శ్రీశైలంలో కార్తీక మాసోత్సవాలు,,,,అన్ని ఏర్పాట్లు పూర్తి

శ్రీశైలం మహా పుణ్యక్షేత్రంలో మంగళవారం నుంచి కార్తిక మాసోత్సవాలు ప్రారంభంకానున్నాయి. ఈ ఉత్సవాలు డిసెంబర్‌ 12 వరకు కొనసాగనున్నాయి. అయితే రద్దీ రోజుల్లో శ్రీ మల్లికార్జున స్వామికి భక్తులు నిర్వహించే గర్భాలయ, సామూహిక అభిషేకాలను రద్దు చేసినట్లు దేవస్థానం ఈవో డి పెద్దిరాజు తెలిపారు. శని, ఆది, సోమవారాలతో పాటు సెలవురోజుల్లో స్పర్శ దర్శనాలను రద్దు చేసినట్లు ఆయన చెప్పారు. మంగళవారం నుంచి శుక్రవారం వరకు నాలుగు విడతలుగా స్పర్శ దర్శనాలు ఏర్పాటు చేశామన్నారు ఈవో. దీనికి సంబంధించిన టికెట్లను ఆన్‌లైన్‌ ద్వారా పొందాలన్నారు.

మరోవైపు కార్తీక మాసంలోని శని, ఆది, సోమవారాలలో భక్తులందరికి అలంకార దర్శనానికి మాత్రమే అనుమతిస్తారు. భక్తుల రద్దీ ఎక్కువగా ఉండే రోజుల్లో అమ్మవారి అంతరాలయంలో భక్తులు నిర్వహించుకునే కుంకుమార్చన రద్దు చేసినట్లు ఇప్పటికే తెలిపారు. శని, ఆది, సోమ, కార్తీక పౌర్ణమి, ఏకాదశి రోజుల్లో సామూహిక, గర్భాలయ అభిషేకాలు, స్పర్శ దర్శనాలు రద్దు చేశారు. సాధారణ రోజుల్లో కూడా సామూహిక, గర్భాలయ అభిషేకాలు పరిమిత సంఖ్యలో మాత్రమే భక్తులకు అందుబాటులో ఉంటుంది.

మరోవైపు మంగళవారం నుంచి కార్తీక మాసోత్సవాలు ప్రారంభంకానున్నాయి. కార్తీక సోమవారాలు, కార్తీక పౌర్ణమి, శుద్ధ, బహుళ ఏకాదశులు, ప్రభుత్వ సెలవు రోజుల్లో భక్తుల రద్దీ ఎక్కువగా ఉంటుందని అంచనా వేస్తున్నారు. భక్తుల రద్దీ పెరిగే అవకాశం ఉండటంతో.. అందుకు తగిన ఏర్పాట్లు చేస్తున్నారు. పాతాళ గంగ వద్ద శౌచాలయాలు, స్త్రీలు దుస్తులు మార్చుకునే గదులకు, పాతాళగంగ మెట్ల మార్గం తదితర చోట్ల అవసరమైన మరమ్మతు పనులు పూర్తి చేశారు. గంగా భవానీ స్నాన ఘట్టాల వద్ద కూడా అవసరమైన మరమ్మతులు చేయించారు.

భక్తులకు వసతుల కల్పన, మంచినీటి సరఫరా, సౌకర్యవంతమైన దర్శనం, శ్రీ స్వామి అమ్మవార్ల ఆర్జిత సేవలు, ఆలయ వేళలు, క్యూ లైన్ల నిర్వహణ, రద్దీ క్రమబద్దీకరణ, ట్రాఫిక్ క్రమబద్ధీకరణ, పారిశుద్ధ్యం, పార్కింగ్, కార్తీక సోమవారాల్లో లక్ష దీపోత్సవం, పుష్కరిణి హారతి, కార్తీక పౌర్ణమి సందర్భంగా జ్వాలాతోరణం, పుణ్య నదీ హారతి ఏర్పాట్లు, కార్తీక మాసంలో ఆకాశ దీపం ఏర్పాట్లు, సాంస్క్రతిక కార్యక్రమాలకు సంబంధించి ఏర్పాట్లు చేశారు.

అన్నదాన భవనంలో భక్తులకు ఉదయం 10.30 గంటల నుంచి అన్న ప్రసాదాల వితరణ చేస్తారు. సాయంత్రం 6.30 గంటల నుంచి భక్తులకు అల్ఫాహారం పంపిణీ ఉంటుంది. క్యూ కాంప్లెక్స్‌లో దర్శనం కోసం వేచి ఉన్న భక్తులకు మంచినీరు, బిస్కట్లు, అల్పాహారం పంపిణీ చేస్తారు. కార్తీక మాసంలో వచ్చే భక్తుల రద్దీని దృష్టిలో ఉంచుకుని అవసరమైన సంఖ్యలో లడ్డూ ప్రసాదాలు సిద్ధం చేస్తున్నారు. భక్తుల రద్దీకి అనుగుణంగా లడ్డూ ప్రసాదాల విక్రయ కేంద్రాల ఏర్పాటు చేస్తారు.

మరోవైపు కార్తీక పౌర్ణమి నవంబర్ 27నే అయినా.. ఆ రోజు పౌర్ణమి ఘడియలు మధ్యాహ్నం వరకే ఉన్నాయి. అందుకే ముందు రోజు 26న (రెండో ఆదివారం) ప్రదోష కాలంలో పౌర్ణమి ఘడియలు ప్రారంభం అయ్యాయి. అందుకే 26 సాయంత్రమే కృష్ణవేణీ నదీమాతల్లికి పుణ్య నదీ హారతి కార్యక్రమం నిర్వహిస్తారు. పాతాళ గంగ దగ్గర ఉన్న కృష్ణవేణి విగ్రహానికి పూజాధికాలు, సారె సమర్పిస్తారు. అదే రోజు సాయంత్రం జ్వాలాతోరణం కార్యక్రమ నిర్వహిస్తారు.