ప్రధాని పదవీకాలం ముగిసేలోపు అది సాధించడమే నా లక్ష్యం.. మోదీ కీలక వ్యాఖ్యలు

ఆర్థిక నిర్వహణకు సంబంధించి ప్రధాని నరేంద్ర మోదీ ఆసక్తికరమైన వ్యాఖ్యలు చేశారు. తన పదవీకాలం ముగిసేలోపు సుసంపన్నమైన భారత బంగారు భవితను చేరుకునే లక్ష్యాన్ని పెట్టుకున్నట్లు మోదీ స్పష్టం చేశారు. ఈ సందర్భంగానే భవిష్యత్ తరాలకు ఆర్థిక నిర్వహణపై సురక్షితమైన భవిష్యత్‌ను అందించాలనేదే తన ఆశయమని పేర్కొన్నారు. ఢిల్లీలోని టైమ్స్ గ్లోబల్ బిజినెస్ సమ్మిట్‌లో ప్రధాని మోదీ శుక్రవారం పాల్గొని ప్రసంగించారు. ఈ సందర్భంగానే దేశంలో ఓట్ల కోసం రాజకీయాలు చేసేవారు చాలా మంది ఉన్నారని.. వారు దేశ అభివృద్ధి గురించి చిత్తశుద్ధితో పని చేయలేరని ప్రతిపక్షాలపై తీవ్ర విమర్శలు గుప్పించారు.

ఈ సందర్భంగానే విద్యుత్ విషయంలో దేశంలోని వివిధ రాష్ట్ర ప్రభుత్వాలు అనుసరిస్తున్న వైఖరి.. విద్యుత్ రంగాన్ని పూర్తిగా అంధకారంలోకి తీసుకెళ్లే ప్రమాదం ఉందని ప్రధాని నరేంద్ర మోదీ తీవ్ర ఆందోళన వ్యక్తం చేశారు. ఇక ఇంధన రంగంలో సుస్థిరత, దీర్ఘకాలిక స్థిరత్వానికి ప్రాధాన్యత ఇవ్వాలని సూచించారు. దేశ ఆర్థిక అభివృద్ధికి అనుకూలమైన వాతావరణాన్ని సృష్టించుకోవాలని.. ఆ వాతావరణాన్ని పెంపొందించుకోవాలని తెలిపారు. ఇక ఉన్న వనరులను సమర్థవంతంగా వాడుకోవాల్సిన అవసరం ఉందని గుర్తు చేశారు. పాలకులకు ముందు చూపు ఉండటం చాలా ముఖ్యమని ఈ సందర్భంగా ప్రధాని నరేంద్ర మోదీ స్పష్టం చేశారు.

ఈ నేపథ్యంలోనే తమ ప్రభుత్వం తొలిసారి 2014లో అధికారంలోకి వచ్చిన వెంటనే దేశ ఆర్థిక స్థితిపై పారదర్శకత ఉండాలని శ్వేతపత్రం తీసుకువచ్చిందని ప్రధాని మోదీ గుర్తు చేశారు. అయితే దేశ ప్రజల నమ్మకాన్ని, విశ్వాసాన్ని వమ్ము చేయకూడదని రాజనీతి కంటే రాష్ట్రనీతిని ఎంచుకున్నట్లు వెల్లడించారు. గత 10 సంవత్సరాలలో దేశంలో జరిగిన అభివృద్ధి గురించి ప్రజలకు తాము స్పష్టంగా వివరించగలమని ప్రధాని మోదీ తేల్చి చెప్పారు. అందుకే శ్వేతపత్రం విడుదల చేసినట్లు తెలిపారు. ఆ శ్వేత పత్రాన్ని పరిశీలిస్తే 10 ఏళ్ల కిందట భారత్ ఎక్కడుండేది.. ప్రస్తుతం ఎక్కడుందో తెలుస్తుందని తెలిపారు. ప్రస్తుతం దేశంలో పరిస్థితులు అనుకూలంగా ఉన్నాయని.. ప్రపంచ వేదికలపై భారత్ సత్తా చాటుతోందని తెలిపారు. సంక్షేమాన్ని, అభివృద్ధిని జోడెద్దుల్లా నడిపిస్తూ బీజేపీ ముందుకు సాగుతోందని ప్రధాని నరేంద్ర మోదీ ఉద్ఘాటించారు.