వైఎస్ జగన్‌కు ముగ్గురు ఎంపీలే మిగులుతారు.. మాణిక్కం ఠాగూర్

ఆంధ్రప్రదేశ్‌లో ఎన్నికలు సమీపిస్తున్న వేళ రాజకీయం రసవత్తరంగా మారింది. ఏపీ కాంగ్రెస్ చీఫ్‌గా వైఎస్ షర్మిలా రెడ్డి బాధ్యతలు స్వీకరించిన తర్వాత అధికార వైసీపీ, కాంగ్రెస్ మధ్య మాటలయుద్ధం కొనసాగుతుండగా.. ఏపీ కాంగ్రెస్ పార్టీ వ్యవహారాల ఇంఛార్జ్‌ మాణిక్కం ఠాగూర్‌ మరింత సంచలనానికి తెరతీశారు. వైఎస్సార్ కాంగ్రెస్ పార్టీకి ముగ్గురు ఎంపీలే మిగులుతారని ఆయన ట్వీట్ చేశారు. ఆ పార్టీ నుంచి ఎంపీలు పెద్ద సంఖ్యలో పార్టీ మారతారని తాను విన్నానని ఆయన పేర్కొన్నారు. ‘ఎన్నికల ముందు రాజకీయాలు ఎంత వేగంగా మారుతున్నాయి’ అంటూ ఆయన రాసుకొచ్చారు.

వైఎస్సార్‌సీపీకి ఇప్పటికే ముగ్గురు ఎంపీలు గుడ్ బై చెప్పారు. కర్నూలు ఎంపీ డాక్టర్ సంజీవ్ కుమార్, మచిలీపట్నం ఎంపీ బాలశౌరి, నరసరావుపేట ఎంపీ లావు శ్రీకృష్ణదేవరాయలు పార్టీకి రాజీనామా చేశారు. అయితే, ఈ మూడు స్థానాల్లో ఈసారి ఎన్నికల్లో అభ్యర్థులను మార్చాలని వైసీపీ అధిష్టానం నిర్ణయం తీసుకోవడంతో ఈ ముగ్గురు పార్టీ మారేందుకు నిర్ణయం తీసుకున్నారు. బాలశౌరి ఈసారి జనసేన తరఫున పోటీ చేసేందుకు ప్రయత్నాలు చేసుకుంటుండగా.. సంజీవ్ కుమార్, లావు శ్రీకృష్ణదేవరాయలు టీడీపీలో చేరేందుకు సిద్ధమయ్యారు. ఇదే సమయంలో టీడీపీ నుంచి విజయవాడ ఎంపీ కేశినేని నాని.. వైసీపీలో చేరారు.

కిందటిసారి సార్వత్రిక ఎన్నికల్లో ఏపీలో మొత్తం 25 లోక్ సభ స్థానాలకు గాను.. 22 స్థానాల్లో వైసీపీ అభ్యర్థులు గెలుపొందారు. తెలుగుదేశం పార్టీ 3 స్థానాల్లో గెలుపొందింది. వైసీపీ నుంచి 16 మంది ఎంపీలు పార్టీ మారనున్నట్లు తెలిసిందని మాణిక్కం ఠాగూర్ ట్వీట్ చేశారు. ఇది రాజకీయ వర్గాల్లో ప్రకంపనలు లేపుతోంది. సంచలనం కోసమే చేశారా? పక్కా సమాచారంతోనే చేశారా అనే చర్చ జరుగుతోంది. కాంగ్రెస్ పార్టీలో వైఎస్ షర్మిల చేరికకు ముందు కూడా మాణిక్కం ఠాగూర్ ఇలాగే ఓ సంచలన ట్వీట్ చేశారు. ఏపీకి మంచి రోజులు వస్తున్నాయంటూ ఆయన చేసిన ట్వీట్ చేశారు. ఆ తర్వాత కొన్ని రోజులకే వైఎస్ షర్మిల.. కాంగ్రెస్‌లో చేరారు. ఈ నేపథ్యంలో మాణిక్కం ఠాగూర్ తాజాగా చేసిన పోస్టు ప్రాధాన్యం సంతరించుంది.