పోలవరం ప్రాజెక్ట్‌ విషయంలో కేంద్రానికి చుక్కెదురు.. నో చెప్పిన సుప్రీం కోర్టు
Andhra Pradesh Telugu | Suryaa Desk | Published : Tue, Dec 12, 2023, 08:52 PM
సుప్రీం కోర్టులో పోలవరం ప్రాజెక్టు వ్యయం విషయంలో కేంద్రానికి చుక్కెదురైంది. ఈ విషయంలో కేంద్రం తన వాదనలు సంబంధిత రాష్ట్ర హైకోర్టులోనే వినిపించాలని సూచించింది. పోలవరం జాతీయ ప్రాజెక్టు అయినందున దాని నిర్మాణ వ్యయం మొత్తాన్ని కేంద్రమే భరించాలంటూ మాజీ ఎంపీ కేవీపీ రామచంద్రరావు ఉమ్మడి రాష్ట్ర హైకోర్టులో పిటిషన్‌ దాఖలు చేసిన సంగతి తెలిసిందే. అయితే ఆ పిటిషన్‌ను ఢిల్లీ హైకోర్టుకు బదిలీ చేయాలంటూ కేంద్రం 2019లో సుప్రీంకోర్టులో పిటిషన్‌ దాఖలు చేసింది.
సోమవారం ఈ పిటిషన్‌ విచారణకు వచ్చింది.ఈ పిటిషన్‌ను ఢిల్లీ హైకోర్టుకు బదిలీ చేయాలని కేంద్ంర తరఫు లాయర్ ప్రధాన న్యాయమూర్తి జస్టిస్ డీవై చంద్రచూడ్‌, జస్టిస్ జేబీ పార్థీవాలా, జస్టిస్ మనోజ్‌ మిశ్రలతో కూడిన త్రిసభ్య ధర్మాసనానికి విన్నవించారు. పోలవరంపై ఇతర పిటిషన్లు ఏపీ హైకోర్టులో ఉన్నాయని కేవీపీ తరఫు లాయర్ తెలిపారు. ఈ దశలో జోక్యం చేసుకున్న ధర్మాసనం ఏపీ హైకోర్టులో ఇందుకు సంబంధించిన ఇతర పిటిషన్లు ఉన్నప్పుడు ఈ వ్యాజ్యం ఢిల్లీ హైకోర్టులో ఎందుకు అని ప్రశ్నించింది. ఆ రాష్ట్ర హైకోర్టులోనే వాదనలు వినిపించుకోవాలని సూచిస్తూ పిటిషన్‌ను కొట్టివేసింది.
|
|