భార్య కనిపించట్లేదని వెతుక్కుంటూ వెళితే.. తన నంబర్ 4 అని తేలింది!

తన భార్య కనిపించడంలేదూ అంటూ వెతుక్కుంటూ వెళ్లిన ఓ వ్యక్తికి ఊహించని షాక్ తగిలింది. తనను పెళ్లి చేసుకున్న పిల్లకు తాను నాలుగో భర్తనని తేలింది. రైల్లో పరిచయమైన అమ్మాయిని ప్రేమ పెళ్లి చేసుకున్నాననే సంతోషం క్షణాల్లో ఆవిరైంది. ఆమె ప్రేయసి కాదు, నిత్య పెళ్లికూతురు అని తేలింది. అవును.. అమ్మాయిలను పెళ్లి పేరుతో మోసం చేసే నిత్య పెళ్లికొడుకుల గురించి తరచూ వార్తల్లో చదివి ఉండొచ్చు. ఇప్పుడు కాలం మారిపోయింది. అబ్బాయిలను మోసం చేసే నిత్య పెళ్లికూతుళ్లు ఎక్కువైపోయారు. బాగా డబ్బు సంపాదించాలి, లగ్జరీ జీవితాన్ని అనుభవించాలి అనే కోరికలతో ఎంతకైనా తెగిస్తున్నారు. కర్ణాటకలోని దావణగెరెలో 25 ఏళ్ల ఓ యువతి ఇలాగే నలుగురు యువకులను మోసం చేసింది.

దావణగెరెకు చెందిన ప్రశాంత్ అనే యువకుడికి రెండేళ్ల కిందట రైల్లో వెళుతున్న సమయంలో మాండ్య జిల్లా పాండవపురకు చెందిన స్నేహ (25) పరిచయమైంది. ఆ పరిచయం అనతి కాలంలోనే ప్రేమగా మారింది. ప్రేమ పెళ్లి చేసుకొని దావణగెరె పట్టణంలో అద్దె ఇంట్లో కాపురం పెట్టారు. 2 నెలల కిందట తాను ప్రెగ్నెంట్ అయ్యాను, పుట్టింటికి వెళ్తున్నానని చెప్పి ఇంట్లో నుంచి వెళ్లిపోయింది. ఆ తర్వాత ప్రశాంత్ ఫోన్‌ చేసి, తిరిగి రమ్మని అడిగితే నిరాకరించింది. విసిగి, వేసారిపోయి తనే వెళ్దామనుకొని అడ్రస్ అడిగితే.. ఓ చిరునామా ఇచ్చింది. అక్కడికి వెళ్లి చూడగా.. స్నేహ అనే పేరుతో అక్కడ ఎవరూ లేరని తెలిసింది. ఊహించని పరిణామంతో ఆందోళనకు గురైన యువకుడు వెంటనే.. దావణగెరె పోలీసులను ఆశ్రయించాడు.

పోలీసుల దర్యాప్తులో విస్తుపోయే విషయాలు వెలుగులోకి వచ్చాయి. స్నేహకు అప్పటికే రెండు పెళ్లిళ్లు అయ్యాయి. ప్రశాంత్‌ మూడో భర్త అని తేలింది. ఆమె జాడ తెలుసుకుని వెళ్లే లోపు బెంగళూరుకు రఘు అనే మరో యువకుడిని పెళ్లి చేసుకుంది. అలా పెళ్లిళ్లు చేసుకుంటూ డబ్బులతో ఉడాయిస్తున్నట్లు తేలింది. స్నేహకు తొలుత పెద్దలు మహేశ్‌తో అనే యువకుడితో వివాహం చేశారు. కొన్ని నెలలకే అతణ్ని విడిచిపెట్టి బెంగళూరుకు చెందిన వెంకటేశ్‌ను రెండో పెళ్లి చేసుకుంది. అతణ్ని కూడా వదిలేసి, ప్రశాంత్‌ను పెళ్లి చేసుకుంది. ప్రశాంత్‌ పోలీసులకు ఫిర్యాదు చేయడంతో ఆ కిలాడీ లేడి బాగోతం బయటపడింది.