పెంపుడు కుక్క ఎంత పనిచేసింది? చెప్పుకోలేని బాధ

జంతువులను పెంచుకొని కొంత మంది వాటితో ఎంతో ఆనందం పొందుతారు. కొన్ని దేశాల్లో పులులు, సింహాలు, కొండ చిలువల లాంటి ప్రాణాంతక జీవులను కూడా పెంచుకునే వాళ్లు ఉన్నారు. కానీ, తేడా కొడితే సీన్ రివర్స్ అవుతుంది. ప్రాణాలే పోతాయి. ఇలాంటి ఘటనే ఒకటి ఇంగ్లాండ్‌లోని డెర్బీషైర్‌లోని చెస్టర్‌ఫీల్డ్‌లో చోటు చేసుకుంది. ప్రేమగా పెంచుకుంటున్న పెంపుడు కుక్క.. యజమానిపై దాడి చేసి, కొరకరాని చోట కొరికేసింది. ఏకంగా అతడి ఆయువుపట్టుపైనే దాడి చేసి కొరికేయడంతో రక్తమోడుతూ కుప్పకూలి విలవిల్లాడాడు. అడ్డుకోబోయిన అతడి పాట్నర్ పైనా ఆ కుక్క దాడి చేసింది. ఆ శునకం బ్రీడ్ పేరు ‘Bully Dog’ కావడం యాదృశ్చికం. ఈ జాతి కుక్కలు చాలా ఆవేశంగా ఉంటాయి.

చెప్పుకునేందుకు కూడా చాలా ఇబ్బందికరంగా ఉండటంతో ఈ ఘటన చాలా ఆలస్యంగా వెలుగులోకి వచ్చింది. అమెరికన్ XL ‘బుల్లి డాగ్’ బ్రీడ్‌కు చెందిన ఆ కుక్కలను పెంచుకోవడాన్ని అమెరికా, బ్రిటన్‌లో నిషేధించారు. 44 కిలోల బరువున్న ఆ కుక్కకు ‘ఎన్వీ’ అని పేరు పెట్టుకున్నాడు యజమాని. ఈ ఏడాది అక్టోబర్‌లో ఈ ఘటన చోటు చేసుకుంది. ‘నేను ఇంటికి వెళ్లేసరికి అతడు (బాయ్‌ఫ్రెండ్) ఫ్లోర్‌పై పడిపోయి ఉన్నాడు. అది నా *** కొరికేసిందని చెబుతూ ఆర్తనాదాలు చేశాడు. ఎన్వీ దాడి చేస్తుండటం గమనించి వెంటనే నేను దాన్ని (కుక్క) భయపెట్టేందుకు ప్రయత్నించా. అది నాపై దాడికి దిగి ముఖంపై కరిచేసింది. ఎలాగోలా దాన్ని గదిలో పెట్టి లాక్ చేయగలిగా. ఆ తర్వాత వెంటనే అంబులెన్స్‌కు కాల్ చేశా’ అని బాధితుడి పాట్నర్ లిన్సీ కెల్లీ చెప్పింది.

వైద్యులు అత్యవసర సర్జరీ చేసి బాధితుడి వృషణాలను అతికించి కుట్లు వేశారు. అతడి పురుషాంగం వద్ద 8 కుట్లు, చేతులకు 32 కుట్లు పడ్డాయని కెల్లీ తెలిపింది. ఆస్పత్రిలో చికిత్స తర్వాత అతడు నెమ్మదిగా కోలుకున్నాడని చెప్పింది. ఆ రోజు జరిగిన ఘటన గురించి మాట్లాడేందుకు ఆ జంట చాలా ఇబ్బంది పడ్డారని ‘మెట్రో’ తన వార్తా కథనంలో పేర్కొంది. కుక్క దాడిలో గాయపడ్డ కెల్లీ.. ఆ తర్వాత తీవ్రమైన ఇన్‌ఫెక్షన్‌కు గురైంది. ప్రస్తుతం తాను ఇంకా చికిత్స తీసుకుంటున్నానని ఆమె తెలిపింది. జంటపై దాడి చేసిన పెంపుడు కుక్కను అదుపులోకి తీసుకున్న అధికారులు దానికి మత్తు ఇంజెక్షన్లు ఇచ్చి అనాయాసంగా మార్చారు.

బ్రిటన్‌లో ఈ జాతికి చెందిన కుక్కల ప్రాణాంతక దాడుల పెరుగుదలతో యూకే ప్రభుత్వం సెప్టెంబరులో ఒక ప్రకటన చేసింది. డేంజరస్ డాగ్స్ యాక్ట్ 1991 ప్రకారం ఇంగ్లాండ్, వేల్స్‌లో నిషేధించిన కుక్కల జాబితాలో ఈ జాతిని చేర్చింది. కొత్త చట్టం ప్రకారం.. మినహాయింపు సర్టిఫికేట్ లేకుండా ఇంగ్లండ్, వేల్స్‌లో ఈ జాతికి చెందిన కుక్కను పెంచుకోవడం చట్టరీత్యా నేరం కాబట్టి. యజమానులు ఇలాంటి శునకాలను ప్రభుత్వానికి అప్పగించడానికి లేదా ప్రత్యేక అనుమతులు తీసుకునేందుకు ఫిబ్రవరి 1 వరకు గడువు ఉంది. ఇంతలోనే ఈ భయానక ఘటన చోటు చేసుకుంది.