ప్రాణాలు తీసిన ఫోటోల సరదా.. చెరువులో పడి ఇద్దరు మృతి
Andhra Pradesh Telugu | Suryaa Desk | Published : Mon, Nov 20, 2023, 11:53 PM
కృష్ణా జిల్లాలో విషాద ఘటన జరిగింది. ఫొటోలు తీసుకోవడానికి చెరువు దగ్గరకు వెళ్లిన ఇద్దరు స్నేహితులు ప్రమాదవశాత్తు గుంతలో పడి ప్రాణాలు కోల్పోయారు. విజయవాడ పటమటకు చెందిన ఎన్‌ శశివర్ధన్‌(15), జి అంకిత్‌(14)లు ఓ స్కూల్లో పది, తొమ్మిదో తరగతులు చదువుతున్నారు. ఫొటోలు తీసుకోవడానికి ఇద్దరూ గన్నవరం మండలం సావరగూడెం పంచాయతీ ఆధ్వర్యంలోని బాపట చెరువు వద్దకు ఆదివారం మధ్యాహ్నం వెళ్లారు.
అక్కడ ఫొటోలు తీసుకుంటుండగా ప్రమాదవశాత్తు చెరువు గుంతలో పడిపోయారు. అంతకు ముందే వారి స్నేహితులు కొందరిని అక్కడకు రావాలని చెప్పడంతో వారు అదే సమయానికి ఘటనా స్థలానికి వచ్చారు. అప్పటికే నీటిలో మునిగిపోతున్న తమ మిత్రులను చూసి వారంతా కేకలు వేయడంతో స్థానికులు.. పోలీసులకు సమాచారం ఇచ్చారు. పోలీసులు, అగ్నిమాపక సిబ్బంది ఘటనా స్థలానికి చేరుకుని మృతదేహాలను బయటకు తీశారు. కళ్ల ముందే తమ పిల్లలు అలా విగతజీవులుగా పడి ఉండటం చూసి తల్లిదండ్రులు కన్నీటి పర్యంతం అయ్యారు. ఘటనపై కేసు నమోదు చేసినట్లు పోలీసులు తెలిపారు.
|
|