రెండుసార్లు నగరి నుంచి ఎమ్మెల్యేగా గెలిచిన రోజా,,,,ఈసారి నగరి నుంచి ఆమె పోటీలో ఉండరని ప్రచారం

మంత్రి రోజా వచ్చే అసెంబ్లీ ఎన్నికల్లో బరిలోకి దిగే అవకాశం లేదని తెలుస్తోంది. వరుసగా రెండుసార్లు నగరి నుంచి ఎమ్మెల్యేగా విజయం సాధించిన ఆమె.. ఈసారి లోక్ సభ రేసులో ఉండే అవకాశం ఉంది. వైఎస్సార్సీపీ కీలక నేత విజయసాయి రెడ్డి ఈ మేరకు సంకేతాలిచ్చారు. ఒంగోలు నుంచి రోజా ఎంపీగా పోటీ చేస్తారని ప్రకాశం జిల్లా నేతలకు విజయసాయి రెడ్డి సమాచారం ఇచ్చారు. 2019లో ఒంగోలు ఎంపీగా గెలిచిన మాగుంట శ్రీనివాసులు రెడ్డికి మరోసారి టికెట్ కేటాయించడానికి సీఎం జగన్ సుముఖంగా లేరు. తన షరతులకు అంగీకరిస్తేనే మాగుంటకు టికెట్ ఇస్తానని జగన్ చెప్పారని సమాచారం. అయితే ఆయనకు ఒంగోలు ఎంపీ టికెట్ ఇప్పించేందుకు బాలినేని శ్రీనివాస రెడ్డి చివరి వరకూ ప్రయత్నించారు.

ఒంగోలు ఎంపీగా చంద్రగిరి ఎమ్మెల్యే చెవిరెడ్డి భాస్కర రెడ్డిని పోటీ చేయించాలని వైఎస్సార్సీపీ నాయకత్వం భావించినప్పటికీ.. జిల్లా నేతలు వ్యతిరేకించడంతో.. ఎవరిని ఒంగోలు నుంచి బరిలోకి దింపాలనే చర్చ జరిగింది. ఈ సందర్భంగా విజయసాయి రెడ్డి కల్పించుకొని.. ఒంగోలు ఎంపీగా రోజా పేరు పరిశీలనలో ఉందని చెప్పారట. ఒకట్రెండు రోజుల్లో ఖరారు కావచ్చిన ఆయన చెప్పారట. వాస్తవానికి నగరి నియోజకవర్గంలో రోజా సొంత పార్టీలోనే అసమ్మతిని ఎదుర్కొంటున్నారు. నగరిలో పార్టీ రెండు వర్గాలుగా విడిపోయింది. అవకాశం దొరికినప్పుడల్లా ప్రత్యర్థి వర్గం రోజాను లక్ష్యంగా చేసుకొని విమర్శలు గుప్పిస్తోంది. నగరి వైఎస్సార్సీపీలో వర్గ రాజకీయాలు అధిష్టానానికి తలనొప్పిగా మారాయి. 2019 అసెంబ్లీ ఎన్నికల్లో గెలవగానే రోజాకు మంత్రి పదవి దక్కుతుందని భావించారంతా. కానీ జిల్లాకు చెందిన కీలక నేత చక్రం తిప్పడంతో.. ఆమెకు మంత్రి పదవి దక్కకుండా పోయిందనే ప్రచారం జరిగింది. ఆ తర్వాత మంత్రివర్గ పునఃవ్యవస్థీకరణలో రోజాకు చోటు దక్కినప్పటికీ.. గ్రూపు రాజకీయాలు మాత్రం ఆమెకు తలనొప్పిగా మారాయి.

పుత్తూరు మున్సిపల్ చైర్‌పర్సన్ పదవి కోసం మంత్రి రోజా సోదరుడికి తాను రూ.40 లక్షలు ఇచ్చానని కౌన్సిలర్ భువనేశ్వరి ఆరోపించారు. డబ్బులు తీసుకున్నా పదవి ఇవ్వకుండా తమను మోసం చేశారని ఆమె వాపోయారు. ఈ ఆరోపణలు సైతం నగరి నియోజకవర్గంలో రోజాకు ప్రతికూలంగా మారాయి. ఈ పరిణామాల నేపథ్యంలో రోజాకు మరోసారి నగరి టికెట్ దక్కే అవకాశం లేదని కొంత కాలంగా ప్రచారం జరుగుతోంది.

ఇప్పుడు రోజాను ఒంగోలు ఎంపీగా పోటీ చేస్తే.. నగరి గ్రూప్ రాజకీయాలకు చెక్ పెట్టడంతోపాటు.. ఒంగోలులో సైతం మాగుంట కోసం పట్టుబడుతున్న బాలినేని శ్రీనివాస రెడ్డిని తేలిగ్గా ఒప్పించొచ్చనేది వైఎస్సార్సీపీ అధిష్టానం వ్యూహంగా కనిపిస్తోంది.