బాహుబలి దున్న కంటే పెద్దది.. 150 దూడలకు జన్మనిచ్చిన దున్న

బాహుబలిలో ఉన్న దున్నను చూశారా. చూడటానికి అతి భారీగా, ఎత్తు, బలిష్ఠంగా ఉంటుంది. అలాంటి దున్నను ఆ సినిమాలో విలన్‌గా ఉన్న దగ్గుబాటి రాణా.. దాన్ని తన శక్తియుక్తులతో పడగొడతాడు. అయితే అంతటి దున్న కంటే ఈ దున్న చాలా పెద్దది. ఎందుకంటే 5.8 అడుగుల పొడవు, 1570 కిలోల బరువు ఉంది. ఇక ఇప్పటివరకు ఏకంగా 150 దూడలకు జన్మనిచ్చింది. అత్యంత అరుదైన, శ్రేష్ఠమైన ఈ దున్నను దాని యజమాని తాజాగా అంతర్జాతీయ పశు మేళాలో ప్రదర్శించాడు. అయితే దాన్ని ఏకంగా రూ.11 కోట్లకు అమ్మకానికి పెట్టడంతో వార్తల్లో నిలిచింది.

ప్రస్తుతం రాజస్థాన్‌లోని అజ్మీర్‌లో జరుగుతున్న ఇంటర్నేషనల్ యానిమల్ మేళాలో ఓ దున్న స్పెషల్ అట్రాక్షన్‌గా నిలిచింది. 8 ఏళ్ల వయసు.. 5.8 అడుగుల పొడవు.. 1570 కిలోల బరువు ఉన్న అరుదైన, శ్రేష్ఠమైన దున్నను దాని యజమాని ఏకంగా రూ.11 కోట్లకు అమ్మకానికి పెట్టాడు. హర్యానాలోని సిర్సా ప్రాంతానికి చెందిన హర్విందర్ సింగ్‌.. ఈ బాహుబలి దున్నను తన సొంత బిడ్డలాగా పెంచాడు. ఆ దున్నకు అన్మోల్‌ అని పేరు కూడా పెట్టాడు.

ఆ అన్మోల్ దున్నకు నిత్యం హర్విందర్ సింగ్‌ పౌష్ఠికాహారాన్ని అందిస్తాడు. ప్రతీ రోజు అరటి పండ్లు, గుడ్లు సహా బలమైన ఆహారం తినిపిస్తాడు. గత సంవత్సరం 1400 కిలోల బరువున్న ఈ అన్మోల్ దున్న ప్రస్తుతం 1570 కిలోలకు చేరుకుంది. ఇక దీని వీర్యం వల్ల ఇప్పటి వరకు 40 నుంచి 50 కిలోల బరువు ఉన్న 150 దూడలు జన్మించాయని దాని యజమాని హర్విందర్ సింగ్ తెలిపాడు. ఆ దూడలన్నీ ఆరోగ్యవంతంగా జన్మించాయని వెల్లడించాడు. అయితే ఈ అన్మోల్ దున్న తినే ఆహారం కోసం తాను ప్రతీ నెల సుమారు రూ. 3 లక్షలు ఖర్చు చేస్తున్నట్లు చెప్పాడు.

అజ్మీర్‌లో జరుగుతున్న అంతర్జాతీయ పుష్కర్ మేళాకు హర్విందర్ సింగ్‌ ఈ అన్మోల్ దున్నను తీసుకెళ్లాడు. ఈ అరుదైన, బలిష్ఠంగా ఉన్న ఆ దున్నను రూ.11 కోట్లకు అమ్ముతానని విక్రయానికి పెట్టాడు. అయితే గత సంవత్సరం అదే దున్నను రూ. 3 కోట్లకు కొనేందుకు ఓ వ్యక్తి ఆసక్తి చూపాడు. అయినప్పటికీ దాన్ని రూ.3 కోట్లకు విక్రయించడానికి నిరాకరించిన హర్విందర్ సింగ్ తాజాగా మరోసారి మేళాకు తీసుకువచ్చాడు. తన వద్ద ఉన్న అన్మోల్ దున్న చాలా విలువైందని.. దాన్ని కొనేందుకు రూ.11 కోట్లు ఖర్చు పెట్టే వారి కోసం ఎదురుచూస్తున్నట్లు చెప్పాడు.