డ్యూటీలో ఆ పని చేస్తూ బుక్కయ్యాడు.. సీన్ కట్ చేస్తే రూ.లక్షలు సంపాదించాడు

నిద్ర అనేది ఓ జీవ క్రియ.. పగలు పనిచేయటం, రాత్రి నిద్రపోవటం సహజంగా జరిగే ప్రక్రియ. అయితే 24*7 సర్వీసులు వచ్చాక ఇది కాస్తా మారిందనుకోండి. నైట్ షిప్టులు, లేట్ నైట్ డ్యూటీలతో ప్రస్తుతం పగలూ, రాత్రికి తేడా లేకుండా పోయింది. ఇక నిద్ర గురించి.. ఇంత ఉపోద్ఘాతం ఎందుకంటే.. చైనాలో ఓ వ్యక్తిని విధుల్లో ఉన్న సమయంలో నిద్రపోయాడంటూ ఓ కంపెనీ ఉద్యోగం నుంచి తొలగించింది. మరి పని వేళల్లో నిద్రపోతే పీకేయరా అని అనుకుంటే తప్పులేదు. కానీ మనోడు చేసిన పనికి.. ఇప్పుడు అదే కంపెనీయే ఆ ఉద్యోగికి రూ.లక్షల్లో చెల్లించాల్సి వస్తోంది.

చైనాలోని జియాంగ్జూ ప్రావిన్స్‌లో ఉన్న తైక్సింగ్ నగరంలో ఓ కెమికల్ కంపెనీ ఉంది. జాంగ్ అనే వ్యక్తి అక్కడ 20 ఏళ్ల నుంచి పనిచేస్తున్నారు. డిపార్ట్‌మెంట్ మేనేజర్ స్థాయి వరకూ ఎదిగారు. అయితే 2024 ఏడాది ప్రారంభంలో జాంగ్‌ను ఉద్యోగం నుంచి తొలగించారు. విధి నిర్వహణలో ఉన్న సమయంలో నిద్రపోయాడనే కారణంతో ఆ కంపెనీ.. జాంగ్‌ను ఉద్యోగం నుంచి తొలగించింది. సీసీటీవీ ఫుటేజీలో జాంగ్ నిద్రపోతూ కనిపించడంతో ఆ కంపెనీ ఈ నిర్ణయం తీసుకుంది.

 అయితే ఉద్యోగం నుంచి తొలగిస్తూ ఘటన జరిగిన రెండు వారాల తర్వాత కంపెనీ హెచ్ఆర్ రిపోర్టు విడుదల చేశారు. ఈ విషయంలో కంపెనీ యాజమాన్యం విచారణ కూడా జరిపింది. నిద్రపోతున్న విషయమై జాంగ్‌ను వివరణ కోరగా.. ఆయన అంగీకరించారు. అలసట కారణంగా గంట పాటు నిద్రపోయినట్లు చెప్పారు. అయితే కంపెనీ యాజమాన్యం మాత్రం జాంగ్‌ను ఉద్యోగం నుంచి తొలగించింది. కార్మిక సంఘంతో సంప్రదించిన తర్వాత, అధికారిక తొలగింపు నోటీసును జారీ చేసింది, జాంగ్ ప్రవర్తన కంపెనీ జీరో-టాలరెన్స్ డిసిప్లిన్ విధానం ఉల్లంఘన కిందకు వస్తుందని తొలగింపు నోటీసుల్లో పేర్కొన్నారు.

అయితే తనను ఉద్యోగం నుంచి తొలగించడం అన్యాయమంటూ జాంగ్ వాదించారు. దీనిపై లీగల్ యాక్షన్ తీసుకోవాలని నిర్ణయించుకుని కోర్డులో పిటిషన్ వేశారు. జాంగ్ పిటిషన్ విచారించిన కోర్డు.. జాంగ్ వాదనలతో ఏకీభవించింది. నిబంధనలను ఉల్లఘించినప్పుడు ఉద్యోగం నుంచి తొలగించే హక్కు యాజమాన్యానికి ఉన్నప్పటికీ.. కంపెనీకి తీవ్రమైన నష్టం కలిగించినప్పుడే అలాంటి చర్యలు తీసుకోవాలని కోర్డు అభిప్రాయపడింది.

విధుల్లో ఉన్నప్పుడు జాంగ్ నిద్రపోతూ కనిపించడం అదే తొలిసారని చెప్పిన కోర్డు.. దాని వలన కంపెనీకి తీవ్రమైన నష్టమేమీ జరగలేదని అభిప్రాయపడింది. 20 ఏళ్లపాటు ఆ కంపెనీలో జాంగ్ పనిచేసిన తీరు, సేవలు, ప్రమోషన్లు, జీతాల పెరుగుదలను పరిగణనలోకి తీసుకున్న కోర్టు.. కేవలం ఒక ఉల్లంఘనపై అతనిని తొలగించడం అసమంజసం అని అభిప్రాయపడింది. ఉద్యోగం నుంచి తొలగించిన జాంగ్‌కు 35 వేల యువాన్లు.. అంటే భారతీయ కరెన్సీలో 41.6 లక్షలు చెల్లించాలంటూ సదరు కంపెనీని ఆదేశించింది.