వైసీపీకి చెందిన సజ్జల భార్గవ్ రెడ్డి, మన్విత్ రెడ్డి సీఐడీకి టీడీపీ ఫిర్యాదు

వైఎస్సార్‌సీపీ నేతలు సజ్జల భార్గవ్ రెడ్డి, మన్విత్ రెడ్డిలపై టీడీపీ సీఐడీకి ఫిర్యాదు చేసింది. రాష్ట్రంలో కులాల మధ్య చిచ్చు పెట్టే విధంగా దళితులను తిట్టటం.. ఐటీ ఉద్యోగస్తులను నిందించటం వంటివి చేస్తున్నారని తెలుగుదేశం పార్టీ నేత వర్ల రామయ్య ఆరోపించారు. తెలుగుదేశం పార్టీపై వ్యతిరేకత వచ్చేటట్లుగా వీడియోలు చేస్తున్న మన్విత్ కృష్ణారెడ్డి.. అతడికి తెలుగుదేశం పార్టీ నాయకుడిగా వేషం వేయించిన సజ్జల భార్గవ్ రెడ్డిపై చర్యలు తీసుకోవాలని రామయ్య సీఐడీ ఎస్పీ రత్నను కలిసి ఫిర్యాదు చేశారు.

అధికారం చేజారిపోతొందని సీఎం జగన్‌మోహన్ రెడ్డికి అర్థమైందని.. ఎలా అయినా, ఎన్ని కుట్రలు, కుయుక్తులు, అరాచకాలు, దౌర్జన్యాలు చేసైనా అధికారాన్ని నిలబెట్టుకోవాలని కుట్రపూరిత ఆలోచనల చేస్తున్నారన్నారు. అందుకోసం నానా గడ్డి తినేందకైనా సిద్ధంగా ఉన్నారని.. చంద్రబాబు అధికారంలోకి రాకుండా ఉండేందుకు.. ఎన్నో అడ్డదారులు తొక్కుతున్నారన్నారు. అందులో భాగంగానే రామాల మన్విత్ కృష్ణారెడ్డి అనే కరుడుగట్టిన వైఎస్సార్‌సీపీ కార్యకర్తకు తెలుగుదేశం పార్టీ నాయకుడిగా వేషం కట్టి సోషల్ మీడియా మాద్యమాల్లోకి సజ్జల భార్గవ్ రెడ్డి వదిలారని ఆరోపించారు.

మన్విత్ రెడ్డితో తెలుగుదేశం పార్టీ నాయకుడిగా చూపిస్తూ ఎస్సీ ఎస్టీ కులాల వారిని తిట్టడం.. జగన్ రెడ్డి పాలనను పొగిడే వీడియోలను సజ్జల భార్గవ్ రెడ్డి చేయిస్తున్నారని ఆరోపించారు. కులాల మధ్య చిచ్చుపెట్టే విధంగా వీడియోలను తయారు చేయిస్తున్నారని. ప్రజల దృష్టిలో తెలుగుదేశం పార్టీని బద్నాం చేయాలని వైఎస్సార్‌సీపీ నాయకులు ఇటువంటి కుట్రలు పన్నుతున్నారన్నారు. సంబంధిత విడియో క్లిప్పింగ్స్‌ను తీసుకొని సీఐడీ ప్రధాన కార్యాలయానికి వెళ్ళి సీఐడీ చీఫ్ సంజయ్‌ అందుబాటులో లేకపోవటంతో CID SP రత్నను కలిసి ఫిర్యాదు చేసినట్లు వర్ల రామయ్య తెలిపారు.

ఆ వీడియోలను చూసిన ఎస్పీ రత్న ఆశ్చర్యం వ్యక్తం చేశారన్నారు. మన్విత్ రెడ్డి ఎక్కడ దాక్కున్నా పట్టుకొని, తప్పకుండా చర్యలు తీసుకుంటామని హామీ ఇచ్చారన్నారు. సీఐడీ చీఫ్ సంజయ్‌కు ఏ మాత్రం చిత్తశుద్ధి ఉన్నా ఇటుంవంటి కుట్రలు చేస్తున్న మన్విత్ రెడ్డిని, చేయిస్తున్న సజ్జల భార్గవ్ రెడ్డిని ఈ నేలాఖరులోపు అరెస్ట్ చేసి శిక్షించాలన్ారు. వీరి వెనకున్న వారి పాత్రను బయటకు తీయాలని డిమాండ్ చేశారు. లేని పక్షంలో సాక్ష్యాధారాలతో సహా హైకోర్టుని ఆశ్రయిస్తామని.. అంతేకాకుండా గతంలో సోషల్ మీడియా కేసుల్లో తెలుగుదేశం పార్టీ వారి దగ్గర స్వాధీనం చేసుకున్న సెల్ ఫోన్‌లు, లాప్ టాప్‌లు, ఐపాడ్‌లు తదితర పరికరాలన్నీ సుప్రీం కోర్టు ఆదేశాల ప్రకారం వెంటనే వాటిని తిరిగివ్వాలని ప్రత్యేకంగా ఫిర్యాదు చేశామన్నారు.