బుల్డోజర్‌ కూల్చివేతలు ఫ్యాషన్ అయ్యాయి.. హైకోర్టు సీరియస్, పరిహారం చెల్లించాలని ఆదేశం

ఉత్తర్‌ప్రదేశ్‌లో మొదలైన బుల్డోజర్ కూల్చివేతలు క్రమంగా ఇతర రాష్ట్రాలకు వ్యాపిస్తున్నాయి. ఏదైనా కేసులో నిందితులుగా, దోషులుగా గుర్తించిన వారికి సంబంధించిన అక్రమ కట్టడాలను స్థానిక మున్సిపల్ అధికారులు కూల్చి వేస్తున్నారు. అయితే ఇలా ఇళ్లు కూల్చి వేయడంపై మధ్యప్రదేశ్ హైకోర్టు తీవ్ర ఆగ్రహం వ్యక్తం చేసింది. బుల్డోజర్ కూల్చివేతలు ప్రస్తుతం ఫ్యాషన్‌గా మారిపోయాయని తీవ్ర స్థాయిలో మండిపడింది. ఈ క్రమంలోనే తన ఇంటిని అక్రమంగా మున్సిపల్ అధికారులు కూల్చివేశారని మధ్యప్రదేశ్ హైకోర్టును ఓ మహిళ ఆశ్రయించగా.. ధర్మాసనం ఈ వ్యాఖ్యలు చేసింది. ఈ క్రమంలోనే బాధిత మహిళకు పరిహారం చెల్లించాలని అధికారులకు ఆదేశాలు జారీ చేసింది.

మధ్యప్రదేశ్‌లోని ఉజ్జయినీకి చెందిన రాధా లాంగ్రీ అనే మహిళ ఇంటిని స్థానిక మున్సిపల్ అధికారులు కూల్చివేశారు. ఆ ఇంటిని అక్రమంగా నిర్మించారని పేర్కొంటూ బుల్డోజర్‌తో నేలమట్టం చేశారు. అయితే ఈ వ్యవహారంపై బాధితురాలు మధ్యప్రదేశ్ హైకోర్టును ఆశ్రయించింది. తన ఇల్లు నిబంధనల ప్రకారమే కట్టారని.. మున్సిపల్ అధికారులు కావాలనే తప్పుగా తన ఇంటిని కూల్చి వేశారని మధ్యప్రదేశ్ హైకోర్టులోని ఇండోర్ బెంచ్‌కు మొర పెట్టుకుంది. ఈ పిటిషన్‌పై జస్టిస్ వివేక్ రుషియా నేతృత్వంలోని ధర్మాసనం విచారణ జరిపింది.

ఎలాంటి నోటీసులు ఇవ్వకుండా.. చట్టంలోని విధి విధానాలు పాటించకుండా ఏ ఇంటినైనా కూల్చివేయడం స్థానిక పరిపాలన, స్థానిక సంస్థల అధికారులకు ఇప్పుడు ఫ్యాషన్‌గా మారిందని తీవ్ర విమర్శలు చేసింది. ఇంటిని క్రమబద్ధీకరించడానికి సరైన అవకాశం ఇచ్చిన తర్వాతే కూల్చివేతను చివరి మార్గంగా ఎంచుకోవాలని ఈ సందర్భంగా మధ్యప్రదేశ్ హైకోర్టు సూచించింది. మరోవైపు అన్ని అనుమతులు లేకుండా, నిబంధనలు పాటించకుండా ఇల్లు నిర్మించుకునే హక్కు ఎవరికీ లేదని కూడా హైకోర్టు పేర్కొంది. ఇళ్లు, భవనాలకు సంబంధించి నకిలీ పత్రాలు తయారు చేసిన అధికారులపై కూడా చర్యలు తీసుకోవాలని అధికారులను ఆదేశించింది.

ఈ సందర్భంగా బాధితురాలి ఇంటిని కూల్చివేసినందుకు స్థానిక మున్సిపల్ అధికారులపై తీవ్ర ఆగ్రహం వ్యక్తం చేసింది. ఆమెకు పరిహారంగా రూ.1 లక్ష పరిహారం చెల్లించాలని కోర్టు తీర్పును వెలువరించింది. ఇటీవలి కాలంలో పలు రాష్ట్రాల్లో మధ్యప్రదేశ్, ఉత్తర్‌ప్రదేశ్, హర్యానా, ఢిల్లీ, మహారాష్ట్ర, ఉత్తరాఖండ్ రాష్ట్రాల్లో అక్రమ కట్టడాలపై స్థానిక ప్రభుత్వాలు ఉక్కుపాదం మోపుతున్నాయి. నిబంధనలకు విరుద్ధంగా నిర్మించిన ఇళ్లను బుల్డోజర్లతో కూల్చివేస్తున్నాయి. మరీ ముఖ్యంగా బీజేపీ పాలిత రాష్ట్రాల్లో ఈ బుల్డోజర్ సంస్కృతి పెరిగిపోవడం పట్ల తీవ్ర ఆందోళనలు వ్యక్తం అవుతున్నాయి. ఈ క్రమంలోనే మధ్యప్రదేశ్ హైకోర్టు ఇచ్చిన తీర్పు ప్రాధాన్యం సంతరించుకుంది.