ముస్లిం సంఘాల ఆందోళన.. యూపీలో చెలరేగిన హింస

ఉత్తర్‌ప్రదేశ్‌లోని బరేలీలో తీవ్ర హింసాత్మక సంఘటనలు చెలరేగాయి. జ్ఞానవాపి వివాదంలో వారణాసి జిల్లా కోర్టు ఇచ్చిన తీర్పుకు వ్యతిరేకంగా ఇత్తేహాద్-ఎ-మిల్లత్ కౌన్సిల్ చీఫ్ మౌలానా తౌకీర్ రజాఖాన్ జైల్ భరోకు పిలుపునిచ్చారు. ఈ క్రమంలోనే తౌకీర్ రజాఖాన్‌ను పోలీసులు అరెస్ట్ చేయడంతో ఆయన మద్దతుదారులు శుక్రవారం ఆందోళన చేపట్టారు. వారిని అడ్డుకునేందుకు పోలీసులు తీవ్ర ప్రయత్నాలు చేశారు. ఆందోళనకారులను అడ్డగించేందుకు బారికేడ్లను ఏర్పాటు చేయగా.. వారు వాటిని తోసుకుంటూ ముందుకు వెళ్లడంతో తీవ్ర ఉద్రిక్తతలు, హింస చోటు చేసుకుంది. మరోవైపు.. ఈ క్రమంలోనే తౌకీర్ రజాఖాన్‌.. ఉత్తరాఖండ్‌లోని హల్ద్వానీలో మదర్సా కూల్చివేతపై వ్యాఖ్యలు చేయడం కూడా ఈ ఘర్షణలు మరింత పెరిగేందుకు కారణం అయ్యాయి.

అయితే ఇటీవల జ్ఞానవాపి మసీదుపై కోర్టు తీర్పు, జ్ఞానవాపి మసీదును వదులుకోవాలని ఉత్తర్‌ప్రదేశ్ ముఖ్యమంత్రి యోగి ఆదిత్యనాథ్ పిలుపునివ్వడాన్ని వ్యతిరేకిస్తూ తౌకీర్ రజా ఖాన్.. యూపీలో నిరసనలకు పిలుపునిచ్చారు. ఈ క్రమంలోనే బరేలీ నుంచి జైల్ భరోకు పిలుపునివ్వడంతో ఆయన మద్దతుదారులు భారీగా అక్కడికి చేరుకున్నారు. దీంతో అప్రమత్తమైన పోలీసులు అడుగడుగున భద్రతను ఏర్పాటు చేసి ఎలాంటి అవాంఛనీయ సంఘటనలు జరగకుండా గట్టి చర్యలు తీసుకున్నారు. ఈ క్రమంలోనే ప్రభుత్వ తీరుపై తౌకీర్ రజాఖాన్ తీవ్ర విమర్శలు గుప్పించారు.

ఎవరైనా నేరస్తులైతే వారి ఇల్లు గానీ, మదర్సా, మసీదులను ఎందుకు బుల్డోజర్‌లతో కూల్చి వేస్తున్నారని యూపీ ప్రభుత్వానికి తౌకీర్ రజా ఖాన్ సూటి ప్రశ్నలు సంధించారు. దేశంలో విద్వేషపూరిత వాతావరణం ఏర్పడిందని.. దీనికి వ్యతిరేకంగా బరేలీ నుంచే దేశవ్యాప్త ప్రచారం ప్రారంభిస్తామని ఆయన స్పష్టం చేశారు. దాని కంటే ముందు ఓ వీడియో విడుదల చేసిన తౌకీర్ రజాఖాన్.. నమాజ్ తర్వాత శాంతియుత పద్ధతిలో, రాజ్యాంగ పరిమితుల్లో.. ఆందోళనలు, నిరసనలు నిర్వహించాలని తన అనుచరులకు పిలుపునిచ్చారు.

ఈ క్రమంంలోనే తౌకీర్ రజాఖాన్ నిరసనలకు పిలుపునిచ్చిన నేపథ్యంలో బరేలీలో పోలీసులు కట్టుదిట్టమైన భద్రతను ఏర్పాటు చేశారు. ఇస్లామియా మైదాన్ వద్ద వేలది మంది పోలీసులను మోహరించారు. అత్యవసర పరిస్థితుల్ని ఎదుర్కొనేందుకు ర్యాపిడ్ యాక్షన్ ఫోర్స్‌ని కూడా రంగంలోకి దించారు. హల్ద్వానీ ఘటన నేపథ్యంలో యూపీలో కూడా హై అలర్ట్ కొనసాగుతోంది. మరోవైపు ఉత్తరాఖండ్ హల్ద్వానీలో మదర్సా కూల్చివేతపై కూడా తౌకీర్ రజా వివాదాస్పద వ్యాఖ్యలు చేయడం సంచలనంగా మారింది. ‘‘మా ఇంటిపై బుల్డోజర్లు నడిపితే మేం ఊరుకుంటామా.. ఇప్పుడు ఏ బుల్డోజర్ చర్యలను సహించేది లేదు. సుప్రీంకోర్టు దృష్టికి తీసుకెళ్లకపోతే మమ్మల్ని మేం రక్షించుకుంటాం..చట్టం మాకు హక్కు కల్పించింది, ఎవరైనా మనపై దాడి చేస్తే అతన్ని అంతమొందించాలి’’ అంటూ తౌకీర్ రజాఖాన్ విద్వేష పూరిత వ్యాఖ్యలు చేశారు. అంతే కాకుండా ప్రధాని నరేంద్ర మోదీ, ఉత్తరాఖండ్ సీఎం పుష్కర్ సింగ్ ధామిపై కూడా అభ్యంతరకర వ్యాఖ్యలు చేశారు.