ఇండిగో 'స్పెషల్' సేల్.. తక్కువ ధరకే విమాన ప్రయాణం.. 10కేజీ లగేజీ ఫ్రీ!

దేశీయ దిగ్గజ ఎయిర్‌లైన్స్‌లో ఒకటైన ఇండిగో అదిరే ఆఫర్ తీసుకొచ్చింది. విదేశాలకు వెళ్లే విద్యార్థుల కోసం ప్రత్యేక కార్యక్రమాన్ని చేపట్టింది. స్టూడెంట్ స్పెషల్ కార్యక్రమం ద్వారా తక్కువ ధరకే విమాన ప్రయాణం కల్పిస్తోంది. స్టూడెంట్ స్పెషల్ ప్రోగ్రామ్ ద్వారా ప్రత్యేక టికెట్ ధరలతో పాటు అదనపు ప్రయోజనాలు కల్పిస్తోంది. ఇండిగో అధికారిక వెబ్‌సైట్, యాప్ ద్వారా టికెట్లు బుక్ చేసుకునే విద్యార్థులకు టికెట్ ధరలపై డిస్కౌంట్‌తో పాటు అదనపు బెనిఫిట్స్ లభిస్తాయని కంపెనీ తెలిపింది. ఆ వివరాలు ఇప్పుడే తెలుసుకుందాం.

తక్కువ ధరకే విమాన ప్రయాణం, సౌలభ్యం, సౌకర్యాలపై ప్రత్యేక దృష్టితో ఈ ప్రత్యేకమైన ఛార్జీలను అందిస్తున్నామని, అయితే, ఇండిగో వెబ్‌సైట్, మొబైల్ యాప్ ద్వారా మాత్రమే బుక్ చేసుకునే వారికి ఈ ఆఫర్ అందుబాటులో ఉంటుందని తెలిపింది. ఇప్పటికే టికెట్లు బుక్ చేసుకున్న విద్యార్థులు.. ఇండిగో కొత్త ఛార్జీల ఆఫర్ పొందేందుకు ఎటువంటి సవరణ ఛార్జీలు చెల్లించకుండానే సవరించుకునేందుకు అనుమతిస్తున్నట్లు తెలిపింది. సాధారణంగా విమాన టికెట్ బుకింగ్‌లో మార్పులు చేస్తే ఛార్జీలు విధిస్తారు. స్టూడెంట్ స్పెషల్ ప్రోగ్రామ్ ద్వారా ఈ ఛార్జీలను మాఫీ చేస్తున్నట్లు కంపెనీ తెలిపింది. ఈ ఛార్జీల మినహాయింపు నిర్ణయం 'విద్యార్థులు వారి విద్యా షెడ్యూళ్లకు అవసరమైన సౌలభ్యాన్నిఅందిస్తుంది' అని ఎయిర్‌లైన్స్ పేర్కొంది.

టికెట్లపై 6 శాతం డిస్కౌంట్..

ఇండిగో అందిస్తు్నన న్యూ ట్రావెల్ స్కీమ్ ద్వారా విద్యార్థులు విమాన టికెట్ ధరలపై 6 శాతం డిస్కౌంట్ పొందవచ్చని కంపెనీ తెలిపింది. దీనితో పాటుగా ఎలాంటి ఛార్జీలు లేకుండానే 10 కిలోల వరకు అదనపు బ్యాగేజీ తీసుకెళ్లవచ్చని పేర్కొంది. విదేశాల్లో చదువుకునే విద్యార్థులు కోర్సులో చేరేందుకు వెళ్లే సమయంలో కోర్స్ మెటీరియల్, ఇతర ముఖ్యమైన వస్తువులు తీసుకెళ్లాల్సి ఉంటుందని, అందుకే ఈ అదనపు బ్యాగేజీకి అనుమతిస్తున్నట్లు తెలిపింది.

హైదరాబాద్ నుంచీ ఫ్లైట్స్

ఇండిగో స్టూడెంట్ స్పెషల్ ఆఫర్ అనేది దేశవ్యాప్తంగా మొత్తం 80 ప్రాంతాల నుంచి పొందవచ్చు. అందులో ప్రధానంగా గోవా, ముంబై, ఢిల్లీ, బెంగళూరు, హైదరాబాద్ వంటి పాపులర్ సిటీలు ఉన్నాయి. విమానయాన సంస్థ కొత్త స్టూడెంట్ స్పెషల్ ఆఫర్ విద్యార్థులు ప్రయాణిస్తున్నప్పుడు ఎదుర్కొనే సవాళ్లను పరిష్కరించేందుకు రూపొందించినట్లు తెలిపింది. అలాగే విమాన ప్రయాణాన్ని మరింత అందుబాటులోకి తీసుకొచ్చి ఒత్తిడి లేకుండా చేస్తుందని పేర్కొంది.