కుక్క విమానం వెనక్కి వెళ్లిపోయింది.. గోవాలో కాకుండా బెంగళూరులో ల్యాండింగ్

సాధారణంగా విమానాలు ల్యాండింగ్ అయ్యే సమయంలో ఏదైనా ఇబ్బంది ఎదురైతే.. పైలట్లు ఆ విమానాన్ని గాల్లో కొద్దిసేపు చక్కర్లు కొట్టించి ల్యాండింగ్ చేస్తారు. ఇక పరిస్థితులు అనుకూలించకపోతే ఆ ఎయిర్‌పోర్ట్‌కు సమీపంలో ఉన్న మరో ఎయిర్‌పోర్ట్‌లో ల్యాండ్ చేస్తారు. అయితే ఒక వీధి కుక్క కారణంగా ఒక విమానం ఒక విమానాశ్రయంలో కాకుండా మరో విమానాశ్రయంలో దిగాల్సిన పరిస్థితి నెలకొంది. ఎయిర్‌పోర్టులోని విమానం దిగాల్సిన రన్‌వేపై అకస్మాత్తుగా ఒక వీధి కుక్క ప్రవేశించడంతో పరిస్థితి తలకిందులైంది. దీంతో అప్రమత్తమైన అధికారులు.. విషయాన్ని పైలట్‌కు చెప్పడంతో పెద్ద ప్రమాదం తప్పింది. అయితే రన్‌వేపైకి వీధి కుక్క రావడంపై తీవ్ర విమర్శలు వెల్లువెత్తుతున్నాయి.

బెంగళూరులోని కెంపెగౌడ ఇంటర్నేషనల్ ఎయిర్‌పోర్టు నుంచి గోవాలోని డాబోలిమ్ ఎయిర్‌పోర్టుకు విస్తారా ఎయిర్‌లైన్స్‌కు చెందిన ఒక విమానం బయల్దేరింది. ఈ క్రమంలోనే గోవా ఎయిర్‌పోర్టులో ల్యాండింగ్ కావాల్సి ఉండగా.. చివరి నిమిషంలో అది వెనక్కి వెళ్లిపోయింది. డాబోలిమ్ ఎయిర్‌పోర్ట్‌లో ఆ విమానం దిగే సమయంలో ఎయిర్ ట్రాఫిక్ కంట్రోల్ అధికారులు.. ఆ రన్‌వే పైకి ఒక వీధి కుక్క చేరినట్లు గుర్తించారు. వెంటనే ఈ సమాచారాన్ని ఆ విమాన పైలట్‌కు అందించారు. ల్యాండింగ్‌కు కొద్దిసేపు వెయిట్ చేయాలని.. పైలట్‌కు ఏటీసీ అధికారులు సూచించారు. వీధి కుక్కను రన్‌వేపై నుంచి బయటికి పంపే ఏర్పాట్లు చేస్తామని చెప్పారు.

అయితే ఏటీసీ అధికారులు కొద్దిసేపు వేచి ఉండాలని చెప్పినా వాటిని ఆ విమాన పైలట్‌ మాత్రం పట్టించుకోలేదు. ఈ క్రమంలోనే ఆ విమానాన్ని వెనక్కి మళ్లించేందుకే ప్రాధాన్యం ఇచ్చినట్లు గోవా ఎయిర్‌పోర్ట్ అధికారులు తెలిపారు. దీంతో ఆ విమానాన్ని గోవాలోని డాబోలిమ్ ఎయిర్‌పోర్ట్‌లో కాకుండా ఎక్కడి నుంచి అయితే ప్రారంభమైందో అందే బెంగళూరులోని కెంపెగౌడ ఎయిర్‌పోర్టులో దించారు. ఆ తర్వాత మళ్లీ బెంగళూరు నుంచి సాయంత్రం మరోసారి గోవాకు బయల్దేరి సేఫ్‌గా ల్యాండ్‌ అయ్యింది.

ఈ ఘటనపై సదరు ఎయిర్‌లైన్స్ విస్తారా స్పందించింది. రన్‌వే ఆంక్షల కారణంగానే బెంగళూరు- గోవా విమానాన్ని దారి మళ్లించి వెనక్కి వచ్చినట్లు ట్విటర్ వేదికగా విస్తారా ఎయిర్‌లైన్స్ వెల్లడించింది. మరోవైపు.. రన్‌వేపైకి వీధి కుక్కలు రావడం అనేది చాలా అరుదుగా జరిగే ఘటన అని గోవా ఎయిర్‌పోర్ట్ అధికారులు తెలిపారు. అయితే రన్‌వేపై వీధి కుక్కను గుర్తించిన వెంటనే గ్రౌండ్ స్టాఫ్ రంగంలోకి దిగి పరిస్థితిని చక్కదిద్దినట్లు చెప్పారు. ఈ ఘటనపై విమానంలోని ప్రయాణికులతోపాటు సోషల్ మీడియాలో తీవ్ర విమర్శలు గుప్పించారు. రన్‌వే పైకి వీధి కుక్క చేరడంపై తీవ్రంగా మండిపడుతున్నారు. ఇలాంటి ఘటనలను ఉపేక్షించకూడదని సూచించారు.