ప్రకాశం జిల్లాలో ఘోర రోడ్డు ప్రమాదం.. నలుగురి మృతి
Andhra Pradesh Telugu | Suryaa Desk | Published : Fri, Dec 22, 2023, 06:33 PM
ప్రకాశం జిల్లాలో జరిగిన ఘోర రోడ్డు ప్రమాదం నలుగురిని బలి తీసుకుంది. పెద్దారవీడు మండలం దేవరాజుగట్టు వద్ద ఎదురెదురుగా వస్తున్న కారు, ఆటో ఒక్కసారిగా ఢీకొన్నాయి. ఈ ఘోర దుర్ఘటనలో నలుగురు స్పాట్‌లో మృతి చెందారు. ఈ ఘటనతో బాధిత కుటుంబాల్లో విషాద ఛాయలు అలుముకున్నాయి. విషయం తెలుసుకున్న మృతుల కుటుంబ సభ్యులు, బంధువులు ఘటనా స్థలికి చేరుకుని తమ వారిని కోల్పోయామన్న బాధతో రోదిస్తున్నారు. వారి రోదనలతో ఆ ప్రాంతం అంతా మారుమోగింది. ఆటో, కారు ఢీకొన్న ప్రమాద సమాచారం అందుకున్న పోలీసులు ఘటనా స్థలానికి చేరుకున్నారు. ప్రమాదం జరిగిన తీరును పోలీసులు పరిశీలిస్తున్నారు. ఈ యాక్సిడెంట్‌ ఘటనపై కేసు నమోదు చేసుకొని దర్యాప్తు చేస్తున్నారు. ఈ ఘటనలో మరో నలుగురు వ్యక్తులకు తీవ్ర గాయాలు అయినట్లు పోలీసులు తెలిపారు. వెంటనే వారిని మార్కాపురం ప్రభుత్వ ఆస్పత్రికి తరలించి చికిత్స అందిస్తున్నారు. గాయపడిన నలుగురు వ్యక్తుల్లో ఇద్దరి పరిస్థితి విషమంగా ఉన్నట్లు డాక్టర్లు వెల్లడించారు. మృతి చెందిన వారిలో కారులో ప్రయాణిస్తున్న గుంటూరుకు చెందిన రావు నాగేశ్వరరావు, వెంకటేశ్వర్లు ఉన్నారు. ఇక ఆటోలో ప్రయాణిస్తున్న మార్కాపురం పట్టణానికి చెందిన షేక్ బాబు, ఆమని గుడిపాడుకు చెందిన ఎనిబెర అభినయ్ అక్కడిక్కడే మృతి చెందారు. ఘటనా స్థలిలో దృశ్యాలు చూస్తే ప్రమాదం జరిగిన తీరును అంచనా వేయొచ్చు. ఆటోపైకి మొత్తం కారు ఎక్కింది. ప్రమాద సమయంలో రెండు వాహనాలు అతి వేగంతో ఉన్నట్లు తెలుస్తోంది.
|
|