కోట్లు తెచ్చిపెట్టిన పిల్లల బర్త్ డేట్స్.. కేరళ వ్యక్తికి లాటరీలో జాక్‌పాట్

చాలా మంది తల్లిదండ్రులు తమకు తమ పిల్లలతోనే అదృష్టం వస్తుందని భావిస్తారు. ఆడపిల్ల పుడితే లక్ష్మీ దేవి పుట్టిందని.. మగ పిల్లాడు పుడితే వారసుడు పుట్టాడని సంతోష పడుతూ ఉంటారు. పిల్లలు పుట్టిన తర్వాతే సమస్యలు తీరాయని చెబుతూ ఉంటారు. ఇక్కడ కూడా అదే జరిగింది. అయితే అది పిల్లలు పుట్టగానే కాదు.. వారి పుట్టిన తేదీలతో ఆ తల్లిదండ్రులకు బంపరాఫర్ తగిలింది. పిల్లల పుట్టిన తేదీ వారికి కోట్లు కురిపించింది. అదేలాగంటే ఆ దంపతులు.. తమ పిల్లల పుట్టిన తేదీలపై తీసుకున్న లాటరీ టికెట్‌ బంపర్ డ్రాలో కోట్లు కొల్లగొట్టింది.

యూఏఈలో నిర్వహించిన బిగ్ టికెట్ అబుదాబీ వీక్లీ డ్రాలో కేరళకు చెందిన రాజీవ్ అరిక్కట్ అనే వ్యక్తికి జాక్‌పాట్ తగిలింది. ఆయన టికెట్ ఏకంగా 15 మిలియన్ దిర్హామ్స్ అంటే మన భారత కరెన్సీలో దాదాపుగా రూ.33 కోట్లు గెలుచుకుంది. ఆయన టికెట్ నంబర్ 037130 పై ఈ బంపరాఫర్ లభించినట్లు తెలిపారు. దీంతో ఆయన ఆనందానికి అవధుల్లేకుండా పోయాయి.

కేరళకు చెందిన రాజీవ్ అరిక్కట్ అనే వ్యక్తి కొన్ని సంవత్సరాలుగా యూఏఈలో పనిచేస్తున్నాడు. బతుకుదెరువు కోసం యూఏఈ వెళ్లిన రాజీవ్ అరిక్కట్.. అక్కడే ఏదో ఒక పని చేసుకుంటూ బతికేవాడు. అయితే లాటరీ టికెట్లు కొనే అలవాటు ఉన్న రాజీవ్ అరిక్కట్.. గత మూడేళ్లుగా టికెట్లు కొంటూనే ఉన్నాడు. రాజీవ్‌కు భార్య ఇద్దరు పిల్లలు ఉన్నారు. అయితే ఈసారి ఆయన ఏకంగా 6 టికెట్లు కొన్నాడు. అయితే ఈసారి బిగ్‌ టికెట్‌పై స్పెషల్ ఆఫర్ వచ్చిందని రాజీవ్ అరిక్కట్ తెలిపాడు. తాను 2 టికెట్లు కొంటే మరో 4 టికెట్లు ఉచితంగా వచ్చినట్లు వెల్లడించాడు. అయితే ప్రతీసారి లాటరీ తనకే వస్తుందనే నమ్మకంతో ఉంటానని పేర్కొన్నాడు. అయితే ఈసారి ఏకంగా 6 టికెట్లు తన వద్దే ఉండేసరికి ఆ నమ్మకం ఇంకా పెరిగిందని తెలిపాడు. అయితే తాను, తన భార్య కలిసి 7, 13 నంబర్‌తో ఉన్న టికెట్లు కొన్నట్లు వివరించాడు. అయితే అవి తమ పిల్లల పుట్టిన తేదీలు అని వెల్లడించారు.

అయితే 3 ఏళ్లుగా తాను లాటరీ టికెట్లు కొంటున్నా.. ఈసారి అదృష్టం వరించిందని రాజీవ్ అరిక్కట్ పేర్కొన్నాడు. కొన్న టికెట్ కాకుండా ఫ్రీ గా వచ్చిన టికెట్‌కే ఈ లాటరీ వచ్చినట్లు చెప్పాడు. లాటరీ తనకే వచ్చిందని చెప్పగానే వచ్చిన సంతోషాన్ని మాటల్లో వివరించలేనిదని పేర్కొన్నాడు. తనతోపాటు తన కుటుంబ సభ్యుల జీవితాలను మార్చేసిన క్షణం అది అని రాజీవ్‌ అరిక్కట్ తన సంతోషాన్ని వ్యక్తం చేశాడు. అయితే తనకు లభించిన రూ.33 కోట్లను దేనికి ఖర్చు చేయాలి అనే విషయంపై ఇంకా ఎలాంటి నిర్ణయం తీసుకోలేదని పేర్కొన్నాడు. అయితే చివర్లో రాజీవ్ అరిక్కట్ కీలక ట్విస్ట్ ఇచ్చారు. తనకు వచ్చిన రూ.33 కోట్లను తానే తీసుకోకుండా మరో 19 మందితో సమానంగా పంచుకోవాలని నిర్ణయించుకున్నట్లు చెప్పి తన ఉదారభావాన్ని చాటుకున్నారు.