సంక్రాంతి సెలవులు విద్యార్థులకు పండగే పండగ

ఆంధ్రప్రదేశ్‌లో సంక్రాంతి సెలవులపై కొనసాగుతోన్న సందిగ్దతకు తెరపడింది. అకడమిక్ క్యాలెండర్ ప్రకారం ప్రభుత్వ, ప్రయివేట్ పాఠశాలలకు జనవరి 9 నుంచి 18 వరకూ సంక్రాంతి సెలవులను నిర్ణయించారు. కానీ, ఈ సెలవులను కుదిస్తారనే ప్రచారం సాగింది. కానీ, ప్రభుత్వ, ప్రైవేటు స్కూళ్లకు ఈ నెల 9 నుంచి 18 వరకు సంక్రాంతి సెలవులు ఇవ్వాలని జిల్లా విద్యా శాఖాధికారులు అన్ని యాజమాన్యాలకు ఆదేశాలిస్తున్నారు. సెలవుల్లో తరగతులు నిర్వహిస్తే కఠిన చర్యలు తీసుకుంటామని హెచ్చరిస్తున్నారు. 19న పాఠశాలలు పునఃప్రారంభం కానున్నాయి.

ఈ ఏడాది సంక్రాంతికి ఆరు రోజులు సెలవులు ప్రకటించారు. జనవరి 13న రెండో శనివారం, జనవరి 14న భోగి పండగ (ఆదివారం), జనవరి 15న సంక్రాంతి పండగ వచ్చింది. అలాగే జనవరి 16,17,18 వ తేదీ వరకు సెలవులను ఖరారు చేశారు. తొలుత 16వ తేదీ వరకు సెలవులు ఉంటాయని భావించినా... స్కూళ్లు, కాలేజీల‌కు మ‌రో రెండు రోజులు పాటు అద‌నంగా సెల‌వులు ఇచ్చారు.

ఇదిలా ఉండగా, ఉపాధ్యాయ సంఘాలు మాత్రం జనవరి 11 నుంచి 21 వరకూ ఇవ్వాలని కోరుతున్నాయి. పండుగ అయిపోయిన వెంటనే పిల్లలు పాఠశాలలకు రారని, అందుకే రెండు రోజుల వెనక్కి ఇచ్చి, జనవరి 22న ప్రారంభించాలని ప్రభుత్వానికి విన్నవించాయి. జనవరి 25న ఆదివారం, జనవరి 26న రిపబ్లిక్ డే రావడంతో మరోసారి వరుస సెలవులు రానున్నాయి. మొత్తంగా చూస్తే 2024 జనవరి నెలలో దాదాపు 11 నుంచి 13 రోజులు పాటు సెలవులు ఉంటాయి. ఇక, ఇంటర్ కాలేజీలకు ఈసారి నాలుగు రోజులపాటు సంక్రాంతి సెలవులు ఇవ్వాలని నిర్ణయించారు. జనవరి 13 నుంచి 16 వరకు సెలవులు ఇవ్వనున్నారు. ఈ మేరకు ఇంటర్ బోర్డు నుంచి అధికారిక ప్రకటన వెలువడాల్సి ఉంది. అకడమిక్ క్యాలెండర్ ప్రకారం జనవరి 11 నుంచి 17 వరకు ఇంటర్ కళాశాలలకు సంక్రాంతి సెలవులు ప్రకటించారు. అయితే వారంరోజులకు బదులుగా కేవలం నాలుగు రోజులు మాత్రమే సెలవులు ఉండే అవకాశం ఉంది. ఇక, తెలంగాణలో జనవరి 13 నుంచి 16వ తేదీ వరకు సంక్రాంతి సెలవులుగా ప్రకటించారు. జనవరి 17వ తేదీన జూనియర్ కళాశాలలు తిరిగి ప్రారంభం అవుతాయని టీఎస్ ఇంటర్ బోర్డు తెలిపింది.