ఏపీలో జూనియర్‌ సివిల్‌ జడ్జిగా తెలంగాణ యువతి.. పరీక్షల్లో ఫస్ట్ ర్యాంక్
Andhra Pradesh Telugu | Suryaa Desk | Published : Sun, Jan 28, 2024, 07:23 PM
ఆంధ్రప్రదేశ్‌ రాష్ట్ర హైకోర్టు నిర్వహించిన జూనియర్‌ సివిల్‌ జడ్జి నియామక పరీక్ష ఫలితాల్లో తెలంగాణ యువతి సత్తా చాటింది. హనుమకొండకు చెందిన అలేఖ్య ఫస్ట్ ర్యాంకు సాధించారు. మాధవీలత, పరిమి మనోజ్‌ కుమార్‌ దంపతుల కుమార్తె అలేఖ్య హైదరాబాద్‌ పెండేకంటి కాలేజీలో 2022లో న్యాయశాస్త్ర విభాగంలో ఉత్తీర్ణత సాధించారు. ప్రస్తుతం ఉస్మానియా విశ్వవిద్యాలయంలో పీజీ రెండో సంవత్సరం చదువుతున్నారు. రంగారెడ్డి జిల్లా న్యాయస్థానంలో ఆమె తల్లి మాధవీలత సీనియర్‌ సివిల్‌ జడ్జిగా పనిచేస్తున్నారు. తల్లిని స్ఫూర్తిగా తీసుకున్న అలేఖ్య తానూ జడ్జి కావాలనుకున్నారు. ఈ క్రమంలో గత ఏడాది ఆంధ్రప్రదేశ్‌ హైకోర్టు నియామకాల్లో ఫస్ట్ ర్యాంకులో నిలిచి జూనియర్‌ సివిల్‌ జడ్జిగా ఎంపికయ్యారు. ఆమెను రంగారెడ్డి జిల్లా కోర్టుల న్యాయవాదుల సంఘం అధ్యక్షుడు దీకొండ రవీందర్‌, ప్రధాన కార్యదర్శి పట్టోళ్ల మాధవరెడ్డి అభినందించారు. అలేఖ్య అక్కడితో ఆగకుండా ఉన్నతశిఖరాలను చేరుకోవాలని వారు ఆకాంక్షించారు.
|
|