జనసేన, టీడీపీ కార్యకర్తల బాహాబాహీ.. రణరంగంగా సమన్వయ కమిటీ సమావేశం

ఆంధ్రప్రదేశ్‌లో రాజకీయ పరిస్థితులు ఆసక్తికరంగా తయారవుతున్నాయి. ఇన్ని రోజులూ వైఎస్సార్ కాంగ్రెస్ పార్టీకి, తెలుగు దేశం పార్టీకి మధ్య గొడవలు జరిగితే.. ఇప్పుడు మిత్రపక్షాలైన టీడీపీకి జనసేనకు మధ్య జరగటం గమనార్హం. వచ్చే ఎన్నికల్లో కలిసి పోటీ చేసేందుకు జనసేన, తెలుగు దేశం పార్టీ పొత్తు కుదుర్చుకున్న విషయం తెలిసిందే. అయితే.. ఈ పొత్తుకు సంబంధించి నేతలు, కార్యకర్తల మధ్య సమన్వయం కోసం ఆయా నియోజకవర్గాల్లో సమన్వయ కమిటీ సమావేశాలు నిర్వహించేందుకు నాయకత్వాలు నిర్ణయించాయి. అయితే.. ఈ సమావేశాల్లో ఇరు పార్టీల కార్యకర్తల మధ్య పొసగకపోవటంతో.. గొడవలు తలెత్తుతున్నాయి. ఇరు పార్టీల నాయకుల మధ్య సత్సంబంధాలు ఉన్నా.. క్షేత్రస్థాయిలో కేడర్ మధ్య అంతగా మంచి సంబంధాలు లేకపోవటమే.. ఈ సమన్వయ కమిటీ సమావేశాలు పెట్టడానికి ప్రధాన కారణమని తెలుస్తోంది. అయితే.. ఆ సమావేశాల్లో కూడా ఇరు పార్టీల కార్యకర్తల మధ్య వాగ్వాదాలు జరుగుతూ.. విభేధాలు బయటపడుతున్నాయి.

తాజాగా కాకినాడ జిల్లా పిఠాపురంలో నిర్వహించిన భేటీలో జనసైనికలు, తెలుగు తమ్ముళ్ల మధ్య జరిగిన గొడవ ఏకంగా బాహాబాహీకి దిగే వరకు వెళ్లింది. పాత టీడీపీ కార్యాలయం వద్ద జరిగిన ఇరు పార్టీల సమన్వయ కమిటీ సమావేశం గందరగోళంగా మారింది. గత ఎన్నికల్లో మాజీ ఎమ్మెల్యే వర్మ ఓడిపోయిన నేపథ్యంలో.. ఈసారి సీటు తనకు ఇవ్వాలని నియోజకవర్గ జనసేన ఇంఛార్జి తంగెళ్ల ఉదయ శ్రీనివాస్ కోరారు. ఆ సమయంలో వర్మ కలుగజేసుకుని.. హేమాహేమీలే గత ఎన్నికల్లో ఓడిపోయారని.. అంత మాత్రాన ఈసారి అవకాశం ఇవ్వకూడదా అని వాదించారు. అయితే.. వర్మ అన్న మాటలు పవన్‌ కళ్యాణ్‌ను ఉద్దేశించే అన్నారని.. తమ అధినేతను అవమానిస్తున్నారంటూ.. సమావేశంలో పాల్గొన్న జనసైనికులు ఆందోళనకు దిగారు. దీంతో.. జనసైనకులకు తెలుగు తమ్ముళ్లకు మధ్య పరస్పర దూషణలతో ఒక్కసారిగా ఘర్షణ వాతావరణం చోటుచేసుకుంది. కుర్చీలు, బెంచీలు విసిరేసుకుంటూ బాహాబాహీకి దిగటంతో.. ప్రాంతమంతా రణరంగాన్ని తలపించింది. ఇరు పార్టీల కార్యకర్తలకు నాయకులు సర్ధిచెప్పే ప్రయత్నం చేయగా.. ఆగ్రహంతో జనసైనికులు అక్కడి నుంచి వెళ్లిపోయారు.