ఏపీ రాజకీయాల్లో కీలక పరిణామం,,,,చంద్రబాబు నివాసానికి ప్రశాంత్ కిషోర్

ఆంధ్రప్రదేశ్‌లో మరో రెండు మూడు నెలల్లో శాసనసభ ఎన్నికలు జరగనున్న వేళ.. అనూహ్య పరిణామం చోటుచేసుకుంది. హైదరాబాద్ నుంచి టీడీపీ జాతీయ ప్రధాన కార్యదర్శి నారా లోకేశ్‌తో కలిసి ఎన్నికల వ్యూహకర్త ప్రశాంత్ కిశోర్ విజయవాడకు చేరుకున్నారు. గన్నవరం విమానాశ్రయానికి చేరుకున్న వీరిద్దరూ ఒకే వాహనంలో ఉండవల్లిలోని చంద్రబాబు నాయుడి నివాసానికి బయలుదేరి వెళ్లారు. గత ఎన్నికల్లో వైఎస్సార్పీ వ్యూహకర్తగా పనిచేసిన ప్రశాంత్ కిశోర్.. ఆ పార్టీ విజయంలో కీలక పాత్ర పోషించిన విషయం తెలిసిందే. వచ్చే ఎన్నికల్లో టీడీపీ తరఫున పీకే పనిచేసే అవకాశముందనే ప్రచారం గత కొంతకాలంగా సాగుతోంది. ఈ నేపథ్యంలో చంద్రబాబు నివాసానికి పీకే వెళ్లడం ఊహాగానాలకు బలం చేకూరింది. ఈ భేటీపై అధికారిక ప్రకటన రావడమే తరువాయి అన్నట్లుగా పరిస్థితులు మారాయి. ఈ పరిణామాలపై అటు అధికార వైఎస్ఆర్సీపీ, ఇటు టీడీపీ వర్గాల్లోనూ తీవ్ర చర్చనీయాంశంగా మారింది.

యువగళం పేరిట నారా లోకేశ్ చేపట్టిన పాదయాత్ర ఇటీవల ముగిసింది. పాదయాత్ర ముగియడంతో పార్టీ ఎన్నికల సన్నద్ధతపై వివిధ స్థాయిల్లో సమావేశాలు నిర్వహిస్తున్నారు. ఎన్నికల ముందే సోషల్ మీడియాను మరింత బలోపేతం చేసేందుకు యత్నిస్తున్నారు. ఇప్పటి వరకూ టీడీపీ తరఫున రాబిన్ శర్మ ఎన్నికల వ్యూహకర్తగా ఉన్నారు. ఆయన స్థానంలో పీకే బాధ్యతలు చేపడతారని తెలుస్తోంది. రాబిన్ శర్మ సైతం పీకే టీంలోనే పనిచేశారు. కాగా, చంద్రబాబుతో భేటీ అయిన పీకే.. ఆంధ్రప్రదేశ్‌లోని రాజకీయ పరిస్థితులు, తాను చేసిన సర్వే నివేదికలను వివరిస్తున్నట్టు తెలుస్తోంది. మరోవైపు, పశ్చిమ్ బెంగాల్ సీఎం మమతా బెనర్జీ ద్వారా ప్రశాంత్ కిశోర్‌ను నారా లోకేష్ అప్పట్లోనే కలిశారు. కానీ, సొంత రాష్ట్రం బీహార్‌లో ఆయన జనసురాజ్ పేరుతో పాదయాత్ర చేస్తుండటంతో ఎన్నికల సమయంలో సేవలందిస్తానని హామీ ఇచ్చినట్టు సమాచారం.