నాతో పాటూ కుటుంబానికి ప్రాణహాని: యూట్యూబర్ నాని

విశాఖ ఫిషింగ్‌ హార్బర్‌లో అగ్నిప్రమాదం ఘటన మరో మలుపు తిరిగింది. ఈ ఘటనలో అనుమానితుడిగా ఉన్న యూట్యూబర్‌ లోకల్‌బాయ్‌ నాని.. హైకోర్టును ఆశ్రయించారు. . విశాఖ ఫిషింగ్ హార్బర్ లో బోట్లు కాలిపోయిన ఘటనలో పోలీసులు తనను మూడు రోజుల పాటు అక్రమంగా నిర్బంధించారంటూ హైకోర్టులో హెబియస్ కార్పస్ పిటిషన్ దాఖలు చేశారు నాని కుటుంబ సభ్యులు. అయితే ఏపీ హైకోర్టు ఈ పిటిషన్‌పై విచారణను వచ్చే సోమవారానికి వాయిదా వేసింది. నాని కూడా కోర్టుకు హాజరయ్యారు.

విశాఖ హార్బర్ ఘటనలో తాను ఏ తప్పు చేయలేదంటున్నారు నాని. హార్బర్ ఘటనలో తన ప్రమేయం లేదంటున్నారు. ఈ ఘటన జరిగిన రోజు ( నవంబర్19) రాత్రి తాను వేరే ప్రాంతంలో స్నేహితులకు పార్టీ ఇచ్చానన్నారు. తనకు ప్రమాదం జరిగిన తర్వాత ఫోన్ వచ్చిందని.. ఆ వెంనటే తాను ప్రమాదం జరిగిన ప్రాంతానికి వెళ్లానన్నారు. ఇదంతా సీసీ కెమెరాల్లో రికార్డ్ అయ్యిందని.. తాను పార్టీలో డ్రింక్ చేసి ఉన్నానన్నారు. డ్రింక్ చేసి తాను ప్రమాదం జరిగిన సమయంలో సేవ్ చెయ్యలేకపోయానని.. గంగ పుత్రులకు సహాయం అందుతుందనే ఘటన జరిగిన ప్రాంతంలో వీడియో తిసి యూట్యూబ్‌లో అప్‌లోడ్ చేసినట్లు చెప్పుకొచ్చారు.

తనకు డబ్బులు వస్తాయని వీడియో తీయలేదని.. అలా తీసిన వీడియోను కొద్దిసేపటి తర్వాత పోస్ట్ చేసినట్లు చెప్పుకొచ్చాడు. ఆ తర్వాత క్రైమ్ పోలీసులు ఫోన్ చేసి విచారణకు పిలిచారని.. చిన్న ఎంక్వైరీ అని తీసుకుని వెళ్ళి తన దగ్గర ఉన్నవన్నీ తీసుకున్నారని ఆరోపించారు. ఎందుకు ఆ పని చేశావ్ అని కొట్టారని.. బోట్లు తానే తగల పెట్టానంటూ తనను కొట్టినట్లు చెప్పుకొచ్చారు. తాను ఏమీ చేయలేదని ఏడ్చానని.. అయినా సరే తానే చేశానంటూ పోలీసులు తిట్టారన్నారు. ప్రమాదం జరిగిన సమయంలో తాను ఎక్కడ ఉన్నానో కుడా సీసీ కెమెరాలో రికార్డు అయ్యిందన్నారు.

ఇవన్నీ చూసిన తర్వాత కూడా పోలీసులు 'నీ ఫ్రెండ్స్ తో నువ్వే చేశావ్' అని పోలీసులు అంటున్నారని..మరో నలుగురు అమాయకులను కూడా పోలీసులు ఇబ్బంది పెడుతున్నారన్నారు. తాను కోర్టుకి రాకపోతే ఏదో చేసేసే వారని.. తాను చెయ్యకుండానే తానే చేసినట్లు క్రియేట్ చేస్తున్నారన్నారు. హైకోర్టులో పిటిషన్ వెయ్యగానే తనను బెదిరించారని.. హైకోర్టులో న్యాయం జరుగుతుందనే నమ్మకం ఉందన్నారు. విశాఖ వెళ్లిన తర్వాత తనపై దాడి చేసే అవకాశం ఉందని.. తన అన్నపై దాడి చేశారని.. రాళ్లతో కొట్టారన్నారు. తనకు, తన కుటుంబ సభ్యులకు ప్రాణహాని ఉందని.. గంగ పుత్రులు నిజా నిజాలు తెలుసుకోవాలన్నారు.

ఈ ఘటన ఎలా జరిగిందో, అందులో తన పేరు ఎందుకు వినిపిస్తుందో తెలియడంలేదని ఆవేదన వ్యక్తం చేశారు నాని. కొంతమంది గంగపుత్ర సోదరులు కూడా తనపై నిరాధార ఆరోపణలు చేయడం బాధించిందన్నారు. తన మత్స్యకార సోదరులకు, చిన్న చిన్న యూట్యూబర్లకు దండం పెట్టి చెబుతున్నానని.. తన జీవితాన్ని నాశనం చేయొద్దని కోరారు. ఈ కేసులో అందరూ తననే టార్గెట్ చేశారని.. తనకు రాజకీయాలతో సంబంధం లేదన్నారు. తాను ఏ పార్టీకి సపోర్ట్ చేయడం లేదన్నారు. ఈ కేసులో నిజాలను వెలికి తీసి తనను కాపాడాలని కోరారు. మరోవైపు నాని బీజేపీ ఎంపీ జీవీఎల్‌ను కలిశారు.. తను తప్పు చేయలేదంటూ ఆవేదన వ్యక్తం చేశారు. నాని తప్పు చేసినట్లు ఎలాంటి ఆధారాలు లేకుంటే ఎందుకు అక్రమంగా కస్టడీలో ఉంచుకున్నారంటూ పోలీసులను జీవీఎల్ ప్రశ్నించారు.

ఈ నెల 19న ఫిషింగ్‌ హర్బర్‌లో ఒక్కసారిగా మంటలు చెలరేగాయి. ఈ ప్రమాదంలో 49 బోట్లు తగలబడిపోయాయి. ఈ అగ్నిప్రమాద ఘటనలో యూట్యూబర్ లోకల్ బాయ్ నానిని అదుపులోకి తీసుకున్న సంగతి తెలిసిందే. ఆ తర్వాత ఈ అగ్ని ప్రమాదానికి నానియే కారణం అంటూ ప్రచారం జరిగింది. అతడు యూ ట్యూబ్‌లో లోకల్ బాయ్ నానిగా గుర్తింపు పొందారు.. సముద్రంపై వేటకు వెళ్లి.. వలకు పడిన చేపల వీడియోలను యూట్యూబ్‌లో అప్‌లోడ్‌ చేస్తుంటారు.