పార్లమెంటుపై దాడికి రెండు వ్యూహాలు.. ప్లాన్ ఏ విఫలమైతే ప్లాన్ బీ.. దర్యాప్తులో సంచలన విషయాలు

పార్లమెంటులో స్మోక్ దాడి ఘటనపై ఢిల్లీ పోలీసులు దర్యాప్తును ముమ్మరం చేశారు. అత్యంత నిఘా నీడలో ఉండే పార్లమెంటులోకి చొరబడి కల్లోలం రేపిన ఈ సున్నితమైన ఘటనపై జాగ్రత్తగా అధికారులు విచారణ జరుపుతున్నారు. ఈ క్రమంలోనే నిందితులను విచారణ జరుపుతున్న పోలీసులకు సంచలన విషయాలు వెల్లడి అవుతున్నాయి. పార్లమెంటుపై దాడి చేయడానికి రెండు వ్యూహాలను నిందితులు ముందే సిద్ధం చేసుకున్నట్లు తెలిసింది. ప్లాన్ ఏ విఫలం అయితే వెంటనే ప్లాన్ బీ అమలు చేసేలా పక్కా ప్రణాళికలు సిద్ధం చేసుకున్నారు. ఈ మొత్తం వ్యవహారంలో పోలీసులు మాస్టర్‌మైండ్‌గా భావిస్తున్న లలిత్ ఝాను విచారణ జరపగా ఈ విషయాలు వెల్లడి అయినట్లు పోలీసులు తెలిపారు.

అయితే ప్లాన్ ఏ ప్రకారం నీలం కౌర్, అమోల్ షిండే పార్లమెంట్‌లోకి ప్రవేశించకలేకపోతే.. మరోవైపు నుంచి మహేశ్, కైలాష్ లోపలికి వెళ్లాలని ముందుగానే నిర్ణయం తీసుకున్నట్లు లలిత్ ఝా పోలీసుల విచారణలో వెల్లడించాడు. పొగ బాంబులను మండించి నినాదాలు చేయాలని ముందే అనుకున్నట్లు తెలిపాడు. గురుగ్రామ్‌లో ఈ ఆరుగురు నిందితులు కలిసిన విశాల్ శర్మ ఇంటికి రావడంలో మహేష్, కైలాష్ విఫలం అయినందున వారు చేయాల్సిన పనిని అమోల్ షిండే, నీలం కౌర్ ఎలాగైనా పూర్తి చేయాలని ఆదేశాలు ఇచ్చినట్లు వెల్లడించాడు. ఇదే ప్లాన్ బీ అని పోలీసులకు వివరించాడు.

ఇక పార్లమెంట్‌లో ఆరుగురు వ్యక్తులు బుధవారం తీవ్ర కలకలం రేపారు. కలర్ గ్యాస్ క్యానిస్టర్లతో మొత్తం బీభత్సం సృష్టించారు. అందులో ఇద్దరు నిందితులు లోక్‌సభ గ్యాలరీ నుంచి లోపలికి దూకి గ్యాస్‌ క్యానిస్టర్లతో పొగను విడుదల చేశారు. దీంతో ఎంపీలంతా భయాందోళనకు గురయ్యారు. వెంటనే అప్రమత్తమైన ఎంపీలు నిందితులను పట్టుకుని సెక్యూరిటీ సిబ్బందికి అప్పగించారు. మరో ఇద్దరు పార్లమెంట్ ఆవరణలో అదే రకంగా స్మోక్ దాడి చేసి అలజడి సృష్టించారు. ఈ కేసులో నలుగురు నిందితులను ఉపా (దేశ వ్యతిరేక కార్యకాలాపాల చట్టం) కింద పోలీసులు అరెస్టు చేశారు. 2001 డిసెంబర్ 13 వ తేదీన పార్లమెంట్‌పై దాడి జరిగిన రోజే మళ్లీ ఈ ఘటన జరగడం తీవ్ర చర్చకు దారి తీసింది.

మనోరంజన్‌, సాగర్‌ శర్మ, నీలమ్‌ కౌర్, అమోల్‌ షిండే, విశాల్‌, లలిత్‌, మహేశ్ అనే ఏడుగురు నిందితులు ఈ ఘటనకు పాల్పడినట్లు ఇప్పటివరకు ఢిల్లీ పోలీసులు గుర్తించారు. ఇందులో మనోరంజన్‌, సాగర్‌ శర్మ లోక్‌సభ గ్యాలరీ లోనుంచి సభలోకి చొరబడగా.. నీలమ్‌ కౌర్, అమోల్‌ షిండే పార్లమెంట్‌ ఆవరణలో నినాదాలు చేస్తూ, స్మోక్ దాడి చేశారు. ఈ నలుగురితో పాటు వీరికి ఆశ్రయం కల్పించిన గురుగ్రామ్ వాసి విశాల్‌‌ను కూడా పోలీసులు అదుపులోకి తీసుకున్నారు. మహేష్‌ను ఇప్పటికే అరెస్టు చేశారు. ఈ ఐదుగురి మొబైల్ ఫోన్స్‌తో పరారైన లలిత్ ఝా ప్రస్తుతం పోలీసుల ముందు లొంగిపోయాడు.