ఉత్తరాఖండ్ రెస్క్యూ.. క్రిస్మస్ వరకూ సొరంగంలోనే కార్మికులు

ఉత్తరాఖండ్‌లోని నిర్మాణంలో ఉన్న సిల్క్యారా సొరంగం కూలి రెండు వారాలు పూర్తయినా.. కూలీలను బయటకు తీసుకొచ్చేందుకు చేస్తున్న ప్రయత్నాలకు ఏదో ఒక అడ్డు తగులుతూనే ఉంది. అంత సజావుగా సాగుతుంది.. మరి కొద్ది గంటల్లో బయటకు వచ్చేస్తారని అనుకుటుంన్న తరుణంలో ఊహించని ఆటంకాలు ఎదురవుతున్నాయి. ఆపరేషన్‌లో ప్రత్యామ్నాయాలు కొలిక్కిరావడం లేదు. మొండిగా, వేగంగా వెళ్దామంటే మరో ముప్పు ముంచుకొస్తుందేమోననే ఆందోళన. భారీ ఆశలు పెట్టుకున్న యంత్రాలేమో మోరాయిస్తున్నాయి. ఇప్పటి వరకూ చేసిన ప్రయత్నాలు విఫలం కావడంతో కార్మికులు బయటకు ఎప్పుడొస్తారనేది కచ్చితంగా చెప్పలేని పరిస్థితి. ఇందుకు మరికొన్ని వారాలు పడుతుందని, వచ్చే క్రిస్మస్ వరకూ వారు లోపల ఉండే అవకాశం ఉందని రెస్క్యూలో పాల్గొన్న నిపుణులు అంటున్నారు.

శనివారం మరోసారి ఆటంకం ఏర్పడటంతో సహాయక చర్యలు నిలిచిపోయాయి. ఉత్తరాఖండ్ సీఎం పుష్కర్ సింగ్ ధామీ మీడియా కాన్ఫరెన్స్‌లో మాట్లాడుతూ.. లోపలి చిక్కుకున్న బాధితులను తీసుకొచ్చేందుకు అందుబాటులో ఉన్న అన్ని ప్రత్యామ్నాయాలను కేంద్ర, రాష్ట్ర ప్రభుత్వాలు వినియోగిస్తున్నాయని అన్నారు. వారి దగ్గరకు చేరుకుని బయటకు తీసుకురావడానికే ప్రయత్నాలు చేస్తున్నామని ఆయన అన్నారు. ‘శిథిలాల్లో ఇరుక్కుపోయిన ఆగర్‌ యంత్రం బ్లేడ్లను కత్తిరించేందుకు ప్లాస్మా కట్టర్‌ అవసరం.. దాన్ని హైదరాబాద్‌ నుంచి విమాన మార్గంలో తీసుకొస్తున్నాం. అది వచ్చాక ఆదివారం మాన్యువల్‌ డ్రిల్లింగ్‌ను ప్రారంభించే అవకాశాలున్నాయని తెలిపారు.

అంతకు ముందు రెస్క్యూలో పాల్గొంటున్న ఆస్ట్రేలియాకు చెందిన మైక్రో టన్నల్ నిపుణుడు అర్నాల్ డిక్స్ మాట్లాడుతూ.. లోపలి చిక్కుకున్న 41 మంది కార్మికులు క్రిస్మస్ పండుగ నాటికి బయటకు వచ్చే అవకాశం ఉందన్నారు. ‘డ్రిల్లింగ్, ఆగరింగ్ ఆగిపోయింది. ఆగర్ మెషిన్ ఇంకేమీ చేయలేదు. మేము అనేక ఎంపికలను చూస్తున్నాం.. కానీ ప్రతి ఎంపికతో 41 మంది కూలీలను సురక్షితంగా తీసుకురావడమే మా లక్ష్యం.. పర్వతం మళ్లీ ఆగర్‌ను ప్రతిఘటించింది, కాబట్టి మేము మా విధానాన్ని పునరాలోచిస్తున్నాం’ అన్నారు. ఇక, కూలీలను చేరుకునేందుకు దాదాపు 60 మీటర్ల వరకు డ్రిల్లింగ్ అవసరమవుతుందని అంచనా వేశారు. దీనిలో 46.9 మీటర్ల పని ఇప్పటివరకు పూర్తయింది. శుక్రవారం పూర్తిగా పని నిలిచిపోయింది. ఆగర్‌ యంత్రం విరిగిపోయి, పూర్తిగా ధ్వంసమైంది నిపుణులు శనివారం తేల్చారు. ఇప్పుడు కూలీల ద్వారా తవ్విస్తే ఎలా ఉంటుందని యోచిస్తున్నారు. అదీ కాకుండా ఎక్కువ రోజులు నిరీక్షించాల్సి రానున్నా.. కొండ ఎగువ భాగం నుంచి నిట్టనిలువునా 86 మీటర్ల మేర కిందికి మరో సొరంగం తవ్వడమే మేలని నిపుణులు భావిస్తున్నారు. మరికొన్నిరోజుల పాటు ఓపిగ్గా నిరీక్షించక తప్పదని చెబుతున్నారు.