అయోధ్య రాములోరి ప్రాణప్రతిష్ఠ వేళ.. స్మరించుకోవాల్సిన దాన గుణ భూషణుడు.. మన పుల్లారెడ్డి

అయోధ్యలో రామ మందిరం ప్రారంభోత్సవం సందర్భంగా దేశం మొత్తం పండుగ వాతావరణం నెలకొంది. బాల రాముడి ప్రాణ ప్రతిష్ఠ వేళ.. ప్రతి ఇల్లు పూజా మందిరంలా మారగా.. ప్రతి ఆలయం రామ నామస్మరణతో మార్మోగుతోంది. 2019 నవంబర్ 9న సుప్రీం కోర్టు అయోధ్యలో రామ మందిర నిర్మాణానికి అనుకూలంగా తీర్పు వెలువరించింది. సుమారు రూ.1800 కోట్ల వ్యయంతో రామ మందిరాన్ని నిర్మించారు. ఇంత మొత్తం ఖర్చు చేసినప్పటికీ.. శ్రీ రామ జన్మభూమి తీర్థ క్షేత్ర ట్రస్ట్ వద్ద ఇప్పటికీ భారీ మొత్తంలో నిధులు ఉన్నాయి. అయోధ్య రామమందిరం నిర్మాణం కోసం హిందువులంతా తమ తోచినంత విరాళాలు ఇవ్వడమే దీనికి కారణం.

అయితే రామ మందిరం నిర్మాణం అంత ఆషామాషీగా ఏం జరగలేదు. సుదీర్ఘ న్యాయపోరాటం చేసి... ఎంతో కాలం వేచి చూసిన తర్వాత అయోధ్య రామ మందిర కల ఫలించలేదు. అయోధ్య రామ మందిర నిర్మాణం కోసం సాగించిన పోరాటంలో విశ్వ హిందూ పరిషత్ (వీహెచ్‌పీ) కీలక పాత్ర పోషించింది. వీహెచ్‌పీ కోశాధికారిగా పని చేసిన పుల్లారెడ్డి స్వీట్స్ అధినేత గుణంపల్లి పుల్లారెడ్డి రామ అయోధ్య ఉద్యమానికి వెన్నుదన్నుగా నిలిచారు. అయోధ్య ఉద్యమంలో పుల్లారెడ్డి పాత్ర మరువలేనిది. వీహెచ్‌పీ అంతర్జాతీయ కోశాధికారి అయిన పుల్లారెడ్డి.. అయోధ్య రామ మందిర న్యాయపోరాటానికి అవసరమైన ఖర్చులను భరించేందుకు ముందుకొచ్చారు. కోర్టు ఖర్చుల కోసం వీహెచ్‌పీకి రూ.25 లక్షలు అవసరమయ్యాయి. దీంతో వీహెచ్‌పీ అంతర్జాతీయ అధ్యక్షుడు అశోక్ సింఘాల్ హైదరాబాద్ వచ్చి పుల్లారెడ్డిని కలిశారు.

కోర్టు ఖర్చుల కోసం డబ్బు అవసరమైన సంగతి చెబుతూ అశోక్ సింఘాల్ బాధపడ్డారు. ఆయన బాధపడుతుండటం చూడలేకపోయిన పుల్లారెడ్డి.. అప్పటికప్పుడు ఇంట్లో నుంచి రూ.2 లక్షలు తీసుకొచ్చి ఆయన చేతిలో పెట్టారు. సాయంత్రంలోగా మరో రూ.10 లక్షలు సర్దుబాటు చేస్తానని చెప్పారు. తనకు తెలిసిన మిత్రుల దగ్గర డబ్బులు తీసుకొని అశోక్ సింఘాల్‌కు ఇచ్చారు. కోర్టు ఖర్చుల కోసం ఎర్రమంజిల్‌లోని తన ఇంటిని అమ్మేయడానికైనా సిద్ధమని, తన భార్య నగలు సైతం ఇచ్చేస్తానని పుల్లారెడ్డి చెప్పారు. రామ మందిరం కోసం తన ఆస్తి మొత్తం ధారబోసేందుకు ఆయన సిద్ధమన్నారు. రామ మందిరమే తన తొలి ప్రాధాన్యమని చెప్పారు. తాను బతికి ఉన్నంత వరకు కోర్టు ఖర్చులకు ఎలాంటి లోటు రాకుండా చూస్తానని అశోక్ సింఘాల్‌కు పుల్లారెడ్డి హామీ ఇచ్చారు.

పుల్లారెడ్డి మరణించిన తర్వాత ఆయన భౌతిక కాయానికి నివాళులు అర్పించిన అనంతరం శ్రద్ధాంజలి సభలో అశోక్ సింఘాల్ స్వయంగా ఈ విషయాలు వెల్లడించారు. అయోధ్య కేసులో గెలుస్తామని.. రామ మందిరం నిర్మాణం ఎప్పటికైనా జరిగి తీరుతుందని పుల్లారెడ్డి బలంగా నమ్మారు. ఇప్పుడు ఆ కల సాకారం అవుతోంది. సంఘ్ పరివార్ సంస్థలకు తెలుగునాట పెద్ద దిక్కుగా నిలిచిన పుల్లారెడ్డి.. రామకృష్ణ మఠం లాంటి సంస్థలకు ఆయన గుప్త దానాలు చేశారు. వీహెచ్‌పీ రాష్ట్ర శాఖలకు పెద్ద దిక్కుగా నిలిచారు. అబిడ్స్‌లో ఇస్కాన్ టెంపుల్ నిర్మాణం కోసం పుల్లారెడ్డి 950 గజాల స్థలాన్ని విరాళంగా ఇచ్చారు.

పుల్లారెడ్డి నేపథ్యం ఇది..

పుల్లారెడ్డి కర్నూలు జిల్లాలోని 1920, ఆగస్టు 12న కర్నూలు జిల్లాలోని గోకవరం గ్రామంలో జన్మించారు. పుల్లమ్మ, హుస్సేన్ రెడ్డి ఆయన తల్లిదండ్రులు. ఐదో తరగతి వరకు చదువుకున్న ఆయన.. కర్నూలులోని బాబాయి ఇంట్లో పనికి కుదిరారు. అక్కడ పని చేసే సమయంలో నారాయణమ్మను పెళ్లాడారు. జీతం సరిపోకపోవడంతో.. పని మానేసి.. రూ.25 అప్పు చేసి టీ వ్యాపారం ప్రారంభించారు. వేసవిలో మజ్జిగను సైతం విక్రయించే వారు. తర్వాత దుస్తుల వ్యాపారం చేయడం మొదలుపెట్టారు. కానీ భాగస్వామి మోసం ఆయన నష్టపోయారు. భార్య అండగా నిలవడం.. బాబాయి చేరదీసి మిఠాయి షాప్ పెట్టించడంతో పుల్లారెడ్డి తిరిగి గాడిన పడ్డారు. బాబాయి నుంచి వ్యాపార సూత్రాలు వంటిపట్టించుకున్న పుల్లారెడ్డి.. వ్యాపారాన్ని అభివృద్ధి చేశారు.