ఓడిపోయినవారిని పలుచన చేయకండి: చంద్రబాబు, నారా లోకేష్

తెలంగాణ అసెంబ్లీ ఎన్నికల్లో కాంగ్రెస్ పార్టీ అభ్యర్థులు ఆధిక్యంలో కొనసాగుతున్నారు. రాష్ట్రవ్యాప్తంగా ఆ పార్టీ శ్రేణులు సంబరాలు చేసుకుంటున్నారు. అయితే హైదరాబాద్‌లో గాంధీభవన్‌‌లో ఆసక్తికర సన్నివేశం కనిపించింది.. అక్కడ కాంగ్రెస్ పార్టీ శ్రేణులతో కలిసి టీడీపీ కార్యకర్తలు సంబరాల్లో పాల్గొన్నారు. ఈ క్రమంలో తెలంగాణ ఎన్నికల ఫలితాలను ప్రస్తావిస్తూ.. టీడీపీ అధిష్టానం కార్యకర్తలకు ఓ సందేశాన్ని పంపింది. తెలుగు దేశం పార్టీ అభిమానులు, నాయకులు, కార్యకర్తలు అందరికీ పార్టీ జాతీయ అధ్యక్షులు శ్రీ నారా చంద్రబాబు నాయుడు, పార్టీ జాతీయ ప్రధాన కార్యదర్శి శ్రీ నారా లోకేశ్ సందేశం. తెలంగాణ ఎన్నికల ఫలితం ఏదైనా అది తెలంగాణ రాష్ట్ర ప్రజల ఆశలు, ఆకాంక్షలకు అనుగుణంగా తెలంగాణ ప్రజల నిర్ణయం. దానిని అన్ని పార్టీల వలే మనం కూడా శిరోధార్యంగా భావించాలి. ఫలితాలను చూసి మీ మీ వ్యక్తిగత అభిప్రాయాల మేరకు గెలిచిన వ్యక్తులకు లేదా పార్టీలకు హుందాగా అభినందనలు తెలియజేయండి కానీ ఓడిపోయిన వ్యక్తులను, పార్టీలను పలుచన చేసే విధంగా వ్యాఖ్యలు చేయవద్దని విజ్ఞప్తి' చేశారు.

'ఎన్నికల్లో గెలుపు ఓటములు అనేవి సహజం. 40 సంవత్సరాలకు పైగా ప్రజాస్వామ్యంలో ఎన్నికల్లో పాల్గొని అధికార పక్షం పాత్ర అయినా, ప్రతిపక్షం పాత్ర అయినా పార్టీ పరంగా కానీ, నాయకులు, కార్యకర్తల పరంగా కానీ మనం మన పాత్రను ఎంతో హుందాగా నిర్వహించాం. తెలంగాణ ప్రజల అభిప్రాయాన్ని గౌరవిద్దాం. ఏపీలో మనం ఎదుర్కోబోయే ఎన్నికలపై దృష్టి పెడదాం.. ధన్యవాదాలు' అంటూ ట్వీట్ చేశారు. తెలంగాణ ఎన్నికల్లో టీడీపీ పోటీకి దూరంగా ఉంది.. అయితే ఏ పార్టీకి మద్దతు ఇస్తున్నట్లు ప్రకటించలేదు. అయితే టీడీపీ శ్రేణులు మాత్రం అక్కడక్కడా కాంగ్రెస్ పార్టీకి మద్దతిచ్చారనే టాక్ వినిపించింది. ముఖ్యంగా ఖమ్మం, హైదరాబాద్ వంటి ప్రాంతాల్లో టీడీపీ కార్యకర్తలు బహిరంగంగానే కాంగ్రెస్ అభ్యర్థులకు మద్దతుగా ప్రచారం చేశారు. అలాగే చంద్రబాబు అరెస్ట్ ప్రభావంతో పాటుగా.. ఆ సమయంలో కేటీఆర్ స్పందించిన తీరు కూడా తెలంగాణ ఎన్నికలపై ప్రభావం చూపిందనే వాదన వినిపించింది. కొన్ని సర్వే సంస్థలు ఈ అంశాన్ని ఎగ్జిట్ పోల్స్ సమయంలో ప్రస్తావించారు. ఇలా టీడీపీ ప్రభావం కూడా తెలంగాణలో కనిపించిందంటున్నారు. కాంగ్రెస్ విజయం ఖాయం కావడంతో టీడీపీ కార్యకర్తలు ఏకంగా హైదరాబాద్ గాంధీ భవన్‌కు వెళ్లి సంబరాలు పాల్గొన్నారు.. ఒకడుగు ముందుకు వేసి రేవంత్ రెడ్డి ముఖ్యమంత్రిని చేయాలంటూ నినాదాలు చేశారు. ఈ క్రమంలో టీడీపీ అధిష్టానం పంపిన ఈ సందేశం ఆసక్తికరంగా మారింది.