ఆయేషామీరా హత్య కేసు.. ఏపీ హైకోర్టులో సత్యంబాబు పిటిషన్

విజయవాడలో బీఫార్మసీ విద్యార్థిని ఆయేషామీరా హత్య కేసు దర్యాప్తు పురోగతిపై నివేదిక సమర్పించాలని సీబీఐని హైకోర్టు ఆదేశించింది. ఆయేషామీరా హత్య కేసు విచారణ నిమిత్తం.. తమ ముందు హాజరుకావాలంటూ విశాఖలోని సీబీఐ అధికారులు తనకు నోటీసులు జారీ చేయడాన్ని సవాలు చేస్తూ.. ఇదే కేసులో నిర్దోషిగా బయటపడ్డ సత్యంబాబు హైకోర్టులో పిటిషన్ దాఖలు చేయగా.. సోమవారం విచారణ జరిగింది. విచారణ కోర్టు సత్యంబాబుకు విధించిన జైలుశిక్షను ఉమ్మడి హైకోర్టు రద్దు చేస్తూ.. 2017 మార్చి 31న నిర్దోషిగా తీర్పు ఇచ్చిందని గుర్తుచేశారు లాయర్. తమ కుమార్తె హత్య కేసులో అసలు దోషులను గుర్తించి శిక్షించాలని కోరుతూ ఆయేషా తల్లిదండ్రులు మరో పిటిషన్ దాఖలు చేశారని చెప్పారు. దానిపై 2018 నవంబరు 29న విచారణ జరిపిన హైకోర్టు ధర్మాసనం కేసు దర్యాప్తును సీబీఐకి అప్పగించిందన్నారు. తాజాగా కోర్టు అనుమతి లేకుండా పిటిషనర్‌కు డీఎన్‌ఏ పరీక్షలు చేశారని.. నోటీసు ఇచ్చి వాంగ్మూలం ఇచ్చేందుకు హాజరుకావాలని కోరారని వివరించారు.

దీనిపై పూర్తి వివరాలతో కౌంటర్‌ వేసేందుకు సమయం కావాలని సీబీఐ తరఫు లాయర్ కోరారు. దర్యాప్తును సీబీఐకి అప్పగించి ఐదేళ్లు పూర్తయిందని గుర్తుచేశారు. పురోగతి ఏంటని ప్రశ్నించారు. ఇప్పుడెందుకు సత్యంబాబుకు నోటీసు జారీ చేయాల్సి వచ్చిందో చెప్పాలని ఆదేశించింది. పిటిషన్‌లో ప్రతివాదులుగా ఉన్న కేంద్ర హోంశాఖ ముఖ్య కార్యదర్శి, హైదరాబాద్‌లోని సీబీఐ కార్యాలయం, విశాఖలోని సీబీఐ అదనపు ఎస్పీకి నోటీసులు జారీ చేశారు. పూర్తి వివరాలతో నివేదిక ఇవ్వాలని ఆదేశించారు. కౌంటర్‌ వేయాలంటూ విచారణను మూడు వారాలకు వాయిదా వేసింది. ఆయేషా మీరాను విజయవాడలోని ఓ ప్రైవేటు హాస్టల్‌లో 2007 డిసెంబరు 27న దారుణంగా హత్య చేసిన సంగతి తెలిసిందే.