అలా అయితే భార్యతో బలవంతపు శృంగారం నేరం కాదు: అలహాబాద్ హైకోర్టు

భార్య మేజర్ అయితే.. భర్తపై వైవాహిక అత్యాచారం కేసు పెట్టలేరని అలహాబాద్ హైకోర్టు స్పష్టం చేసింది. భార్యకు 18 ఏళ్లు, అంతకంటే ఎక్కువ వయసుంటే.. ఆమెతో బలవంతంగా భర్త లైంగిక చర్యల్లో పాల్గొనడాన్ని నేరంగా పరిగణించలేమని పేర్కొంది. ఈ సందర్భంగా 15-18 ఏళ్ల మధ్య వయసుండి.. బలవంతంగా శృంగారం చేస్తేనే అత్యాచారం కిందకు వస్తుందన్న 2017లో సుప్రీంకోర్టు ఇచ్చిన తీర్పును గుర్తు చేసింది. ఈ మేరకు తన భర్త అసహజ శృంగారానికి పాల్పడుతున్నాడంటూ ఓ మహిళ పెట్టిన కేసును జస్టిస్‌ రామ్‌ మనోహర్‌ నారాయణ్‌ మిశ్రా కొట్టివేశారు.

దేశంలో వైవాహిక అత్యాచారం ఇప్పటికీ నేరం కాకపోవడంతో ఘజియాబాద్‌కు చెందిన నిందితుడు సంజీవ్ గుప్తాకు విముక్తి కల్పించారు. అయితే, వరకట్నం, క్రూరత్వం, వేధింపులకు గురిచేనందుకు ఐపీసీ సెక్షన్ 498A కింద అతడి నేరాన్ని కోర్టు ధ్రువీకరించింది. సంజీవ్ గుప్తా దాఖలు చేసిన పునఃపిటిషన్‌ను పాక్షికంగా అనుమతిస్తూ.. ఐపీసీ 377 వంటి వాటికి ఎలాంటి నిబంధన లేదని జస్టిస్ రామ్ మనోహర్ నారాయణ్ మిశ్రా అన్నారు. ఈ సందర్భంగా మధ్యప్రదేశ్ హైకోర్టు ఇటీవల వెల్లడించిన అభిప్రాయాన్ని కూడా పరిగణనలోకి తీసుకున్నారు. ఐపీసీసెక్షన్ 375 (అత్యాచారం) నిర్వచనానికి 2013 సవరణ తర్వాత భార్యాభర్తల మధ్య ఎటువంటి అసహజ నేరాలకు చోటు లేదని పేర్కొంది. భర్తతో శృంగారానికి సమ్మతి అసంబద్ధమని మధ్యప్రదేశ్ హైకోర్టు తన ఉత్తర్వుల్లో అభిప్రాయపడింది.

సంజీవ్ గుప్తాపై 2013లో భార్య ఫిర్యాదుపై వరకట్న వేధింపుల సహా వివిధ ఐపీసీ సెక్షన్ల కింద ఎఫ్‌ఐఆర్ నమోదయ్యింది. అయితే, విచారణ అనంతరం ఘజియాబాద్‌లోని ట్రయల్ కోర్టు అతడిని పైన పేర్కొన్న సెక్షన్ల కింద దోషిగా నిర్ధారించింది. సెషన్స్ కోర్టు కూడా ట్రయల్ కోర్టు ఉత్తర్వులను సమర్దించింది. దీంతో ఆయన హైకోర్టులో ప్రస్తుత రివిజన్ పిటిషన్‌ను దాఖలు చేశారు. ఈ నేపథ్యంలో IPC సెక్షన్లు 323, 498-ఏ కింద అభియోగాలకు సంబంధించి అప్పిలేట్ కోర్టు నమోదు చేసిన నేరాన్ని గుర్తించడంలో వాస్తవం లేదా చట్టపరమైన లోపం లేదని కోర్టు పేర్కొంది.

అయితే, సెక్షన్ 377 ప్రకారం నేరారోపణకు సంబంధించి దేశంలో వైవాహిక అత్యాచారం ఇంకా నేరంగా పరిగణించబడలేదని కోర్టు అభిప్రాయపడింది. కానీ, వైవాహిక అత్యాచారాన్ని నేరంగా పరిగణించాలని కోరుతూ సుప్రీంకోర్టులో కొన్ని పిటిషన్లు పరిశీలన కోసం పెండింగ్‌లో ఉన్నాయని, అయితే ఆ పిటిషన్లపై ఏదైనా నిర్ణయం వచ్చే వరకు భార్య 18 ఏళ్లు లేదా అంతకంటే ఎక్కువ వయస్సు ఉన్న వైవాహిక అత్యాచారానికి ఎటువంటి క్రిమినల్ శిక్ష లేదని కోర్టు పేర్కొంది. ఈ కేసులోని వైద్య నివేదిక అసహజ శృంగారం ఆరోపణలకు విరుద్దంగా ఉందని స్పష్టం చేసింది. కాబట్టి నిందితుడి చర్యను నేరంగా పరిగణించలేమని పేర్కొంటూ తీర్పు వెలువరించింది.