తిరుమల శ్రీవారి నడకదారిలో గుండెపోటుతో డీఎస్పీ మృతి
Andhra Pradesh Telugu | Suryaa Desk | Published : Sat, Nov 25, 2023, 06:39 PM
తిరుమల శ్రీవారి మెట్టు మార్గంలో ఇంటెలిజెన్స్ డీఎస్పీ కృపాకర్‌ గుండెపోటుతో మృతి చెందారు. 1,805వ మెట్టు వద్ద గుండెపోటుతో ఆయన కుప్పకూలారు. తిరుపతి రూయా ఆసుపత్రికి తరలించేలోపే ప్రాణాలు కోల్పోయారు. కృపాకర్‌ స్వస్థలం విజయవాడ సమీపంలోని పోరంకి కాగా.. ప్రధాని నరేంద్ర మోదీ పర్యటనకు సంబంధించి భద్రతా విధుల నిమిత్తం కృపాకర్‌ తిరుమలకు వచ్చారు. ఈ ఘటనపై ఆయన కుటుంబ సభ్యులకు పోలీసులు సమాచారం ఇచ్చారు.
మరోవైపు ప్రధాన మంత్రి నరేంద్ర మోదీ ఈ నెల 26, 27 తేదీల్లో తిరుమల రానున్నారు. పర్యటనకు సంబంధించిన ఏర్పాట్లపై విజయవాడ సీఎస్ క్యాంపు కార్యాలయం నుంచి సీఎస్ జవహర్‌రెడ్డి వీడియో కాన్ఫరెన్స్‌ ద్వారా సంబంధిత శాఖల అధికారులతో సమన్వయ సమావేశం నిర్వహించారు. ప్రధాని నరేంద్ర మోదీ ఈ నెల 26వ తేదీ సాయంత్రం వాయుసేన విమానంలో తిరుపతి విమానాశ్రయానికి చేరుకుని తదుపరి తిరుమల వెళ్లి రాత్రి బస చేస్తారన్నారు.
ప్ఱధాని 27వ తేదీ ఉదయం వెంకటేశ్వరస్వామి వారిని దర్శించుకున్న అనంతరం తిరుపతి నుంచి హైద్రాబాద్‌ బయలుదేరి వెళతారన్నారు. ప్రధాని పర్యటనకు సంబంధించి కట్టుదిట్టమైన విస్తృత, పటిష్ఠమైన ఏర్పాట్లు చేయాలని సంబంధిత శాఖల అధికారులను సీఎస్ ఆదేశించారు. 27వ తేదీ ఉదయం తిరుమలతో స్వామి వారిని దర్శించుకునే సమయంలో వీవీఐపీల పర్యటనల నిబంధనల ప్రకారం అవసరమైన పక్కా ఏర్పాట్లు చేయాలని టీటీడీ ఈవోని ఆదేశించారు.
|
|