భారత్‌లో ఎక్కువ ప్రైవేట్ కార్లు ఉన్న నగరం ఏంటో తెలుసా

భారత్‌లో ఎక్కువ ప్రైవేట్ కార్లు ఉన్న సిటీ ఏంటో తెలుసా? ఠక్కున ఏ ఢిల్లీనో, ముంబైనో అని చెప్పేరు. కానే కాదట. మొన్నటి వరకు ఢిల్లీనే అగ్రస్థానంలో ఉండగా.. ఇప్పుడు ఈ ఘనత ఢిల్లీ చేజారింది. ఏకంగా 23.1 లక్షల ప్రైవేట్ కార్లతో కర్ణాటక రాజధాని బెంగళూరు నగరం ఈ ఘనత దక్కించుకుంది. 203, మార్చి 31 వరకు ఢిల్లీలో 20.7 లక్షల ప్రైవేట్ కార్స్ మాత్రమే ఉన్నాయట. ఈ మేరకు ఢిల్లీ స్టాటిస్టికల్ హ్యాండ్‌బుక్- 2023లో ఈ వివరాల్ని వెల్లడించారు. 2021-22, 2022-23 ల్లో 55 లక్షల కార్లు డీరిజిస్టర్ అయ్యాయట. ఇంకా మరో 1.4 లక్షల కార్లు స్క్రాప్‌గా నిష్ర్కమించినట్లు ఈ హ్యాండ్‌బుక్‌లో తెలిపారు.

2023, మార్చి 31 వరకు బెంగళూరులో 22.3 లక్షల ప్రైవేట్ కార్లు ఉన్నాయని కర్ణాటక ట్రాన్స్‌పోర్ట్ డిపార్ట్‌మెంట్ వెల్లడించింది. ఇది 2021 మార్చితో పోలిస్తే 7.10 శాతం పెరిగిందని పేర్కొంది. ఇక ఢిల్లీలో 2021, మార్చి 31 నుంచి చూస్తే ప్రైవేట్ కార్లు ఏకంగా 38.8 శాతం తగ్గినట్లు తెలిసింది. గతంలో ప్రతిసారీ ఎక్కువ ప్రైవేట్ వాహనాల విషయంలో ఢిల్లీనే అగ్రస్థానంలో ఉండేది. అయితే పాత వాహనాల్ని, చెత్తగా మార్చాలని, డీరిజిస్టర్ చేయాలని ఢిల్లీ ట్రాన్స్‌పోర్ట్ డిపార్ట్‌మెంట్ ఆదేశించిన నేపథ్యంలో కార్ల సంఖ్య తగ్గింది. ఇంకా వాయు కాలుష్యాన్ని తగ్గించేందుకు.. పదేళ్లు దాటిన డీజిల్ కార్లను, 15 సంవత్సరాలు దాటిన పెట్రోల్ కార్లను సుప్రీం కోర్టు నిషేధించింది.

2021-22 సమయంలో ఢిల్లీలో ప్రతి 1000 మంది జనాభాలో 472 మందికి వాహనాలు ఉన్నాయి. 2020-21 సమయంలో ఇది 655 గా ఉండటం గమనార్హం. ఈ మేరకు ఢిల్లీ ప్రభుత్వ ఎకనామిక్ సర్వే-2022-23లో వెల్లడించింది. ఈ రిపోర్ట్ 2023 మార్చిలో విడుదలైంది. ఢిల్లీలో 2022లో రోడ్ల మీదకు వచ్చిన మొత్తం మోటార్ వాహనాల సంఖ్య 70 లక్షల కంటే ఎక్కువే. దీంట్లోకే ప్రైవేట్ కార్లు కూడా వస్తాయి. ఇది అంతకుముందుతో పోలిస్తే 35.38 శాతం తగ్గింది.