కారు డ్రైవర్ సీటు కింద దిండు.. బయటకు తీసి చూడగానే కళ్లు చెదిరేలా

ఏపీలో ఎన్నికలు సమీపిస్తున్న వేళ పోలీసులు తనిఖీలు మరింత ముమ్మరం చేశారు. చెక్‌‌పోస్టుల దగ్గర, టోల్‌ప్లాజాల దగ్గర వాహనాలను సోదాలు చేస్తున్నారు. ఈ క్రమంలో తాజాగా అన్నమయ్య జిల్లాలో భారీగా బంగారం పట్టుబడింది. ప్రభుత్వానికి టాక్స్ కట్టకుండా అక్రమంగా అడ్డదారుల్లో బంగారు తీసుకొని వచ్చి షాపులకు అమ్మే ముఠాను పట్టుకున్నారు. పోలీసులకు దొరక్కుండా ప్లాన్ చేసినా అడ్డంగా దొరికిపోయారు.

అన్నమయ్య జిల్లాలో వాహనాలు తనిఖీ చేస్తుండగా అక్రమంగా తరలిస్తున్న బంగారు దొరికింది. తిరుపతి- కడప రోడ్డులో రాజంపేట పట్టణ శివారులోని టౌన్ వై జంక్షన్ దగ్గర రాజంపేట అర్బన్ పోలీసులు వచ్చే వాహనాలను తనిఖీ చేశారు. ఇంతలో తిరుపతి వైపు నుంచి ఒక కారు ముందు వైపు నెంబర్ ప్లేట్ లేకుండా రావడం చూసి అనుమానం వచ్చింది. వెంటనే ఆ కారును ఆపి డ్రైవర్, అతడి ప్రక్కన కూర్చున్న వ్యక్తిని ప్రశ్నించారు.షేక్ అజ్మత్ (డ్రైవర్), మహమ్మద్ జిలాని బాష (ఓనర్) లమని పోలీసులకు చెప్పారు.

వారిని చూడగానే అనుమానంతో పోలీసులు వాహనంలో తనిఖీలు చేశారు. డ్రైవర్ సీటు క్రింద ఒక స్పాంజి దిండులాంటిది బరువుగా కనిపించింది. దానిని ఓపెన్ చేసి చూడగా మూడు కవర్లలో బంగారు బిస్కెట్లు బయటపడ్డాయి. పోలీసులు వాటిని తూకం వేయగా మొత్తం బంగారు 1 కేజీ 338 గ్రాములు ఉన్నట్లు తేలింది.వాటి వివరాలతో పాటుగా బిల్లులు అడిగారు.. అయితే బంగారం తరలిస్తున్న వారి దగ్గర ఎలాంటి అనుమతి పత్రాలు లేవని,, యజమాని మహమ్మద్ జిలాని బాషా పోలీసులుకు చెప్పాడు.

కారులో పట్టుబడిన బంగారం విలువ రూ.కోటి ఉంటుందని పోలీసులు చెబుతున్నారు. ఇంత బంగారంపై టాక్స్ ఎగవేత ఉందని గుర్తించి రాయచోటి అసిస్టెంట్ కమీషనర్ వారికి తదుపరి చర్య నిమిత్తం నివేదికను పంపారు. బంగారాన్ని కారులో తీసుకొస్తున్న ఇద్దరినీ అదుపులోకి తీసుకున్నారు. కారును పోలీసు స్టేషన్‌కు తీసుకెళ్లి సీజ్ చేశారు. ఇటీవల కాలంలో భారీగా కరెన్సీ, బంగారం, వెండి పట్టుబడుతోంది.