విజయసాయిరెడ్డిని చూడగానే చుట్టుముట్టిన తారకరత్న పిల్లలు,,,సోషల్ మీడియాలో వైరల్ అవుతున్న వీడియో

నందమూరి తారకరత్న.. నందమూరి కుటుంబసభ్యులను, అభిమానులను, టీడీపీ శ్రేణులను శోకసంద్రంలో ముంచుతూ ఈ లోకాన్ని వదిలి వెళ్లి దాదాపుగా ఏడాది కావస్తోంది. యువగళం పాదయాత్ర ప్రారంభం రోజున అనారోగ్యానికి గురైన తారకరత్న.. 23 రోజులపాటు మృత్యువుతో పోరాడి 2023లో శివరాత్రి రోజున తుదిశ్వాస విడిచారు. ఆయన మరణించి ఏడాది కావస్తున్నా.. ఇప్పటికీ కుటుంబసభ్యులు, అభిమానులు ఆ బాధ నుంచి బయటకు రాలేకపోతున్నారు. అయితే తారకరత్న పిల్లలు వైసీపీ ఎంపీ విజయసాయిరెడ్డిని పెనవేసుకోవటం, ఆయన కూడా వారిని ఆత్మీయంగా దగ్గరకు తీసుకున్న వీడియో ప్రస్తుతం సోషల్ మీడియాలో వైరల్ అవుతోంది.

తారకరత్న భార్య అలేఖ్యారెడ్డికి, విజయసాయిరెడ్డికి మధ్య బంధుత్వం ఉన్న సంగతి అందరికీ తెలిసిందే. విజయసాయిరెడ్డి భార్య సోదరి కుమార్తె అలేఖ్యారెడ్డి. వరుసగా అలేఖ్యారెడ్డికి విజయసాయిరెడ్డి పెదనాన్న అవుతారు. ఈ రిలేషన్‌ షిప్ కారణంగానే తారకరత్న చనిపోయిన సమయంలో బాలకృష్ణతో పాటుగా విజయసాయిరెడ్డి అన్నీతానై దగ్గరుండి పనులన్నీ చూసుకున్నారు. అలాగే తారకరత్న కుటుంబానికి అండగా ఉంటానంటూ హామీ ఇచ్చారు. ఈ నేపథ్యంలోనే తారకరత్న పిల్లలతో విజయసాయిరెడ్డికి మంచి ఎటాచ్‌మెంట్ ఏర్పడింది. ఆ అనుబంధంతోనే విజయసాయిరెడ్డి కనిపించగానే తారకరత్న పిల్లలు చుట్టుముట్టేశారు. ఈ వీడియో ఇప్పుడు సోషల్ మీడియాలో వైరల్ అవుతుండగా.. నెటిజన్లు కామెంట్స్ చేస్తున్నారు. రాజకీయాలను, కుటుంబాలను వేరుగా చూడాలని.. హార్ట్ టచింగ్ వీడియో అంటూ కామెంట్స్ చేస్తున్నారు.

మరోవైపు విజయసాయిరెడ్డి బావమరిది, లక్కిరెడ్డిపల్లి మాజీ ఎమ్మెల్యే అయిన గడికోట ద్వారకనాథ్ రెడ్డి ఇటీవలే టీడీపీ తీర్థం పుచ్చుకున్నారు. టీడీపీ అధినేత చంద్రబాబునాయుడు సమక్షంలో ఆయన టీడీపీ కండువా కప్పుకున్నారు. ఈ సందర్భంగా తనతో పాటు తారకరత్న ఫ్యామిలీని వెంటబెట్టుకెళ్లారు ద్వారకనాథ్ రెడ్డి. అలాగే తారకరత్న భార్య అలేఖ్యారెడ్డి సైతం టీడీపీ తరుఫున బరిలోకి దిగే అవకాశం ఉందంటూ అప్పడప్పుడూ వార్తలు వినిపిస్తుంటాయి. అలా రాజకీయంగా ప్రత్యర్థులుగా మారుతున్నప్పటికీ.. తారకరత్న ఫ్యామిలీని దూరం పెట్టలేదు విజయసాయిరెడ్డి. వారికి అండగా ఉంటూ వస్తున్నారు. ఇప్పుడీ వీడియో వైరల్ కావటంతో.. పాలిటిక్స్, పర్సనల్ లైఫ్‌ను వేర్వేరుగా చూడాలంటూ నెటిజనం కామెంట్స్ చేస్తున్నారు. హార్ట్ టచింగ్ వీడియో అంటూ కామెంట్లు పెడుతున్నారు.