వైసీపీ పార్టీకి, ఎంపీ పదవికి లావు శ్రీకృష్ణదేవరాయలు రాజీనామా

వైఎస్సార్‌సీపీకి మరో ఎదురు దెబ్బ తగిలింది. నరసరావుపేట ఎంపీ లావు శ్రీకృష్ణదేవరాయలు పార్టీకి రాజీనామా చేశారు. రాజకీయంగా కొంత అనిశ్చతి ఏర్పడిందని.. దానికి తాను బాధ్యుడిని కాదన్నారు. నరసరావుపేటలో కొత్త అభ్యర్థిని నిలబెట్టాలని అధిష్టానం భావిస్తోందని.. దీని వల్ల కేడర్ కొంత కన్ఫ్యూజన్‌లో ఉందన్నారు. పల్నాడు ప్రజలు తనను ఎంతో ఆదరించారని.. గత ఎన్నికలలో మంచి మెజారిటీతో పార్లమెంట్‌కు పంపించారన్నారు. నాలుగున్నరేళ్లలో నియోజకవర్గ అభివృద్ధికి తన వంతు కృషి చేశానని చెప్పారు. అందుకే తాను వైఎస్సార్‌సీపీకి, ఎంపీ పదవికి రాజీనామా చేస్తున్నట్లు ప్రకటించారు. ఇవాళ మాచర్ల, పెదకూరపాడు, నరసరావుపేట ఎమ్మెల్యేలు ఎంపీని కలిసేందుకు బయల్దేరగా.. ఈలోపే రాజీనామా నిర్ణయాన్ని ప్రకటించారు.

లావు శ్రీకృష్ణదేవరాయలు 2019 ఎన్నికల్లో నరసరారవుపేట నుంచి వైఎస్సార్‌సీపీ తరఫున పోటీ చేసి విజయం సాధించారు. అయితే వైఎస్సార్‌సీపీ అధిష్టానం కొద్దిరోజులుగా నియోజకవర్గాల్లో మార్పులు చేర్పులు చేస్తోంది. ఈ క్రమంలో శ్రీకృష్ణదేవరాయలును నరసరావుపేట నుంచి కాకుండా గుంటూరు నుంచి పోటీ చేయాలని సూచించింది. నరసరావుపేట నుంచి బీసీ అభ్యర్థిని పోటీ చేయించాలని వైఎస్సార్‌సీపీ భావించింది.. తెరపైకి నాగార్జున యాదవ్ పేరు వచ్చింది. ఎంపీ లావు శ్రీకృష్ణదేవరాయలు అధిష్టానం నిర్ణయానికి నో చెప్పారు.. గుంటూరు నుంచి పోటీ చేయలేనని కుండబద్దలు కొట్టేశారు. తాను నరసరావుపేట నుంచే పోటీ చేస్తానని తేల్చి చెప్పారు. దీంతో కొంత సందిగ్థత ఏర్పడింది. ఈలోపు పల్నాడు జిల్లాకు చెందిన నేతలు, నరసరావుపేట లోక్‌సభ నియోజకవర్గం కిందకు వచ్చే ఎమ్మెల్యేలు కొందరు శ్రీకృష్ణదేవరాయలును కొనసాగిస్తేనే మంచిదనే అభిప్రాయాన్ని వ్యక్తం చేశారు.. ఆయన్ను మార్చొద్దని విజ్ఞ‌ప్తి చేశారు. దీంతో అధిష్టానం పునరాలోచనలో ఉందనే చర్చ జరుగుతోంది. ఇంతలోనే ఆయన పార్టీకి, ఎంపీ పదవికి రాజీనామా చేయడం చర్చనీయాంశమైంది.

ఎంపీ లావు శ్రీకృష్ణదేవరాయలు టీడీపీలో చేరబోతున్నారనే ప్రచారం కొద్దిరోజులుగా సాగుతోంది. ఇప్పటికే ఆయన పలువురు పెద్దల్ని కలిసి చర్చించినట్లు ఊహాగానాలు వినిపిస్తున్నాయి.. తెలుగు దేశంలోకి వెళ్లాలని నిర్ణయించుకుని వైఎస్సార్‌సీపీకి, ఎంపీ పదవికి గుడ్ బై చెప్పారనే వాదన కూడా వినిపిస్తోంది. అయితే నరసరావుపేటలో అభ్యర్థి కోసం టీడీపీ కసరత్తు చేసింది.. కొన్ని పేర్లు తెరపైకి వచ్చినా ఎలాంటి నిర్ణయం తీసుకోలేదు. ఒకవేళ లావు శ్రీకృష్ణదేవరాయలు టీడీపీకి వస్తే.. ఆయనకు నరసరావుపేట సీటు ఖాయమనే చర్చ జరుగుతోంది. మరి ఆయన ఎలాాంటి నిర్ణయం తీసుకుంటారన్నది చూడాలి. లావు శ్రీకృష్ణదేవరాయలు తండ్రి లావు పెద్ద రత్తయ్యకు గుంటూరు జిల్లాతో పాటుగా హైదరాబాద్‌లో విద్యా సంస్థలు ఉన్నాయి.. ఆయనకు రాజకీయాలపై కూడా ఆసక్తి ఉంది.. చట్ట సభల్లో అడుగు పెట్టాలనే కోరిక ఉందని చెబుతుంటారు ఆయన 2009 లోక్ సభకు జరిగిన ఎన్నికలలో లోక్ సత్తా పార్టీ తరఫున మల్కాజ్ గిరి స్థానం నుంచి పోటీ చేసి ఓడిపోయారు.. ఆ తర్వాత రాజకీయాలకు దూరంగా ఉన్నారు. అయితే తన కుమారుడిని రాజకీయాల్లోకి తీసుకొచ్చారు.. నరసరావుపేట నుంచి శ్రీకృష్ణదేవరాయలు ఎంపీగా విజయం సాధించారు.