్యం. ఈ విషయాలను ప్రభుత్వం, గవర్నర్ పరిష్కరించాలి. రాజ్యాంగం, దాని నిబంధనలు ఉండేలా చూసుకోవడానికి మేము అందుబాటులో ఉన్నాము. ఖచ్చితంగా, ఇది గవర్నర్, సిఎం పరిష్కరించాల్సిన విషయం’ అని స్పష్టం చేశారు.