ఏపీ హైకోర్టులో చంద్రబాబు బెయిల్ పిటిషన్‌పై విచారణ.. ఆ వాదనలతో ఆశ్చర్యం కలిగిందన్న లూథ్రా

మాజీ ముఖ్యమంత్రి చంద్రబాబుపై అమరావతి ఇన్నర్ రింగ్ రోడ్డు విషయంలో నమోదైన కేసులో ముందస్తు బెయిల్ పిటిషన్‌పై ఏపీ హైకోర్టులో విచారణ జరిగింది. నిర్మాణమే జరగని రింగ్‌రోడ్డు విషయంలో కుట్రకోణం ఉందని సీఐడీ చేస్తున్న వాదన ఆశ్చర్యానికి గురిచేస్తోందని చంద్రబాబు తరఫున సీనియర్‌ లాయర్ సిద్ధార్థ లూథ్రా హైకోర్టులో వాదనలు వినిపించారు. ఇన్నర్‌ రింగ్‌రోడ్డు కోసం ఒక్క ఎకరా కూడా సేకరించలేదని గుర్తు చేశారు. భూసేకరణ జరిగినట్లు ఒక్క కాగితాన్నైనా సీఐడీ ఆధారంగా చూపగలదా అని ప్రశ్నించారు. సార్వత్రిక ఎన్నికలు సమీపిస్తున్న సమయంలో రాజకీయ దురుద్దేశంతో కేసులు నమోదు చేశారన్నారు.

రింగ్‌రోడ్డు ఇప్పటికీ ఉనికిలో ఉందని భావిస్తే.. 2014 నుంచి బాధ్యులైన అధికారులను ప్రాసిక్యూట్‌ చేయాల్సి వస్తుందన్నారు. కొందరు అధికారుల తీరును లూథ్రా ప్రస్తావించారు.. అమరావతి మాస్టర్ ప్లాన్ రూపకల్పన విషయంలో సింగపూర్‌, ఏపీ ప్రభుత్వం మధ్య ఒప్పందం ఉందని గుర్తుచేశారు. నామినేటెడ్‌ పద్ధతిలో సుర్బానా జురాంగ్‌ సంస్థకు పనులు అప్పగించారన్న సీఐడీ ఆరోపణలో వాస్తవం లేదన్నారు. అలాగే లింగమనేని సంస్థ యాజమాన్యానికి కంతేరు, నంబూరు గ్రామాల పరిధిలో పూర్వీకుల నుంచి వారసత్వంగా వచ్చిన భూములు ఉన్నాయన్నారు. ఈ భూముల్ని రాష్ట్ర విభజనకు ముందే.. 2012లోనే ఆ సంస్థ భూములు కొనుగోలు చేసిందన్నారు. హెరిటేజ్‌ సంస్థ పబ్లిక్‌ లిస్టెడ్‌ కంపెనీ అని చెప్పారు. 2014 మార్చి, ఏప్రిల్‌ నెలల్లో ఏపీలోనే కాకుండా దేశంలోని వివిధ ప్రాంతాల్లో భూములు కొనుగోలు చేసిందని కోర్టుకు వివరించారు. రింగ్‌రోడ్డు ఎలైన్‌మెంట్‌ మార్పు ద్వారా ప్రయోజనం పొందాలనుకుంటే వ్యక్తుల పేరుపై భూములు కొంటారు కానీ సంస్థ పేరుపై ఎందుకు కొంటారని వాదనలు వినిపించారు.

సీఆర్‌డీఏ చట్ట నిబంధనలను ఉల్లంఘించారని.. ఆ చట్టంలోని సెక్షన్‌ 146 కింద పిటిషనర్‌ ప్రాసిక్యూషన్‌ నుంచి రక్షణ పొందలేరని అంతకుముందు సీఐడీ తరఫున ఏజీ శ్రీరామ్‌ వాదనలు వినిపించారు. రాజకీయ ప్రతీకారంతో కేసు నమోదుచేశామన్న ఆరోపణల్లో వాస్తవం లేదని.. నేర తీవ్రతను దృష్టిలో పెట్టుకొని బెయిలు పిటిషన్‌ను కొట్టేయాలని కోరారు. అయితే విచారణలో పూర్తిస్థాయి వాదనలు వినిపించేందుకు సమయం లేకపోవడంతో విచారణ సోమవారానికి వాయిదాపడింది. ఉచిత ఇసుక కేసులో ముందస్తు బెయిలు కోసం చంద్రబాబు హైకోర్టులో దాఖలుచేసిన పిటిషన్‌పై విచారణ ఇరువైపుల న్యాయవాదుల అభ్యర్థన మేరకు సోమవారానికి వాయిదా పడింది. రాజధాని అమరావతికి సంబంధించిన ఇన్నర్‌ రింగ్‌రోడ్డు, దాన్ని అనుసంధానించే రహదారుల ఎలైన్‌మెంట్‌ వ్యవహారంలో అక్రమాలు చోటుచేసుకున్నాయని మంగళగిరి వైఎస్సార్‌సీపీ ఎమ్మెల్యే ఆళ్ల రామకృష్ణారెడ్డి 2022 ఏప్రిల్‌ 27న సీఐడీకి ఫిర్యాదు చేశారు. దీని ఆధారంగా పలువురిపై సీఐడీ కేసు నమోదుచేసింది. ఈ కేసులో ముందస్తు బెయిలు కోసం చంద్రబాబు హైకోర్టును ఆశ్రయించారు.