లక్షద్వీప్‌లో మోదీ పర్యటన.. భారత్ పట్ల హీనమైన వ్యాఖ్యలు చేసిన మాల్దీవులు ఎంపీ

మాల్దీవుల్లో ఇటీవలె కొత్త ప్రభుత్వం కొలువు దీరింది. అయితే గతంలో ఉన్న అధ్యక్షుడు భారత్‌కు అనుకూలంగా వ్యవహరించగా.. తాజాగా అధికారంలోకి వచ్చిన పార్టీ మన దేశానికి వ్యతిరేకంగా.. చైనాకు అనుకూలంగా వ్యవహరిస్తోంది. అయితే అక్కడి వరకు బాగానే ఉన్నా.. తాజాగా భారత్‌పై, భారత ప్రధాని నరేంద్ర మోదీపై ఆ దేశ ఎంపీ హీనమైన వ్యాఖ్యలు చేశారు. ప్రధాని నరేంద్ర మోదీ ఇటీవల లక్షద్వీప్‌లో పర్యటించిన సందర్భంగా షేర్ చేసిన వీడియోపై మాల్దీవుల ఎంపీ కామెంట్ చేశారు.

లక్షద్వీప్‌లో ప్రధాని మోదీ పర్యటనపై మాల్దీవులు ఎంపీ జహీద్‌ రమీజ్‌ తన అక్కసును వెళ్లగక్కారు. పర్యాటకంగా తమతో పోటీపడటం భ్రమే అంటూ తీవ్ర వ్యాఖ్యలు చేశారు. పర్యాటక రంగంలో మాల్దీవులతో పోలిస్తే.. లక్షద్వీప్‌ ఎన్నో సమస్యలను ఎదుర్కొంటోందని ట్వీట్ చేశారు. పర్యాటకంలో మాల్దీవులతో పోటీ పడాలన్న ఆలోచన భ్రమే అంటూ ఇటీవల లక్షద్వీప్‌లో ప్రధాని పర్యటించిన వీడియోను ట్యాగ్‌ చేస్తూ జహీద్ రమీజ్ చెప్పడం ట్వీట్ చేశారు. మాల్దీవులు అందించే సేవలను అక్కడ ఎలా అందించగలరని ప్రశ్నించారు. అంతటితో ఆగకుండా అక్కడ పరిశుభ్రంగా ఎలా ఉంచగలరని.. అక్కడి గదుల్లో వచ్చే వాసన అతి పెద్ద సమస్య అని జహీద్‌ రమీజ్ తన ట్వీట్‌లో పేర్కొన్నారు.

అయితే మాల్దీవులు ఎంపీ జహీద్ రమీజ్ చేసిన ట్వీట్‌పై భారతీయులు తీవ్ర స్థాయిలో మండిపడుతున్నారు. పర్యాటకంగా మాల్దీవులను బహిష్కరించాలని కామెంట్లు పెడుతున్నారు. భారత్‌ నుంచి ఏటా చాలా మంది మాల్దీవుల్లో పర్యటిస్తుంటారు.. భారత్‌ను మాల్దీవులు ఎంపీ అవమానించినందుకు గానూ వారు మాల్దీవుల్లో పర్యటించడం ఆపేసి ప్రత్యామ్నాయ ప్రాంతాలకు వెళ్లాలని నెటిజన్లు సూచిస్తున్నారు. అయితే జహీద్‌ రమీద్ చేసిన వ్యాఖ్యలు అక్కడి పర్యాటక రంగంపై తీవ్ర ప్రభావం పడే అవకాశం ఉందని పర్యాటక రంగ నిపుణులు అంచనా వేస్తున్నారు.

ఇటీవల కేంద్ర పాలిత ప్రాంతమైన లక్షద్వీప్‌లో పర్యటించిన ప్రధాని నరేంద్ర మోదీ.. కొంతసేపు అక్కడి బీచ్‌లో సందడి చేశారు. సముద్రంలో స్నార్కెలింగ్‌ చేసిన మోదీ.. సాహసాలు చేయాలనుకునే వారు.. తమ లిస్ట్‌లో లక్షద్వీప్‌ను కూడా చేర్చుకోవాలని సూచించారు. అంతే కాకుండా లక్షద్వీప్‌లో దిగిన ఫొటోలను సోషల్ మీడియాలో షేర్‌ చేశారు. అయితే ప్రధాని లక్షద్వీప్‌లో పర్యటించడంతో అక్కడి పర్యాటక రంగానికి మరింత ప్రోత్సాహం లభిస్తుందని నెటిజన్లు అభిప్రాయపడ్డారు.

మాల్దీవుల్లో గతేడాది జరిగిన అధ్యక్ష ఎన్నికల్లో చైనాకు మద్దతుగా ఉండే మొహ్మద్‌ మయిజ్జు గెలిచిన వెంటనే.. మాల్దీవుల్లో ఉన్న భారత బలగాలను ఉపసంహరించుకోవాలని కోరారు. ఇండియా ఫస్ట్‌ అనే విధానాన్ని మారుస్తానని కూడా ప్రకటించారు. ఈ క్రమంలోనే సోమవారం చైనా పర్యటనకు వెళ్లనున్న మొహ్మద్ మయిజ్జు.. చైనాకు దగ్గరయ్యేందుకు ప్రయత్నిస్తున్నట్లు కేంద్ర ప్రభుత్వ వర్గాలు అంచనా వేస్తున్నాయి.