బస్సు ప్రయాణికులకు గుడ్‌న్యూస్.. ఇక నుంచి వాట్సాప్‌లోనే టికెట్ బుకింగ్

మనం ఇప్పటివరకు బస్సు టికెట్లను కేవలం కండక్టర్ల వద్దనే తీసుకుంటాం. మరికొందరు ఆన్‌లైన్‌లో అడ్వాన్స్‌ బుకింగ్ చేసుకుని ప్రయాణాలు చేస్తూ ఉంటారు. అయితే త్వరలోనే కొత్త విధానం అందుబాటులోకి రానుంది. మన చేతిలో ఉన్న సెల్‌ఫోన్‌లోని వాట్సాప్ ద్వారా బస్ టికెట్లు కొనుగోలు చేసే విధానాన్ని ప్రభుత్వం ప్రవేశపెట్టనుంది. దీంతో ప్రయాణికులకు సులభమైన, సుఖవంతమైన ప్రయాణాలను కల్పించాలని సంకల్పించింది. అయితే ఈ విధానం మాత్రం మన దగ్గర కాదు. దేశ రాజధాని ఢిల్లీలో ఈ తరహా విధానాన్ని తీసుకురావాలని అరవింద్ కేజ్రీవాల్ నేతృత్వంలోని ఆమ్ ఆద్మీ పార్టీ సర్కార్ యోచిస్తోంది.

బస్సు ప్రయాణీకులకు మరింత సౌకర్యవంతమైన ప్రయాణాల కోసం ఢిల్లీ ప్రభుత్వం ఓ కీలక నిర్ణయం తీసుకునేందుకు రంగం సిద్ధం చేసింది. వాట్సాప్‌ ద్వారా బస్సు టికెట్లు జారీ చేసే అంశాన్ని అరవింద్ కేజ్రీవాల్ ప్రభుత్వం అధ్యయనం చేస్తోంది. ఢిల్లీ మెట్రో రైల్‌ కార్పొరేషన్‌ (డీఎంఆర్‌సీ) ఇప్పటికే వాట్సాప్‌ ద్వారా మెట్రో రైలు టికెట్లను అందిస్తోంది. అయితే అదే తరహాలో బస్సు ప్రయాణికులకు కూడా టికెట్లు ఇచ్చేలా విధానాన్ని తీసుకురావాలని ఢిల్లీ నగర రవాణా శాఖ అధికారులు యోచిస్తున్నారు. వాట్సాప్‌ ద్వారా మెట్రో రైల్ టికెట్లను బుక్‌ చేసుకునే సదుపాయాన్ని ఢిల్లీ మెట్రో రైల్‌ కార్పొరేషన్‌ 2023 మేలో కొన్ని మార్గాల్లో ప్రారంభించింది. అయితే ఈ వాట్సాప్‌ టికెట్‌లకు ప్రయాణికుల నుంచి మంచి ఆదరణ లభించటంతో.. మరిన్ని మార్గాలకు కూడా ఈ విధానాన్ని ఢిల్లీ మెట్రో రైల్ కార్పొరేషన్ విస్తరించింది. అయితే వాట్సాప్‌ ద్వారా కొనుగోలు చేసే టికెట్ల సంఖ్యపై పరిమితి విధించింది. త్వరలోనే బస్సు టికెట్లను కూడా వాట్సాప్‌లో జారీ చేస్తామని ఢిల్లీ రవాణా శాఖ అధికారులు తెలిపారు. అయితే వాట్సాప్‌ ద్వారా కొనుగోలు చేసిన టికెట్‌ను రద్దు చేసుకునే అవకాశాన్ని మెట్రో అధికారులు కల్పించలేదు. క్రెడిట్‌, డెబిట్‌ కార్డు ద్వారా చెల్లింపులు చేస్తే.. మార్జినల్ కన్వీనియన్స్ ఫీజును వసూలు చేస్తున్నారు. అదే యూపీఐ ద్వారా చేసే పేమెంట్స్‌కు మాత్రం ఎలాంటి ఎక్స్‌ట్రా ఛార్జీలు లేవు.