మృతదేహాన్ని దొంగిలించి వ్యాపారి డ్రామా.. తానే చనిపోయినట్లు నమ్మించి.. సినిమాను మించే ట్విస్ట్‌లు

ఇష్టం వచ్చినట్లు అప్పులు చేశాడు.. వాటిని తీర్చేందుకు మాస్టర్ ప్లాన్ చేశాడు. తాను చనిపోయినట్లుగా సినిమా రేంజ్ స్టోరీని సిద్ధం చేశాడు .. కాన్ సీన్ రివర్స్ అయ్యింది.. పోలీసులకు అడ్డంగా దొరికిపోయాడు. తూర్పుగోదావరి జిల్లా రంగంపేట మండలం వీరంపాలెంలో ఈ నెల 26న గుర్తుతెలియని వ్యక్తి మృతి కేసులో అసలు ట్విస్ట్ బయటపడింది. వీరంపాలెంలో కేతమళ్ల వెంకటేశ్వరరావు అలియాస్ పూసయ్య ధాన్యం వ్యాపారి. తలకు మించి తీర్చలేనన్ని అప్పులు చేశాడు. వాటిని ఎలా తిరిగి చెల్లించాలో కూడా తెలియలేదు. అప్పుడే ఓ ఆలోచన తట్టింది.. వెంటనే అమలులో పెట్టేశాడు.

తాను చనిపోయినట్టు చిత్రీకరించుకుని కొన్నాళ్లు అజ్ఞాతంలోకి వెళితే తన పేరిట రూ.40లక్షల బీమా సొమ్ము వస్తుందని భావించాడు. అనుకున్న విధంగానే ప్రమాదవశాత్తు చనిపోయినట్లు అందరినీ నమ్మించడానికి ప్లాన్ చేసుకున్నాడు. అతడి స్థానంలో వేరే మృతదేహాన్ని ఉంచి ఎవరూ గుర్తించకుండా చేయాలని భావించాడు. గుర్తుతెలియని మృతదేహం కోసం రాజమహేంద్రవరం మోరంపూడికి చెందిన ఇద్దరు యువకులతో ఒప్పందం కుదుర్చుకున్నాడు. పాత బొమ్మూరులో ఈ నెల 23న ఓఎన్‌జీసీ ఇంజినీర్‌ నెల్లి విజయరాజు చనిపోగా.. మరుసటిరోజు స్థానిక శ్మశానవాటికలో మృతదేహాన్ని పూడ్చిపెట్టారు. విషయం తెలుసుకున్న ఇద్దరు యువకులూ పూడ్చిపెట్టిన శవపేటిక నుంచి విజయరాజు మృతదేహాన్ని 25వ తేదీన దొంగిలించారు.

పూసయ్య చెప్పినట్లుగానే మరుసటి రోజు డెడ్‌బాడీని వీరంపాలెం తీసుకెళ్లి ఓ పొలంలోని ట్రాన్స్‌ఫార్మర్‌ దగ్గర పెట్రోలు పోసి తగలబెట్టారు. పూసయ్య చెప్పులు, మొబైల్‌ను అక్కడే వదిలేసి పారిపోయారు. అక్కడ ఆధారాలను బట్టి మృతదేహం పూసయ్యదేనని స్థానికులు భావించి పోస్టుమార్టం కోసం తరలించారు. భర్త మరణించారని భావించి పూసయ్య భార్య తట్టుకోలేక తానూ చనిపోతానంటూ కన్నీటి పర్యంతం అయ్యారు. స్థానిక పరిస్థితులను యువకులిద్దరూ పూసయ్యకు ఎప్పటికప్పుడు ఫోన్లో చెప్పేవారు.

ఈ క్రమంలో భార్యకు తాను బతికే ఉన్నాననే విషయం ఎలాగైనా చెప్పాలని భావించి పూసయ్య మరో ప్లాన్ చేశాడు. గుర్తుతెలియని యువకులు ఎవరో పొలంలో ఓ మృతదేహాన్ని కాలుస్తుండగా తాను అడ్డుకున్నానని.. దీంతో వారు తనను కొట్టి ఆటోలో తీసుకెళ్లి దూరంగా తుప్పల్లో పడేసినట్టు స్టోరీ అల్లేశాడు. అతడి శరీరంపై గాయాలు లేకపోవడం అనుమానాలు రాగా... పోలీసులు ప్రశ్నించడంతో అసలు విషయం చెప్పాడు. అతడికి సహకరించిన ఇద్దరినీ పోలీసులు అదుపులోకి తీసుకున్నారు. పూసయ్యపై కేసు నమోదు చేసినట్లు పోలీసులు తెలిపారు.

పాతబొమ్మూరు క్రైస్తవ శ్మశానవాటికలో తస్కరించిన మృతదేహం బొమ్మూరు గ్రామానికి చెందిన ఓఎన్‌జీసీ ఉద్యోగి నెల్లి విజయరాజుదిగా పోలీసులు గుర్తించారు. నెల్లి విజయరాజు అనారోగ్యంతో ఈనెల 23వ తేదీన మృతిచెందారు. ఈ నెల 24న ఖననం చేశారు. 29న అతని జ్ఞాపకార్థకూడిక నిర్వహించారు. అయితే మంగళవారం రంగంపేట పోలీసులు నిందితులను తీసుకుని పాతబొమ్మూరు శ్మశానవాటిక వద్దకు వెళ్లే వరకు గ్రామస్తులకు, కుటుంబ సభ్యులకు నెల్లి విజయరాజు మృతదేహాన్ని తీసుకువెళ్లి పెట్రోలుతో దహనం చేశారన్న విషయం తెలియలేదు. పోలీసులు విజయరాజు ఖననం చేసిన చోట తవ్వించి చూడగా అందులో మృతదేహం కనిపించలేదు. అనపర్తి హాస్పిటల్‌లో ఉన్న మృతదేహం విజయరాజుదిగా ఆయన కుటుంబసభ్యులు గుర్తించారు. పోస్టుమార్టం అనంతరం మృతదేహాన్ని పాతబొమ్మూరులోని శ్మశానవాటికకు తీసుకువచ్చి ఖననం చేశారు.