ఆస్పత్రి నిర్లక్ష్యంతో 450 మంది రోగులకు ఎయిడ్స్, హెపటైటిస్ ముప్పు

రోగాలను తగ్గించుకోవడానికి ఎవరైనా ఆస్పత్రికి వెళ్తారు. ప్రాణాపాయ స్థితిలో ఉన్న వారికి కూడా సరైన వైద్యం అందిస్తే బతికి బయటపడతారు. అందుకే ఆస్పత్రులను దేవాలయాలుగా, డాక్టర్లనే ప్రత్యక్ష దైవంగా కొలుస్తారు. అయితే అలాంటి ఆస్పత్రులు, డాక్టర్లు, సిబ్బంది చేసే చిన్న చిన్న నిర్లక్ష్యాలు.. రోగుల ప్రాణాల మీదికి తెస్తుంది. తాజాగా ఓ ఆస్పత్రి చేసిన నిర్వాకం వల్ల 450 మంది ప్రాణాంత వ్యాధుల బారిన పడే ప్రమాదంలో పడ్డారు. ఈ భయంకరమైన సంఘటన అమెరికాలో చోటు చేసుకుంది. అప్రమత్తమైన ఆస్పత్రి వర్గాలు చర్యలు చేపట్టింది.

అమెరికాలోని మసాచుసెట్స్‌ రాష్ట్రంలో ఉన్న సాలెం ఆస్పత్రిలో ఈ భయంకమైన విషయం వెలుగులోకి వచ్చింది. గత కొంత కాలంగా సాలెం ఆస్పత్రిలో ఎండోస్కోపీ చేయించుకుంటున్న రోగులు.. ఎయిడ్స్, హెపటైటిస్ వ్యాధుల బారిన పడే అవకాశం ఉందని తాజాగా వెల్లడి కావడం తీవ్ర కలకలం రేపుతోంది. ఎండోస్కోపీ ట్రీట్‌మెంట్‌లో భాగంగా రోగి శరీరంలోకి పంపే ట్యూబ్‌ లాంటి పరికరమే ఈ భయాందోళనలకు కారణం అయిందని సాలెం ఆస్పత్రి వర్గాలు వెల్లడించాయి. ఎండోస్కోపీ మిషన్‌కు ఉన్న లైట్, కెమెరాను.. కడుపు లోపలికి పంపించి అందులోని భాగాలను పరిశీలించి రోగ నిర్థారణ చేసేందుకు ఉపయోగపడుతుంది. అయితే ఎండోస్కోపి ట్యూబ్ ఈ ప్రాణాంతక వ్యాధులకు ఎందుకు కారణమైందనే విషయాన్ని మాత్రం ఆస్పత్రి వర్గాలు వెల్లడించలేదు.

ఎండోస్కోపీ ట్రీట్‌మెంట్ చేస్తున్న క్రమంలో నిర్వహణ తప్పిదం వల్ల రోగులు ప్రమాదకర వ్యాధుల బారిన పడే అవకాశం ఉందని సాలెం హాస్పిటల్ సిబ్బంది గుర్తించారు. ఇందులో ముఖ్యంగా 2021 జూన్ నుంచి 2023 ఏప్రిల్ వరకు రెండేళ్ల కాలంలో ఎండోస్కోపీ చేయించుకున్న 450 మంది రోగులు హెచ్ఐవీ ఎయిడ్స్, హెపటైటిస్ బీ, హెపటైటిస్ సీ వంటి ప్రాణాంతక రోగాల బారిన పడే అవకాశం ఉన్నట్లు ఆస్పత్రి తాజాగా పేర్కొనడం పెను సంచలనంగా మారింది. హై క్వాలిటీ స్టాండర్డ్స్‌తో తమ ఆస్పత్రి వైద్య సేవలు అందించకపోవడంలో విఫలం కావడం వల్లే ఇలాంటి పరిస్థితి తలెత్తిందని పేర్కొంది.

అయితే ఈ విషయాన్ని ఇప్పటికే ఆ 2 ఏళ్ల కాలంలో తమ ఆస్పత్రిలో చికిత్స చేయించుకున్న రోగులకు తెలియజేసినట్లు సాలెం ఆస్పత్రి వర్గాలు తెలిపాయి. జరిగిన భారీ తప్పిదానికి వారికి క్షమాపణలు కూడా చెప్పినట్లు పేర్కొన్నాయి. అయితే ఈ వ్యాధులు సంక్రమించే ముప్పు తక్కువే అని ఆస్పత్రి వర్గాలు చెప్పడం కొంత ఉపశమనంగా మారింది. సంబంధిత రోగులకు ఈ విషయాన్ని ఫోన్, ఈ మెయిల్ ద్వారా తెలియజేసినట్లు తెలిపింది. అయితే వారికి అప్పటినుంచి 3 పరీక్షలు క్రమంగా నిర్వహిస్తున్నామని.. అదృష్టవశాత్తు ఇప్పటి వరకు ఏ రోగి కూడా ఇన్ఫెక్షన్ల బారిన పడినట్లు నిర్థారణ కాలేదని సాలెం ఆస్పత్రి అధికార ప్రతినిధి ఒకరు వెల్లడించారు. ఈ ఘటనపై మసాచుసెట్స్ ప్రజారోగ్య విభాగం స్పందించింది. ఈ వ్యాధుల బారినపడే ముప్పు తక్కువే అని.. దీనిపై విచారణ జరుపుతున్నట్లు తెలిపింది.