విశాఖలో పంజాబ్ సీఎం.. నాలుగు రోజుల పాటూ, ఆ కోర్సు కోసం వచ్చారట

పంజాబ్ ముఖ్యమంత్రి భగవత్ సింగ్ మాన్ విశాఖలో ఉన్నారు. అదేంటి పంజాబ్ సీఎం ఇక్కడికి రావడం ఏంటి అనుకుంటున్నారా.. ఓ కారణం ఉందిలెండి. నాలుగు రోజులు మెడిటేషన్ కోర్సు కోసం వచ్చారట. ఈ సందర్భంగా పరవాడ మండలంలో ఉన్న విశాఖ ఫార్మసీ లిమిటెడ్ కంపెనీలో పర్యటించారు. పంజాబ్ సీఎంకు పెందుర్తి ఎమ్మెల్యే అన్నంరెడ్డి అదీప్ స్వాగతం పలికారు. రాంకీ ఫార్మా ను సందర్శించి ఫార్మా సంస్థల ఏర్పాటు, ఎఫ్లూయింట్ ట్రీట్మెంట్ ప్లాంట్, కాలుష్య నియంత్రణ కుసంబంధించిన చర్యలు, అక్కడ ఉత్పత్తులు, ఎగుమతులు లాంటి అనేక అంశాలను అడిగి తెలుసుకున్నారు. తమ రాష్ట్రంలో పరిశ్రమలు నెలకొల్పేందుకే అనువైన ప్రదేశాలు ఉన్నాయని, పారిశ్రామికవేత్తలు తరలివచ్చేలా చూడాలన్నారు. ఇందుకోసం తమ రాష్ట్ర ముఖ్య కార్యదర్శిని పంపిస్తామని, ఆయనతో అన్ని విషయాలు చర్చించాలని కోరారు. ఈ సందర్భంగా ఫార్మా సిటీ ఎండీ లాల్‌కృష్ణ...రాంకీ ద్వారా చేపడుతున్న కార్యకలాపాల గురించి వివరించారు. దీంతో ఆయన విశాఖకు రావడం చర్చనీయాంశమైంది.

భగవంత్ సింగ్ మాన్ విశాఖ బీచ్ రోడ్‌లో ఉన్న ప్రముఖ వెల్ నెస్ సెంటర్‌లో మెడిటేషన్ కోర్సు కోసం వచ్చారు. దేశంలోనే అత్యంత ప్రఖ్యాతి చెందిన వెల్నెస్ సెంటర్ ఇదేనని చెబుతున్నారు. సముద్ర తీరంలో ఎత్తైన కొండపై చూసేందుకు ఆహ్లాదకరంగా.. ఎన్నో విలాసవంతమైన సౌకర్యాలతో పెద్ద హోటల్‌ను కూడా మరిపించేలా ఈ వెల్నెస్ సెంటర్ ఉందని చెబుతుంటారు. ఇక్కడ శారీరక, మానసిక రుగ్మతులకు ప్రకృతి వైద్యాన్ని అందిస్తారు. ఇక్కడ అందుబాటులో ఉండే థెరపీలు అంతర్జాతీయంగా ప్రఖ్యాతి ఉందంటున్నారు. ఇక్కడికి దేశ విదేశాల ప్రముఖులు సందర్శిస్తూ ఉంటారట.. పలువురు ప్రముఖులు ఈ సెంటర్ కి వచ్చి చికిత్స తీసుకుని మానసిక శారీరక ఉల్లాసాన్ని పొందుతూ ఉంటారట. సాధారణంగా అక్కడికి వచ్చే వాళ్ళు వివరాలను కూడా చాలా గోప్యంగా ఉంచుతారనే టాక్ వినిపిస్తోంది. రోజువారీ జీవితంలో ఒత్తిళ్లను అధిగమించే విధంగా మానసిక దృఢత్వాన్ని పొందే విధంగా ఇక్కడ మెడిటేషన్‌తో ప్రకృతి వైద్యాన్ని అందిస్తారట.

పంజాబ్ సీఎం విశాఖకు రావడంపైనా దుమారంరేగింది. పంజాబ్ బీజేపీ భగవంత్‌ను టార్గెట్ చేసింది. ముఖ్యమంత్రి ధ్యానం కోసం ఆంధ్రప్రదేశ్‌లోని విశాఖకు వెళ్లడం విచిత్రంగా అనిపిస్తుందన్నారు. పంజాబ్‌లో ఉన్నహోషియార్‌పూర్ ధ్యాన కేంద్రం సరిపోదని నిరూపించడానికి అక్కడికి వెళ్లారా అంటూ సెటైర్లు పేల్చారు. ఢిల్లీ సీఎం కేజ్రీవాల్ హోషియార్‌పూర్‌లో ధ్యానం కోసం బస చేయడం లేదని.. కేంద్ర దర్యాప్తు సంస్థల నుంచి తప్పించుకోవడం కోసమా అన్నారు.