టీడీపీ సీనియర్ నేత ధూళిపాళ్ల నరేంద్రకు ఏపీ హైకోర్టులో బిగ్ రిలీఫ్

టీడీపీ సీనియర్ నేత, సంగం డెయిరీ ఛైర్మన్‌ ధూళిపాళ్ల నరేంద్రకుమార్‌తోపాటు మరో 14 మందికి హైకోర్టులో ఊరట లభించింది. చేబ్రోలు పోలీసులు నమోదు చేసిన హత్యాయత్నం కేసులో వారికి ముందస్తు బెయిలు మంజూరు చేస్తూ హైకోర్టు న్యాయమూర్తి జస్టిస్‌ టి మల్లికార్జునరావు శుక్రవారం ఉత్తర్వులిచ్చారు. ఈ కేసులో నిందితులుగా ఉన్నవారు వారంలోగా ఎస్‌హెచ్‌వో ముందు లొంగిపోవాలని, అనంతరం పూచీకత్తులు తీసుకొని బెయిలుపై విడుదల చేయాలని అధికారులను ఆదేశించారు. మూడు నెలలపాటు ప్రతి ఆదివారం ఏదో ఒక సమయంలో ఎస్‌హెచ్‌వో ఎదుట హాజరుకావాలని పిటిషనర్లకు షరతు విధించారు న్యాయమూర్తి.

తనపై దాడి చేశారని రాము అనే వ్యక్తి ఫిర్యాదుతో గుంటూరు జిల్లా చేబ్రోలు పోలీసులు ధూళిపాళ్ల నరేంద్రతోపాటు పలువురిపై హత్యాయత్నం, ఇతర సెక్షన్ల కింద ఇటీవల కేసు నమోదు చేసిన సంగతి తెలిసిందే. ఈ కేసులో నరేంద్రతో పాటూ మిగిలిన వారు ముందస్తు బెయిలు కోసం హైకోర్టును ఆశ్రయించారు. రాజకీయ కారణాలతోపాటు సంగం డెయిరీ ప్రతిష్టను దిగజార్చేందుకే పిటిషనర్లపై తప్పుడు కేసు నమోదు చేశారని.. వారికి బెయిలు మంజూరు చేయాలని లాయర్లు వాదించారు. ఈ వాదనలను పరిగణనలోకి తీసుకున్న న్యాయమూర్తి.. పిటిషనర్లకు బెయిలు మంజూరు చేశారు.

ద్వారకామయి మిల్క్‌ డెయిరీ ఫామ్‌ ఫిర్యాదుదారుడికి చెందినది కాదంటున్న పిటిషనర్ల వాదనను తిప్పికొట్టేలా పోలీసులు ఎలాంటి ఆధారాలను కోర్టు ముందు ఉంచలేదన్నారు. బకాయిలు రాబట్టుకునేందుకు ఫిర్యాదుదారుడు చట్టపరమైన మార్గంలో కాకుండా 40మందితో కలిసి సంగం డెయిరీ ముందు ఎందుకు నిరసన చేయాల్సి వచ్చిందో ప్రాసిక్యూషన్‌ వాళ్లు సరైన సమాధానం ఇవ్వలేదన్నారు. ఈనెల 15న మధ్యాహ్నం 12గంటలకు దాడి జరిగిందని పోలీసులు చెబుతున్నా.. పిటిషనర్లు కోర్టు ముందుంచిన సాక్ష్యాధారాలను బట్టి, ఆ సమయంలో ఎలాంటి ఘటన జరిగినట్లు కనిపించడం లేదన్నారు. ఈ కేసు ఇప్పటికే దర్యాప్తు తుది దశకు చేరినట్లు కనిపిస్తోందని.. పిటిషనర్లకు బెయిలిస్తే దర్యాప్తునకు ఎటువంటి విఘాతం కలగదన్నారు. ఆ మేరకు బెయిలు మంజూరు చేస్తూ ఉత్తర్వులిచ్చారు.

మరోవైపు సెక్షన్‌ 91 ప్రకారం పోలీసులు జారీచేసిన నోటీసును, డెయిరీ కార్యకలాపాల్లో జోక్యం చేసుకోవడాన్ని సవాలు చేస్తూ సంగం డెయిరీ హెచ్‌ఆర్‌ మేనేజరు, జనరల్‌ మేనేజరు శుక్రవారం హైకోర్టులో అత్యవసర వ్యాజ్యం దాఖలు చేశారు. దానిపై హైకోర్టు న్యాయమూర్తి జస్టిస్‌ జ్యోతిర్మయి విచారణ జరిపి, చట్టపరంగానే దర్యాప్తు చేపట్టాలని పోలీసులకు స్పష్టం చేశారు. సంగం డెయిరీ కార్యకలాపాల విషయంలో జోక్యం చేసుకోవద్దని పోలీసులను ఏపీ హైకోర్టు ఆదేశించింది. ఈనెల 15వ తేదీ సీసీటీవీ ఫుటేజ్‌ ఇవ్వాలంటూ చేబ్రోలు పోలీసులు సీఆర్‌పీసీ సెక్షన్‌ 91 ప్రకారం జారీచేసిన నోటీసుపై లోతైన విచారణ అవసరమని పేర్కొంది. పోలీసులు కోరుతున్న తేదీనాటి ఫుటేజ్‌ను భద్రపరిచి, దర్యాప్తునకు సహకరించాలని పిటిషనర్లను ఆదేశించింది.