వైఎస్సార్‌సీపీలో మొదలైన సీట్ల పంచాయితీ,,,,అద్దంకిలో మాజీ ఇంఛార్జ్ కీలక సమావేశం

వైఎస్సార్‌సీపీలో సీట్ల పంచాయితీ మొదలైంది.. కొన్ని నియోజకవర్గాల్లో కార్యకర్తల్లో తిరుగుబాటు మొదలైంది. నియోజకవర్గాలకు కొత్త సమన్వయకర్తల నియామకంతో భగ్గుమంది. అద్దంకి, మంగళగిరి, సూళ్లూరుపేటలో రగడ మొదలైంది. బాపట్ల జిల్లా అద్దంకిలో నియోజకవర్గ ఇంఛార్జ్‌ మార్పుపై బాచిన వర్గం భగ్గుమంంది. స్థానికులను పక్కనపెట్టి ఎక్కడి నుంచో ఎవరినో ఎలా తీసుకొస్తారని వైఎస్సార్‌సీపీ కార్యకర్తలు ప్రశ్నించారు. ఈ నియామకంపై పునరాలోచించుకోవాలని.. హనిమిరెడ్డికి మద్దతిచ్చేది లేదన్నారు. అద్దంకిలో జరిగిన వైఎస్సార్‌సీపీ నేతలు, కార్యకర్తల సమావేశానికి మాజీ సమన్వయకర్త బాచిన కృష్ణచైతన్య హాజరయ్యారు. చైతన్య స్వతంత్రంగా పోటీచేస్తే తమ మద్దతు ఆయనకేనని కార్యకర్తలు తెలిపారు. ఎన్నికలకు ఇంకా నాలుగు నెలల సమయం ఉందని.. అద్దంకి నుంచే పోటీచేస్తానని తేల్చి చెప్పారు కృష్ణ చైతన్య. ఇన్నాళ్లూ నియోజకవర్గంలో పార్టీ బలపడితే చాలనుకున్నానని.. తన సొంతవారిని కాదని కొత్తగా పార్టీలోకి వచ్చినవారికి పదవుల్లో ప్రాధాన్యమిచ్చామన్నారు.

సొంత మనుషులకు అన్యాయం చేశామని.. తనను క్షమించాలని కన్నీరు పెట్టుకున్నారు. పార్టీ ఆవిర్భావం నుంచి నమ్ముకుని ఉన్నామని.. నియోజకవర్గంలో నాయకులు, కార్యకర్తల అభిప్రాయాలను సీఎం జగన్‌ గౌరవించాలన్నారు చైతన్య తండ్రి బాచిన చెంచుగరటయ్య. తమకే టికెట్‌ వస్తుందన్న నమ్మకం ఉందన్నారు.. అధిష్టానం కూడా మరోసారి ఆలోచన చేయాలని కోరారు. మంగళగిరిలో ఎమ్మెల్యే పదవికి రాజీనామా చేసిన ఆళ్ల రామకృష్ణారెడ్డితో ఆయన నివాసంలోనే వైఎస్సార్‌సీపీ కార్యకర్తలు భేటీ అయ్యారు. వచ్చే ఎన్నికల్లో కచ్చితంగా పోటీ చేయాలని పట్టుబట్టారు. అయితే పోటీ చేయకూడదని నిర్ణయించుకున్నానని.. హైదరాబాద్‌కు వెళ్లొచ్చాక మరోసారి సమావేశమై చర్చిద్దామన్నారు. తన రాజీనామాకు కారణాలను రెండు రోజుల్లో వెల్లడిస్తానని.. ఆ వివరాలను జనంలోకి తీసుకువెళ్లాలన్నారు. గత మూడు నెలలుగా నియోజకవర్గంలో ఒక్క పనీ చేయలేకపోయాననే బాధతో రాజీనామా చేశానని చెప్పినట్లు తెలుస్తోంది.

మరోవైపు తనకు మద్దతునివ్వాలని కోరేందుకు మంగళగిరి వైఎస్సార్‌సీపీ ఇంఛార్జ్ గంజి చిరంజీవి ఆర్కే నివాసానికి వెళ్లారు. అప్పటికే ఆళ్ల తన కార్యకర్తలతో సమావేశాన్ని ముగించుకుని పై అంతస్తులోకి వెళ్లిపోయారు. ఆయన్ను కలవాలని సహాయకులను చిరంజీవి కోరగా.. ఆర్కే భోజనం చేస్తున్నారని చెప్పారు. అరగంటకు పైగా అక్కడే వేచి చూసిన చిరంజీవి.. ఎంతకీ ఆర్కే రాకపోవడంతో అక్కడి నుంచి వెళ్లిపోయారు. మరి ఆర్కే ఎలాంటి నిర్ణయం తీసుకుంటారన్నది ఆసక్తికరంగా మారింది. మరోవైపు సూళ్లూరుపేటలో కూడా రగడ మొదలైంది. కిలివేటీ సంజీవయ్యకు వ్యతిరేకంగా మరో వర్గం సమావేశమైంది. పార్టీ కోసం పనిచేసినవారిని ఎమ్మెల్యే సంజీవయ్య పట్టించుకోలేదన్నారు. ఆయనకు టికెట్ కేటాయించొద్దని కోరుతున్నారు. అలాగే ఇవాళ నాయుడుపేటలోని కేఎంఆర్‌ ఫంక్షన్‌ హాలులో ఎమ్మెల్యే కిలివేటి సంజీవయ్య శుక్రవారం ఆత్మీయ సమావేశం నిర్వహించనున్నారు. నియోజకవర్గంలోని ఆరు మండలాల నేతలు, ప్రజాప్రతినిధులు హాజరుకావాలని ఆహ్వానించారు. మరి వ్యతిరేక వర్గం వెళుతుందా లేదా అన్నది చూడాలి.

మరోవైపు కర్నూలులో కూడా ఇదే పరిస్థితి.. వైఎస్సార్‌సీపీలో విభేదాలు భగ్గుమన్నాయి. సామాజిక సాధికార యాత్ర సన్నాహాల్లో నిర్వహించిన పార్టీ నేతలు, కార్యకర్తల సమావేశంలో... స్థానిక ఎమ్మెల్యే హఫీజ్‌ఖాన్‌, మాజీ ఎమ్మెల్యే ఎస్వీ మోహన్‌రెడ్డి వర్గీయులు వాగ్వాదానికి దిగారు. జిల్లా పార్టీ ఇంఛార్జ్, ఎమ్మెల్సీ రామసుబ్బారెడ్డి, జిల్లా అధ్యక్షుడు, కర్నూలు మేయర్‌ బీవై రామయ్యల ముందే వీరిద్దరి వర్గాలు గొడవకు దిగాయి. ఏళ్ల తరబడి పార్టీ కోసం పనిచేస్తున్నా గుర్తింపు లేదని.. జరుగుతున్న అన్యాయాన్ని ఎవరూ పట్టించుకోవడం లేదన్నారు. ఎన్నేళ్ల నుంచి పనిచేస్తున్నారు.. ఏం అన్యాయం జరిగిందని ఎమ్మెల్యే వర్గీయులు కౌంటర్ ఇచ్చారు. రామసుబ్బారెడ్డి, రామయ్య ఇరువర్గాలను సమన్వయం చేసి శాంతింపజేశారు.