జీవిత ఖైదు పడిన వారు జీవితాంతం జైలులోనే ఉండాలా.. సుప్రీంకోర్టులో పిటిషన్‌

జీవిత ఖైదు శిక్షకు సంబంధించి దాఖలైన పిటిషన్‌ను విచారణ జరిపేందుకు సుప్రీంకోర్టు అంగీకరించింది. అయితే జీవిత ఖైదు లేదా యావజ్జీవ కారాగార శిక్ష అంటే జీవితాంతం శిక్ష అనుభవించాలా.. చనిపోయేవరకు జైలులోనే ఉండాలా.. లేదా క్రిమినల్ ప్రొసీజరల్ కోడ్-సీఆర్పీసీ సెక్షన్ 432 కింద ఆ శిక్షను రద్దు చేయడం గానీ.. రద్దు చేయడం గానీ చేయవచ్చా, ఆ శిక్షపై రెమిషన్ ఇవ్వవచ్చా అనే విషయంపై స్పష్టత కోరుతూ జీవిత ఖైదు శిక్ష పడిన చంద్రకాంత్ ఝా అనే వ్యక్తి సుప్రీం కోర్టులో పిటిషన్ దాఖలు చేశారు. ఈ క్రమంలోనే దీనిపై స్పందన తెలియజేయాలని.. ఢిల్లీ ప్రభుత్వాన్ని సుప్రీంకోర్టు నోటీసులు ఇచ్చింది. ఈ క్రమంలోనే యావజ్జీవ శిక్షకు సరైన నిర్వచనం కోరుతూ దాఖలైన పిటిషన్‌ పరిశీలనకు సుప్రీంకోర్టు అంగీకరించింది.

2006, 2007లలో తీహార్‌ జైలు బయట ముగ్గురిని హత్య చేసిన కేసులో చంద్రకాంత్‌ ఝా అనే వ్యక్తి దోషిగా తేలడంతో అతనికి కోర్టు యావజ్జీవ శిక్ష విధించింది. ఈ క్రమంలోనే జీవితఖైదు గురించి సుప్రీంకోర్టును ఆశ్రయించిన చంద్రకాంత్ ఝా.. ఈ యావజ్జీవ కారాగార శిక్ష గురించి ప్రశ్నించారు. ఈ జీవిత ఖైదు అంటే జీవితాంతం శిక్ష అనుభవించాలా.. లేక సీఆర్‌పీసీ సెక్షన్‌ 432 ని ఉపయోగించుకుని ఆ శిక్షను తగ్గించడం లేదా రెమిషన్‌ మంజూరు చేయడం చేయొచ్చా అనే విషయాన్ని స్పష్టం చేయాలంటూ సుప్రీంకోర్టులో చంద్రకాంత్ ఝా పిటిషన్‌ దాఖలు చేశారు.

చంద్రకాంత్‌ ఝా పిటిషన్‌పై స్పందన కోరుతూ జస్టిస్‌ హృషికేశ్‌ రాయ్‌, జస్టిస్‌ ప్రశాంత్‌ కుమార్‌ మిశ్రా నేతృత్వంలోని ద్వి సభ్య ధర్మాసనం ఢిల్లీ ప్రభుత్వానికి నోటీసులు జారీచేసింది. లాయర్ రిషి మల్హోత్రా ద్వారా దాఖలు చేసిన ఈ పిటిషన్‌లో ఐపీసీ సెక్షన్లు 302, 201 కింద తనకు శిక్ష విధించినట్లు చంద్రకాంత్ ఝా తెలిపారు. మూడు హత్యలకు సంబంధించిన కేసుల్లో తనకు ట్రయల్‌ కోర్టు విధించిన మరణశిక్షను ఢిల్లీ హైకోర్టు గతంలో యావజ్జీవ కారాగార శిక్షకు తగ్గించిందని పిటిషనర్ పేర్కొన్నారు. ఐపీసీలోని సెక్షన్‌ 302.. 2 శిక్షలను స్పష్టంగా పేర్కొందని.. ఒకటి మరణ శిక్ష, రెండోది యావజ్జీవ కారాగార శిక్ష అని చంద్రకాంత్ ఝా తెలిపారు. ఈ 2 మినహా మరే ఇతర శిక్షను ఇందులో పేర్కొనలేదని పేర్కొన్నారు.

ఈ క్రమంలోనే యావజ్జీవ కారాగార శిక్షను జీవితాంతం వరకు అని పేర్కొంటే అది దోషిగా ఆ వ్యక్తి ప్రాథమిక హక్కును ఉల్లంఘించినట్టేనని పిటిషన్‌ పేర్కొంది. రాష్ట్ర ప్రభుత్వాలు రెమిషన్‌ కింద అందించే శిక్ష తగ్గింపు అవకాశాలను వారికి దక్కకుండా చేయడమేనని పేర్కొన్నారు. దీనిపై స్పందన తెలియజేయాలంటూ ధర్మాసనం ఢిల్లీ ప్రభుత్వానికి నోటీసు ఇచ్చింది.