అయోధ్య రామమందిర ప్రారంభోత్సవానికి అంతా సిద్ధం

అయోధ్య రామ మందిర ప్రారంభోత్సవం వేళ.. దేశం మొత్తం రామనామ స్మరణతో ఊగిపోతోంది. మీడియా దృష్టి మొత్తం అయోధ్యపైనే కేంద్రీకృతమైంది. బాల రాముడి ప్రాణప్రతిష్ఠ కార్యక్రమానికి వివిధ రంగాల్లో విశేష కృషి చేసిన 7 వేల మంది ప్రముఖులను ఆహ్వానించారు. సినీ నటులు, రాజకీయ నేతలు, క్రికెటర్లే కాకుండా.. పనినే దైవంగా భావించి.. ఏళ్ల తరబడి అంకిత భావంతో పని చేస్తున్న సంతోషి దుర్గ లాంటి సామాన్యులకు సైతం ఆ రామమందిర ప్రారంభోత్సవానికి ఆహ్వానం అందింది. ఛత్తీస్‌గఢ్‌కు చెందిన సంతోషి దుర్గ నర్హర్‌పూర్ పీహెచ్‌సీలో 18 ఏళ్లుగా పని చేస్తున్నారు. ఆమె 700 పోస్టుమార్టంలలో సహాయకురాలిగా పాల్గొన్నారు.

సంతోషి దుర్గ లాంటి సామాన్యులను సైతం ప్రాణ ప్రతిష్ఠకు ఆహ్వానించడాన్ని దేశం మొత్తం స్వాగతించింది. అయితే ఇలాంటోళ్లకే కాదు.. ఓ వివాదాస్పద స్వాములోరికి కూడా అయోధ్య నుంచి ఆహ్వానం వెళ్లిందట. ఆయనెవరూ కాదు.. ఇండియాలో కేసుల నుంచి తప్పించుకునేందుకు దేశం విడిచి పారిపోయి.. కైలాస పేరిట సొంత దేశాన్నే ఏర్పాటు చేసుకున్న నిత్యానంద. తనకు తాను దేవుడిగా ప్రకటించుకున్న నిత్యానంద.. అయోధ్య రామాలయం ప్రాణప్రతిష్ఠ కార్యక్రమానికి వేంచేస్తున్నారట. తనకు ఆహ్వానం అందిందని.. ఈ వేడుక కోసం వస్తున్నానని నిత్యానంద ప్రకటించారు. ఆరెస్సెస్ గ్రేటర్ నోయిడా ప్రతినిధి.. లాస్ ఏంజెల్స్‌లో అమెరికాలోని కైలాస దేశ ప్రతినిధిని కలిసి అయోధ్య రామ మందిరం ప్రారంభోత్సవానికి ఆహ్వాన పత్రిక అందించారని.. ఆ రాముడి అక్షతలు కూడా అందించారని ఎక్స్ (ట్విట్టర్) ద్వారా నిత్యానంద వెల్లడించారు.

‘రామ మందిరం ప్రారంభోత్సవానికి కొద్ది సమయమే ఉంది. ఈ చరిత్రాత్మక, అసాధారణమైన కార్యక్రమాన్ని మిసవ్వకండి. సంప్రదాయ ప్రాణప్రతిష్ఠ సమయంలో ఆ రాముడు లాంఛనంగా ఆలయ ప్రధాన దైవంలోకి (బాలరాముడి విగ్రహంలోకి) ఆవాహన చేయబడతాడు. యావత్ ప్రపంచాన్ని ఆయన కరుణించనున్నారు. ఈ వేడుక కోసం ఆహ్వానం అందింది. హిందూమతం యొక్క అత్యున్నత అధిపతి భగవాన్ శ్రీ నిత్యానంద పరమశివమ్ ఈ కార్యక్రమానికి హాజరుతున్నారు’ అని నిత్యానంద ఎక్స్ (ట్విట్టర్) ద్వారా వెల్లడించారు.

నిత్యానంద వస్తే భారత్‌లో అడుగుపెట్టిన వెంటనే ఆయన్న వెంటనే అరెస్ట్ చేసే అవకాశం ఉంది. తనను నిత్యానంద రేప్ చేశారని ఆయన శిష్యురాలు 2010లో ఆరోపించారు. దీంతో ఆయన్ను అరెస్ట్ చేయగా.. కొద్ది రోజులకే బెయిల్ వచ్చింది. సినీ నటి రంజితతో ఆయన ఏకాంతంగా ఉన్న వీడియోలు అప్పట్లో వైరల్ అయ్యాయి. అత్యాచారం ఆరోపణలు ఎదుర్కొంటున్న నిత్యానంద.. అరెస్ట్ భయంతో 2019లో దేశం విడిచి పారిపోయారు. ఈక్వెడార్ సమీపంలో ఓ దీవిని కొనుగోలు చేసి.. దాన్ని సొంత దేశంగా ప్రకటించుకొని.. కైలాస అనే పేరు పెట్టారు. ఈ దేశానికి ప్రత్యేకమైన జెండా, రాజ్యాంగం, సెంట్రల్ బ్యాంక్, పాస్‌పోర్ట్ ఉన్నాయని కైలాస వెబ్‌సైట్ ద్వారా తెలుస్తోంది. మా దేశ పౌరసత్వం కావాలంటే ఆన్‌లైన్లో దరఖాస్తు చేసుకోండంటూ ఈ-సిటిజన్‌షిప్‌ను సైతం కైలాస ఆఫర్ చేస్తోంది. అయితే కైలాసను ఓ దేశంగా ప్రపంచ దేశాలేవీ గుర్తించలేదు.