ఏపీ కాంగ్రెస్‌కు మంచిరోజులొస్తున్నాయన్న మాణిక్కం ఠాగూర్

ఆంధ్రప్రదేశ్ రాజకీయాలు ఆసక్తికరంగా మారాయి. ఎన్నికలకు సమయం దగ్గరపడటంతో పార్టీలన్నీ ఫుల్ యాక్టివ్ అవుతున్నాయి. అయితే కాంగ్రెస్ పార్టీ కూడా ఏపీపై ఫోకస్ పెట్టింది.. తెలంగాణ అసెంబ్లీ ఎన్నికల్లో గెలుపు జోష్‌తో ఇక్కడ కూడా పార్టీని బలోపేతం చేయాలని భావిస్తున్నారు. ఇటీవలే ఏపీ కాంగ్రెస్ పార్టీ వ్యవహారాల ఇంఛార్జ్‌గా మాణిక్కం ఠాగూర్‌ను అధిష్టానం నియమించింది. ఆయన తాజాగా చేసిన ట్వీట్ ఆసక్తికరంగా మారింది. ఆంధ్రప్రదేశ్ కాంగ్రెస్ పార్టీకి మంచి రోజులు వస్తున్నాయంటూ ఆయన చెప్పుకొచ్చారు. దీంతో నెటిజన్లు స్పందిస్తున్నారు.. వినడానికి సంతోషంగా ఉందంటున్నారు.

మాణిక్కం ఠాగూర్ ట్వీట్ చేయడంతో.. షర్మిలకు ఆంధ్రప్రదేశ్ కాంగ్రెస్ పార్టీ బాధ్యతలు అప్పగిస్తారన్న ఊహాగానాలకు బలం చేకూరినట్లైందని కొందరు అభిప్రాయపడుతున్నారు. దీనికి తోడు ఇవాళ కీలక పరిణామాలు జరిగాయి.. ఆంధ్రప్రదేశ్ కాంగ్రెస్ నేతలు ఢిల్లీలో ఉన్నారు. ఏఐసీసీలో ఏపీలో పరిస్థితులపై కాంగ్రెస్ అధ్యక్షుడు మల్లికార్జున ఖర్గే అధ్యక్షతన కీలక సమావేశం నిర్వహిస్తున్నారు. ఈ భేటీకి రాహుల్ గాంధీ, మరికొందరు ఏఐసీసీ పెద్దలు ఏపీ నుంచి హాజరుకానున్నారు. ఏపీ అధ్యక్షుడు గిడుగు రుద్రరాజు, సుంకర పద్మశ్రీ, ఏపీసీసీ నేతలు రాష్ట్రంలో కాంగ్రెస్ పరిస్థితి, లోక్‌సభ, అసెంబ్లీ ఎన్నికల సన్నద్ధతపై చర్చించనున్నారు.

మరోవైపు వైఎస్‌ షర్మిల ఆంధ్రప్రదేశ్‌ కాంగ్రెస్‌ కమిటీ (పీసీసీ) అధ్యక్షురాలిగా నియమితురాలయ్యే అవకాశాలు ఉన్నట్లు కొద్దిరోజులుగా ప్రచారం జరుగుతోంది. తెలంగాణలో విజయంతో ఉత్సాహంతో ఉన్న కాంగ్రెస్‌ పెద్దలు ఏపీలో కూడా పార్టీ పుంజుకోవాలని భావిస్తున్నారు. దివంగత ముఖ్యమంత్రి వైఎస్‌ రాజశేఖర రెడ్డి కుమార్తె కూడా కావడంతో వైఎస్‌ షర్మిలకు పార్టీ బాధ్యతలు అప్పగించాలని భావిస్తున్నట్లు సమాచారం. మరి ఇవాళ జరిగిే సమావేశంలో షర్మిల అంశంపై నిర్ణయం తీసుకుంటారా లేదా అన్నది చూడాలి.

అంతేకాదు వైఎస్‌ షర్మిల కాంగ్రెస్‌లోకి వస్తే ఆహ్వానిస్తామని పీసీసీ అధ్యక్షుడు గిడుగు రుద్రరాజు కూడా వ్యాఖ్యానించారు. కాంగ్రెస్‌లోకి రావాలని షర్మిలను గతంలోనే ఆహ్వానించానని.. ఏపీ కాంగ్రెస్‌ అధ్యక్షురాలిగా ఆమెను నియమిస్తున్నట్లు తనకు ఎలాంటి సమాచారం లేదన్నారు. ఢిల్లీలో ఇవాళ ఆంధ్రప్రదేశ్‌ కాంగ్రెస్‌ సమన్వయ కమిటీ సమావేశం ఉందని.. ఏఐసీసీ అధ్యక్షుడు మల్లికార్జున ఖర్గే, రాహుల్‌గాంధీ, ఏఐసీసీ ప్రధాన కార్యదర్శి కేసీ వేణుగోపాల్‌, ఏఐసీసీ రాష్ట్ర వ్యవహారాల ఇంఛార్జ్ మాణిక్‌రావ్‌ ఠాక్రేలు పాల్గొనే ఈ సమావేశానికి రాష్ట్రం నుంచి 30 మంది నాయకులు హాజరవుతున్నట్లు ఆయన కూడా తెలిపారు.

కాంగ్రెస్ పార్టీ వైఎస్ షర్మిల వైపు మొగ్గు చూపడానికి చాలా కారణాలే ఉన్నాయి. వైఎస్సార్‌ కుమార్తె, అలాగే విభజనత తర్వాత సైలెంట్ అయిన నేతల్ని మళ్లీ యాక్టివ్ చేయాలని భావిస్తున్నారు. అంతేకాదు షర్మిలకు కాంగ్రెస్ బాధ్యతలు అప్పగిస్తే వైఎస్సార్‌సీపీ నుంచి కొందరు వచ్చే అవకాశాలు లేకపోలేదనే చర్చ జరుగుతోంది. షర్మిలకు కాంగ్రెస్ బాధ్యతలు అప్పగిస్తే.. ఏపీలో రాజకీయాలు ఆసక్తికరంగా మారనున్నాయి. ఓ వైపు వైఎస్ జగన్.. మరోవైపు షర్మిలలు చేరో పార్టీలో ఉంటారు. మరి చూడాలి షర్మిలకు బాధ్యతలు అప్పగిస్తారా.. అసలు ఆమె ఈ బాధ్యతల్ని చేపట్టేందుకు సిద్ధంగా ఉన్నారా లేదా అన్నది క్లారిటీ లేదు. ఇప్పటి వరకు ఆమె స్పందించలేదు.