షర్మిల వచ్చినా ఇబ్బందేమీ లేదు,,,,ఏపీ మంత్రి రోజా

చంద్రబాబుకు 175 సీట్లకు అభ్యర్థులు దొరకని పరిస్థితి ఉందన్నారు ఏపీ మంత్రి రోజా. రాష్ట్రం పరిస్థితి దేవుడు ఎరుగు.. కుప్పం నియోజకవర్గం అయినా కాపాడుకోవాలని చంద్రబాబు పర్యటనకు వస్తున్నారని ఎద్దేవా చేశారు. 14 ఏళ్లు సీఎంగా, 40 ఏళ్లుగా కుప్పం ప్రజలకు ఎలాంటి అభివృద్ధి చేయలేదని మండిపడ్డారు. కుప్పం మున్సిపాలిటీ, కుప్పం రెవెన్యూ డివిజన్‌లో వేల పెన్షన్లు, ఇళ్లు, సంక్షేమ పథకాలను ఇచ్చింది సీఎం జగన్ మాత్రమే అన్నారు. కుప్పంకు తాగే నీళ్లు కూడా వైఎస్సార్‌సీపీ ప్రభుత్వం అధికారంలోకి వచ్చిన తర్వాతే వచ్చాయన్నారు.

2024లో చంద్రబాబును కుప్పంలో ప్రజలు ఫుట్‌బాల్ ఆడతారని.. వైఎస్సార్‌సీపీ నుంచి బయటకు వెళ్తే సూసైడ్ చేసుకున్నట్లే అన్నారు. పదవులే పరమావధిగా ఉన్నవాళ్లకు పార్టీలు మారితే భవిష్యత్ ఉండదన్నారు. సీఎం జగన్ ఏపీని అభివృద్ధి చేసి చూపిస్తున్నారన్నారు. వైఎస్ షర్మిల ఆంధప్రదేశ్‌ కాంగ్రెస్ బాధ్యతలు స్వీకరిస్తారన్న ప్రచారంపైనా మంత్రి స్పందించారు. ప్రజాస్వామ్యం లో ఎవరు ఎక్కడ నుంచి కూడా పోటీ చేయొచ్చని.. షర్మిల విషయంలో కూడా ఇదే వర్తిస్తుంది అన్నారు. షర్మిల రాక వల్ల తమకు ఎలాంటి ఇబ్బంది లేదన్నారు.

శ్రీపద్మావతి మహిళ యూనివర్సిటీలో ఇంటర్ స్టేట్ యూనివర్సిటీ ఉమెన్స్ వాలీబాల్ టోర్నమెంట్‌ను మంత్రి రోజా ప్రారంభించారు. శ్రీపద్మావతి మహిళ యూనివర్సిటీకు వస్తే తన పుట్టింటికి వచ్చినట్లు అనిపిస్తుందన్నారు. మహిళలు అన్ని రంగాల్లో రాణిస్తున్నారని, ఆడ పులులు క్రీడల్లో దూసుకుపోతున్నారన్నారు మంత్రి. ‘ఆడుదాం ఆంధ్రా’ రాష్ట్ర వ్యాప్తంగా ప్రారంభించామని గుర్తు చేశారు.